ល្បីថាគឹម លីហ្សា និងកាតុ មានមុខស្រដៀងគ្នា ដល់ពេលថតជិតគ្នា ទើបដឹងច្បាស់!

ភ្នំពេញ៖ ក្រោយរៀបការសាងសុភមង្គល ជាមួយនឹងស្វាមីជាសេដ្ឋី អតីតតារាសម្តែងដ៏មានប្រជាប្រិយភាពអ្នកនាងគឹម លីហ្សា ក៏បានផ្លាស់ប្តូរទីលំនៅទៅរស់នៅក្រៅប្រទេសលើទឹកដីអូស្តា្រលី ជាមួយគ្រួសារយ៉ាងមានសុភមង្គល។

តែពេលនេះ នាងក៏បានមកលេងនៅលើទឹកដីខ្មែរម្តងទៀត ដែលមានការស្វាគមន៍យ៉ាងកក់ក្តៅពីមិត្តៗសិល្បៈរបស់នាង។ដោយឡែកប្រិយមិត្តជាច្រើនក៏បានដឹងហើយថា តារារូបនេះត្រូវបានអ្នកគាំទ្រជាច្រើន បានថានាងមានមុខមាត់ស្រដៀងទៅនឹងតារាកំប្លែងអ្នកនាង កាតុ តាំងពីតារារូបនេះចូលសិល្បៈដំបូងមកម្ល៉េះ។

ជាក់ស្តែងនៅក្នុងបណ្តាញសង្គមអ៊ីនស្តារក្រាមរបស់តារាស្រីរូបនេះបានបង្ហោះរូបភាពជាមួយនឹងអ្នកនាង កាតុ ដែលមើលទៅពិតជាមានមុខមាត់ដូចគ្នាមែនទែន នៅពេលដែលគេទាំងពីរនាងថតជិតគ្នាបែបនេះ មិនត្រឹមតែប៉ុណ្ណោះអ្នកគាំទ្រក៏នាំគ្នាលាន់មាត់ថាពួកគេពិតជាដូចគ្នាដែរ។

នៅក្នុងនោះនាង ក៏បានភ្ជាប់ជាមួយសារមួយ ដែលបាននិយាយយ៉ាងដូច្នោះ​ថា៖«តាំងពីចូលសិល្បៈដំបូងមកម្ល៉េះ មានមនុស្សជាច្រើនតែងតែនិយាយថាខ្ញុំនិងបងតុ មុខដូចគ្នា សូម្បីតែប្តីបងតុផ្ទាល់ក៏និយាយចឹងដែរ ចុះអ្នកទាំងអស់គ្នាយល់យ៉ាងណាដែរ?»៕ 

• កាតុ
• គឹម លីហ្សា
• តារាខ្មែរ