រាជធានីភ្នំពេញ ៖ កាលពីព្រឹកថ្ងៃទី៣សីហា មានព័ត៌មានចចាមអារា៉មថា កូនប្រុសរបស់អ្នកនាងខាត់ សុឃីមបានស្លាប់ ដោយសារជំងឺEV-71នៅថ្ងៃទី២សីហា ។ មូលហេតុដែលបណ្តាលឲ្យកូនប្រុសរបស់នាងស្លាប់ដោយសារតែនាងមិនយក ចិត្តទុកដាក់ និងគិតតែពីសេចក្តីសុខផ្ទាល់ខ្លួនជាមួយលោកផាណូ ដែលជាគូដណ្តឹងរបស់នាង។ ពាក្យចចាមអារ៉ាមនោះនិយាយទៀតថា ក្រោយពេលកូនស្លាប់ទើបនាងខាត់ សុឃីម ស្តាយក្រោយ និងចង់ផ្តាច់ពាក្យជាមួយគូដណ្តឹងថែមទៀតផង ។
ទាក់ទិនទៅនឹងរឿង នេះ អ្នកនាងខាត់ សុឃីម បានបកស្រាយទាំងអួលដើមកប្រាប់កោះសន្តិភាពឲ្យដឹងថា នាងអរគុណណាស់ចំពោះអ្នកដែលគាំទ្រដល់រូបនាង និងបានសួរសុខទុក្ខ ទាំងតាមទូរស័ព្ទក្តី និងផ្ទាល់ក្តី ចំពោះបញ្ហាដែលថាកូនប្រុសរបស់នាងស្លាប់ ដោយសារកើតមានជំងឺEV-71។ វាមិនមែនជាការពិតទេ គឺមានអ្នកបង្ខូចកេរ្តិ៍ឈ្មោះនាង និងកូនប្រុសរបស់នាង។ តាមពិតកូននាងមានជីវិតរស់នៅយ៉ាងល្អប្រសើរ ។ កូនរបស់នាងមិនដឹងអ្វីសោះបែរជាគេនិយាយនាថាស្លាប់ទៅវិញ ។ នាងមិនដឹងថាតើអ្នកដែលនិយាយពាក្យអកុសលនោះ មានគំនិតអ្វីទេ ។
កូនប្រុសរបស់នាងខាត់ សុឃីម ឈ្មោះបញ្ញា យសស័ក្តិ ហៅក្រៅស្កាយ មានអាយុ៧ឆ្នាំ ។
នាងខាត់ សុឃីម និយាយថា «នាងខ្ញុំស្រឡាញ់កូនប្រុសរបស់នាងខ្ញុំស្មើនឹងជីវិត នៅពេលដែលនាងខ្ញុំទទួលព័ត៌មានទាំងនេះ មានអារម្មណ៍ថា វាអយុត្តិធម៌ណាស់ចំពោះខ្លួននាងខ្ញុំ។ ជារៀងរាល់ថ្ងៃនេះនាងខ្ញុំតែងតែនៅជាមួយកូន និងតែងតែសង្កេតមើលកូនមិនដែលឲ្យដាច់ពីក្រសែភ្នែកទេ ហើយឃើញថាកូនប្រុសរបស់នាងខ្ញុំទៅសាលារៀនក៏ធម្មតា នៅផ្ទះក៏ធម្មតាមិនមានឈឺថ្កាត់អ្វីទាំងអស់។ ជាពិសេសទៅទៀតនោះនាងខ្ញុំមិនអាចមានប្តីក្មេងរហូតដល់ភ្លេច កូនខ្លួនឯងទេ នាងខ្ញុំមិនដែលគិតថា នឹងជ្រើសរើសអ្នកផ្សេង ហើយបំភ្លេចកូនខ្លួនឯងសោះឡើយ» ។
តារាចម្រៀងរូបនេះបន្ថែមថា សម្តីដែលគេនិយាយបង្ខូចកូនប្រុស និងរូបនាងនេះពិតជាធ្ងន់ណាស់ សម្រាប់នាងជាមនុស្សដែលធ្លាប់ហែលឆ្លងកាត់រឿងលំបាកជាច្រើន រាប់មិនអស់ ។ ជាធម្មតាក្មេងតែងតែឈឺថ្កាត់បន្តិចបន្តួចជាធម្មតា ប៉ុន្តែរហូតដល់កើតមានជំងឺ EV-71 គឺមិនមានទេ ។ នាងថា បើមិនជឿទេ អ្នកកាសែតទាំងអស់អាចទៅយកព័ត៌មាននៅសាលាដែលកូនរបស់នាងរៀន គឺសាលាប៊ែលធី ស្ទឹងមានជ័យ នឹងដឹងច្បាស់មិនខាន ។
នាងខាត់ សុឃីម បញ្ជាក់ថា នាងចង់ប្រាប់ទៅអ្នកដែលនិយាយអាក្រក់ពីកូនប្រុស និងរូបនាងថា គូដណ្តឹងរបស់នាងស្រឡាញ់កូននាងខ្លាំងណាស់ សូម្បីទៅដើរលេងគឺតែងតែមានកូននាងទៅជាមួយជានិច្ច ។ គូដណ្តឹងរបស់នាងជាមនុស្សចិត្តទូលាយ ស្រឡាញ់កូនរបស់នាងដូចជាកូនបង្កើត ។ ចំពោះរូបនាងក៏មិនមែនជាមនុស្សស្រីយកមនុស្សប្រុសជាធំដែរ ។ ដោយសារតែលោកផាណូ ស្រឡាញ់កូននាង ទើបនាងព្រមភ្ជាប់ពាក្យជាមួយគ្នា ។ រូបនាង និងកូន ព្រមទាំងលោក ផាណូ គឺល្អូកល្អិននឹងគ្នាណាស់ ។ កន្លងមកមិនខ្វះអ្នកដែលស្រឡាញ់នាង ទេតែនាងមិនយកដោយសារតែបុរសទាំងនោះមិនស្រឡាញ់កូនរបស់នាងដូច លោកផាណូ ដូច្នេះនាងមិនអាចទទួលបុរសទាំងនោះទេ ។
នាងខាត់ សុឃីម បញ្ជាក់ថា ចំពោះពាក្យចចាមអារ៉ាមដែលគេនិយាយតៗគ្នាថាកូននាងស្លាប់ដោយ សារជំងឺEV-71 នេះភាគច្រើនគឺអាចចេញមកពីមាត់គ្រូពេទ្យ ។ នាងនិយាយថា ក្នុងនាមជាគ្រូពេទ្យមិនគួរនិយាយពាក្យដែលមិនមែនជាការពិតទេ ៕
បញ្ចូលអត្ថបទ ៖ បុប្ផា កោះ
ផ្តល់សិទ្ធដោយ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
