ខេត្តកំពង់ស្ពឺ ៖ រឿងរ៉ាវបង្កការភ្ញាក់ផ្អើលមួយបានកើតឡើង បន្ទាប់ពីពលរដ្ឋមួយភូមិបាននាំគ្នាចោមរោមនៅមុខផ្ទះបុរសចំណាស់មួយរូប ដោយទាមទារឱ្យយកទៅសម្លាប់ចោលដោយចោទថា ចេះអំពើអាបធ្មប់ តែមិនបានសម្រេចនោះទេ ព្រោះសមត្ថកិច្ចដឹកនាំដោយលោកអភិបាលស្រុក និងនគរបាលបានអន្តរាគមន៍ទាន់ពេលវេលា។
លោកវរសេនីយ៍ឯក ឃឹម សុផាន់រា អធិការនគរបាលស្រុកគងពិសី បានប្រាប់នៅព្រឹកថ្ងៃទី០១ ខែមេសា ២០១៧ ថា ករណីនេះកើតឡើងកាលពីវេលាម៉ោង១៥និង៣0នាទី ថ្ងៃទី៣១ មីនា នៅភូមិត្រពាំងស្វាយ ឃុំព្រៃវិហារ ស្រុកគងពិសី ។ បុរសចំណាស់ដែលរងនូវការប៉ុនប៉ងសម្លាប់នេះឈ្មោះ ប្រាក់ គង់ ភេទប្រុស អាយុ៦៥ឆ្នាំ មានទីលំនៅភូមិ-ឃុំខាងលើ មុខរបរជាគ្រូទស្សន៍ទាយ ។
លោកអធិការបន្តថា តាមការស្រាវជ្រាវករណីនេះបានកើតឡើង បន្ទាប់ពីមានអ្នកភូមិម្នាក់មានជំងឺមើលមិនជា ទើបកើតមានហេតុការណ៍បែបនេះឡើង។ ទោះជាយ៉ាងណា ការប៉ុនប៉ុងទាមទារយកបុរសចំណាស់ពីលើផ្ទះមក ដើម្បីសម្លាប់នេះមិនបានសំរេចនោះទេ ដោយសមត្ថកិច្ចនគរបាលស្រុកដឹកនាំដោយលោក ចែម ភឺនរីមវុទ្ធី បានចុះទៅអន្តរាគមន៍ទាន់ពេលវេលា និងបាននាំបុរសរូបនេះមកកាន់អធិការដ្ឋាននគរបាលស្រុក ដើម្បីធានាសុវត្ថិភាពកុំឱ្យមានអំពើហិង្សាណាមួយកើតឡើង។
បើតាមសម្តីនគរបាលស្រុកមួយរូបបានប្រាប់ថា វាពិបាកណាស់ ទម្រាំជម្លៀសជនរងគ្រោះចេញពីផ្ទះមកបាន ព្រោះប្រជាពលរដ្ឋមួយចំនួនដែលយល់ខុសបានទាមទារចង់យកជនរងគ្រោះទៅសម្លាប់ ដោយចោទថា ចេះអំពើអាបធ្មប់ ទើបអ្នកក្នុងភូមិមានជំងឺមើលមិនជាបែបនេះ។ រហូតមកដល់ព្រឹកថ្ងៃទី០១នេះ សមត្ថកិច្ចបានស្រាវជ្រាវដឹងថា ក្រុមមនុស្សដែលទាមទារចង់យកជនរងគ្រោះទៅសម្លាប់នេះ មានគ្នា១៩នាក់សុទ្ធសឹងជាអ្នកពាក់ព័ន្ធសកម្ម ក្រៅពីនោះគឺជាអ្នកគាំទ្រ។
ស្ត្រីចំណាស់ម្នាក់ជាប្រពន្ធជនរងគ្រោះបានរៀបរាប់ថា ក្នុងភូមិមានគ្រួសារមួយមានមនុស្សឈឺ តែគ្រួសារនោះមិនបានយកចិត្តទុកដាក់នាំទៅមន្ទីរពេទ្យដើម្បីព្យាបាលទេ បែរជាទៅរកគ្រូហោគុនគូរមើលទៅវិញ។ តាមអ្វីដែលគាត់ដឹងគឺហោរាបានប្រាប់ថា នៅក្នុងភូមិមានមនុស្សចេះអំពើអាបធ្មប់ ទើបឈឺមិនជាបែបនេះ មិនបានប៉ុន្មានផង ស្រាប់តែនាំគ្នាមកចោទប្តីរបស់គាត់ថា ចេះធ្វើអំពើអាបធ្មប់ទៅវិញ។ តាមពិតប្តីរបស់គាត់មិនចេះអ្វីនោះទេ ហើយការដែលគាត់ចេះទាយនេះ គឺដោយសារតែទាយតាមសៀវភៅដែលគេចងក្រងឡើងប៉ុណ្ណោះ។ ការដែលចោមរោមចង់យកប្តីគាត់ទៅសម្លាប់នេះ ម្នាក់ៗលើកឡើងថា កាលណាចេះទាយ គឺចេះធ្វើអំពើអាបធ្មប់ហើយ បើទោះជាប្តីគាត់ហា៑នស្បថសូមឱ្យព្រះធរណីស្រូបយ៉ាងណាក៏មនុស្សទាំងនោះមិនព្រមឡើយ គឺដឹងតែទាមទារចង់សម្លាប់ប្តីរបស់គាត់ទៅវិញ។ រឿងនេះក្នុងនាមគាត់ជាប្រពន្ធបានដាក់ពាក្យបណ្តឹងសូមឱ្យសមត្ថកិច្ចកសាងសំណុំរឿងបញ្ជូនទៅកាន់សាលាដំបូងខេត្ត ដើម្បីជួយរកយុត្តិធម៌ឱ្យប្តីរបស់គាត់ ។ ក្រោយដាក់ពាក្យបណ្តឹងរួចប្តីរបស់គាត់ត្រូវកូនប្រុសដឹកយកទៅនៅជាមួយខាងខេត្តតាកែវ ដោយមិនឱ្យរស់នៅក្នុងភូមិខាងលើទៀតឡើយ។
លោកវរសេនីយ៍ត្រី ទុយ ថេន អធិការរងនគរបាលស្រុកគងពិសី បានលើកឡើងថា នេះពិតជាសំណាងហើយដែលដឹងដល់សមត្ថកិច្ចទាន់ពេលវេលា បើយឺតតែបន្តិចជនរងគ្រោះអាចស្លាប់បាត់បង់ជីវិតបាត់ទៅហើយ។ តែបើកើតឡើងមែននោះ វាពិបាកណាស់ក្នុងការស៊ើបអង្កេតរកជនដៃដល់ ព្រោះមនុស្ស១ភូមិជាអ្នកប្រព្រឹត្ត និងសមគំនិតគ្នា។
មជ្ឈដ្ឋានខាងក្រៅដែលដឹងរឿងបានលើកឡើងថា សម័យនេះហើយនៅមានការជឿដោយខ្វះការពិចារណាបែបនេះទៀត គួរណាស់តែប្រើសតិសម្បជញ្ញៈគិតឱ្យបានវែងឆ្ងាយថា តើនៅពេលខ្លួនប្រព្រឹត្តអំពើឃាតកម្មទៅលើអ្នកដទៃ ហើយខ្លួនអាចរស់បានសុខឬយ៉ាងណា? បានជានាំគ្នាធ្វើទង្វើបែបនេះ ឬមួយគិតថា រួមគ្នាមួយភូមិហើយសមត្ថកិច្ចស៊ើបមិនដឹង? រឿងបែបនេះធ្លាប់បានកើតឡើងម្តងមកហើយនៅឃុំវាលកាលពីអំឡុង១ឆ្នាំមុន ដោយបុរសចំណាស់ម្នាក់ត្រូវជនមិនស្គាល់មុខលបចាក់ធ្លាយពោះវៀនស្លាប់ក្រោមផ្ទះ ដោយចោទថា ចេះអំពើអាបធ្មប់ដូចករណីខាងលើនេះដែរ តែរហូតដល់ពេលនេះសមត្ថកិច្ចនៅមិនទាន់ចាប់ជនដៃដល់ណាម្នាក់ឡើយ ព្រោះតែស៊ើបទៅដឹងថា មនុស្សជាច្រើនមានពាក់ព័ន្ធនឹងករណីឃាតកម្មនេះ៕
ប្រភព៖ កោះសន្តិភាព
ដោយឡែក ព័ត៌មានគួរឲ្យចាប់អារម្មណ៍មួយផ្សេងទៀត៖ បុករះទៀតហើយ ! រថយន្តបុកអូសជនរងគ្រោះ1គីឡូម៉ែត្រស្លាប់យ៉ាងអាណោចអធ័ម
រាជធានីភ្នំពេញ ៖ ហេតុការណ៍គ្រោះថ្នាក់ចរាចរណ៍មួយបង្កឡើងដោយរថយន្តបុករះម៉ូតូ២គ្រឿងកាលពីម៉ោង៩និង៣០នាទីយប់ថ្ងៃទី១ ខែមេសា ឆ្នាំ២០១៧ នៅចំណុចខាងលិចមន្ទីរពេទ្យចោមចៅលើកំណាត់ផ្លូវជាតិលេខ៤ ភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ ដែលបណ្តាលឱ្យបុរសម្នាក់ត្រូវរថយន្តបុក និងកិនអូសតាមរថយន្តប្រមាណមួយគីឡូម៉ែត្រស្លាប់ភ្លាមៗយ៉ាងអណោចអធ័មនៅនឹងកន្លែង រីឯប្រពន្ធបានរងរបួសយ៉ាងដំណំ ចំណែកបុរសផ្សេងម្នាក់ទៀតរងរបួសធ្ងន់ ។
ជនរងគ្រោះដែលស្លាប់នៅនឹងកន្លែងមានឈ្មោះ សុខ ភារ័ក អាយុ៣៥ឆ្នាំ ជាកម្មកររោងចក្រ ស្នាក់នៅភូមិអូរឌឹម សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅភូមិតាសក់ ឃុំកំពង់អំពិល ស្រុករំដួលខេត្តស្វាយរៀង ។ ចំណែកស្ត្រីជាប្រពន្ធឈ្មោះ សុខ ហីម អាយុ២៨ឆ្នាំ ជាកម្មការនីរោងចក្រ ស្នាក់នៅជាមួយគ្នា មានស្រុកកំណើតនៅភូមិចំរះ ឃុំគោកចក ស្រុកកំពង់ត្របែក ខេត្តព្រៃវែង ។ ចំណែកបុរសម្នាក់ទៀតដែលរងរបួសធ្ងន់មានឈ្មោះ យ៉ាន យ៉ា អាយុ៣៥ឆ្នាំ ជាកម្មករ ស្នាក់នៅឃុំព្រែករការ ស្រុកអង្គស្នួល ខេត្តកណ្តាល ។
ប្រភពព័ត៌មានបានប្រាប់ថា មុនកើតហេតុប្តីប្រពន្ធខាងលើជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៥ ពណ៌ខ្មៅ ជិះម៉ូតូឌុបគ្នាក្នុងទិសដៅពីលិចទៅកើត ខណៈមកដល់ចំណុចខាងលើស្រាប់ តែមានរថយន្តបង្កពណ៌ទឹកប្រាក់ ពាក់ស្លាកលេខភ្នំពេញ 2P-5691 បើកបរបញ្ច្រាស់ទិសគ្នា បានបុកចំពីមុខពេញទំហឹង បណ្តាលឱ្យម៉ូតូនិងស្ត្រីជាប្រពន្ធអង្គុយខាងក្រោយខ្ទាតចេញទៅម្ខាងរងរបួសយ៉ាងដំណំ ចំណែកប្តីជាអ្នកបើកម៉ូតូបុកអូសជាប់រថយន្តប្រមាណមួយគីឡូម៉ែត្រទើបខ្ទាតចេញពីរថយន្តបែកក្បាលស្លាប់នៅនឹងកន្លែងតែម្តង ។
ប្រភពដដែលបានប្រាប់ទៀតថា ក្រោយពីរបូតមនុស្សចេញពីរថយន្តហើយរថយន្តបង្កនៅតែព្យាយាមបើករត់ទៅមុខទៀតរហូតទៅបុកបុរសម្នាក់ទៀតដែលកំពុងជិះម៉ូតូម៉ាកស្មាស ពណ៌ខ្មៅ បានបុកពីក្រោយបណ្តាលឱ្យរងរបួសធ្ងន់ ម៉ូតូខ្ទេចមួយកំណាត់ខាងក្រោយ ហើយរថយន្តបង្កនៅតែព្យាយាមបើករត់រហូតដល់មុខផ្សារជម្ពូវ័ន្តទើបអ្នកបើករថយន្តចុះពីលើរថយន្តរត់គេចខ្លួនបាត់ធ្វើឲ្យអ្នកឃើញហេតុការណ៍បាននាំគ្នាបញ្ចេញកំហឹងទៅលើរថយន្តបង្កខូចខាតស្ទើរទាំងស្រុង ។
ក្រោយកើតហេតុសពបានប្រគល់ឱ្យបងប្អូនយកទៅធ្វើបុណ្យនៅស្រុកកំណើត ដោយឡែករថយន្តបង្ក និងម៉ូតូចំនួន២គ្រឿងត្រូវបានការិយាល័យចរាចរណ៍ជើងគោកចុះវាស់វែង និងយកទៅរក្សាទុករងចាំម្ចាស់ចូលខ្លួនដោះស្រាយពេលក្រោយ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]