បវរកញ្ញាហ្វីលីពីនម្នាក់ បើកទ្វារទទួលបាច់ផ្កា ត្រូវឃាតករបាញ់សម្លាប់

ហ្វីលីពីន៖ បវរកញ្ញាវ័យ២៣ឆ្នាំ ជនជាតិហ្វីលីពីន នាង Mary Christine Balagtas ត្រូវបានបាញ់សម្លាប់ស្លាប់ភ្លាមៗ បន្ទាប់ពីរូបនាងបានបើកទ្វារផ្ទះ ឲ្យបុរសពីរនាក់ ដែលជាឃាតករជូនបាច់ផ្កា និងស្ករសូកូឡាដល់ផ្ទះនាង។ នេះយោងតាមប្រភពដកស្រង់ ពីភ្នាក់ងារសារព័ត៌មាន មីត្រូ បានចុះផ្សាយ។

ប្រភពបានឲ្យដឹងថា ហេតុការណ៍ដ៏គួរឲ្យសោកសង្វេគនេះ បានកើតឡើងកាលពីព្រឹកថ្ងៃពុធ ទី៥ មេសា ឆ្នាំ២០១៧កន្លងទៅថ្មីៗនេះ ដោយនាង Balagtas ត្រូវបានជនសង្ស័យបាញ់ប្រហារ ចំកណ្តាលក្បាលដោយគ្រាប់កាំភ្លើង នៅមុខផ្ទះរបស់នាង ស្ថិតក្នុងខេត្ត Bulacan ប្រទេសហ្វីលីពីន។

ប៉ូលិសបាននិយាយថា ក្រោយពីធ្វើសកម្មភាពរួច ជនល្មើសបាននាំគ្នាប្រញាប់ប្រញាល់ ឡើងជិះម៉ូតូរត់គេចខ្លួនបាត់តែម្តង។ ចំណែកឯនាង Balagtas វិញ ក៏ត្រូវបានគេដឹកបញ្ជូនទៅសង្គ្រោះបន្ទាន់ នៅមន្ទីរពេទ្យផងដែរ។ ប៉ុន្តែជាអកុសល នាងបានស្លាប់នៅក្នុងរថយន្តសង្គ្រោះបន្ទាន់ មុនពេលទៅដល់មន្ទីរពេទ្យបាត់ហើយ។

លោកស្នងការប៉ូលិស Julio Lizardo ប្រចាំតំបន់ នៅស្ថានីយ៍ប៉ូលិស Plaridel ក្នុងខេត្ត Bulacan បានឲ្យដឹងថា បច្ចុប្បន្នខាងពួកលោក កំពុងតែបើកការស៊ើបអង្កេតលើករណីមួយនេះ យ៉ាងយកចិត្តទុកដាក់បំផុត ដើម្បីចង់ដឹងឲ្យប្រាកដថា តើបុរសណាម្នាក់ ដែលធ្លាប់មានទំនាក់ទំនងស្នេហា ជាមួយនឹងនាង Mary Christine Balagtas រហូតឈានដល់កើតមានរឿងរ៉ាវ បាញ់ប្រហារយ៉ាងដូច្នេះ។

«ពួកយើងជឿជាក់ថា ការបាញ់ប្រហារនេះ ជនល្មើសទាំងពីរនាក់នោះ អាចនឹងត្រូវបានគេជួលមកតែប៉ុណ្ណោះ» ។

គួរឲ្យដឹងដែរថា បវរកញ្ញានាង Balagtas មានឈ្មោះហៅក្រៅថា Tin បានក្លាយជាម្ចាស់គ្រងម្កុដរាជនី La Bulakenya កាលក្នុងកំឡុងឆ្នាំ២០០៩ និងឆ្នាំ២០១០។ ហើយនាងក៏ជាអតីតនិស្សិតស្រីម្នាក់ សិក្សានៅសាកលវិទ្យាល័យ University of Regina Carmeli College ផងដែរ ៕   

ប្រភព៖ មីត្រូ

ដោយឡែក ព័ត៌មានចាប់អារម្មណ៍មួយផ្សេងទៀត៖

អីយ៉ា! មាន សូនីតា ទៅលក់ក្រមា នៅបុណ្យភូមិ! 

ភ្នំពេញ៖ ប្រិយមិត្តភាគច្រើនប្រាកដជាស្គាល់ហើយនូវ កម្មវិធី «បុណ្យភូមិ» ដែលជាកម្មវិធីលេងកម្សាន្ត សប្បាយរៀបចំបែបប្រពៃណី និងមានសម្តែងសិល្បៈល្ខោនខ្មែរជាច្រើន សម្រាប់អបអរចូលឆ្នាំថ្មី ឆ្នាំ២០១៧ផងដែរ។ ដោយ «បុណ្យភូមិ» ឆ្នាំនេះ គឺ បានប្រារព្ធធ្វើឡើងរយៈពេល៣ថ្ងៃ គឺចាប់ពីថ្ងៃទី ៧ដល់ថ្ងៃទី៩ នៅឯវត្តទួលក្រសាំង។

ដោយឡែក នៅថ្ងៃទី១នៃ«បុណ្យភូមិ»នេះផងដែរ យើងសង្កេតឃើញថា មានវត្តមានតារាសម្តែងស្រី ដែលគេស្គាល់ថាជា រាជនីក្រមា មាន សូនីតា ដោយនាង ក៏បានបើកស្តង់មួយផ្ទាល់ខ្លួន សម្រាប់លក់ក្រមារបស់នាង ដោយស្តង់មានឈ្មោះថា «ផ្ទះស្រលាញ់»ផងដែរ ។

លើសពីនេះ កញ្ញា មាន សូនីតា នឹងបន្តលក់ក្រមារបស់ខ្លួន រយៈពេល៣ថ្ងៃរហូតដល់ចប់កម្មវិធីតែម្តង ដើម្បីងាយស្រួលដល់ប្រិយមិត្ត ដែលចង់ប្រើប្រាស់ក្រមា ឬក៏អាវក្រមាយ៉ាងស្រស់ស្អាត និងវត្ថុអនុស្សាវរីយ៍ជាច្រើន ដែលជាប៊្រេន«ផ្ទះស្រលាញ់»របស់កញ្ញា មាន សូនីតាផ្ទាល់តែម្តង។

យ៉ាងណាមិញ ក្នុងនោះផងដែរ យើងក៏ឃើញនូវវត្តមានតារាចម្រៀងប្រុស និងជាអ្នកនិពន្ធវ័យក្មេង លោក ម៉ានិត ក៏បានទៅលក់សៀវភៅរឿងប្រលោមលោក ដែលលោកនិពន្ធដោយផ្ទាល់រឿង «បេសកម្មមួយ» ផងដែរ៕