ភ្នំពេញ៖ កាលពីប៉ុន្មានម៉ោងមុននេះ នៅលើគណនីហ្វេសប៊ុកផ្ទាល់ខ្លួនរបស់ អតីតតារាចម្រៀង លោក ឃុំ ប៉ុណ្ណាដែត ដែលត្រូវជាស្វាមីរបស់អ្នកនាង យក់ ថិតរដ្ឋា បានបង្ហោះរូបភាពបង្ហាញពីលិខិតសុំលាឈប់មួយច្បាប់ របស់អ្នកនាង យក់ ថិតរដ្ឋា ដែលបានផ្ញើទៅកាន់ លោកអគ្គនាយក នៃផលិតកម្ម រស្មីហង្សមាស ជាមួយនឹងសារមួយ ដែលមានអត្ថន័យថា៖
«អារម្មណ៏មួយដ៏សែនពិបាក អរគុណចំពោះក្រុមការងារ ដូចជា លោកគ្រូភ្លេង អ្នកនិពន្ធ ទំនុកច្រៀង អ្នកដឹកនាំសំដែង ក្រុមបច្ចេកទេស និង ថ្នាក់ដឹកនាំទាំងអស់ របស់ផលិតកម្ម ហង្សមាស ដែលបានយកចិត្តជួយជ្រោមជ្រែងដល់ ភរិយាខ្ញុំបាទ ( អ្នកនាង យក់ ថិតរដ្ឋា ) ក្នុងរយៈពេលជិត ៥ ឆ្នាំភរិយាខ្ញុំពិតជាបានទទួលនូវបទពិសោធន៏ល្អៗ និងអនុស្សាវរីយ៏ល្អៗជាច្រើនដែលមិនអាចបំភ្លេចបាន ។
ការស្នើសុំលាឈប់នេះ គឺដោយសារមានធុរៈផ្ទាល់ខ្លួនដើម្បីបំពេញ ហើយការចាកចេញមួយនេះយើងខ្ញុំសង្ឃឹមថា រវាងយើងខ្ញុំ និងក្រុមការងារទាំងអស់ ជាពិសេសគឺថ្នាក់ដឹកនាំសំខាន់ៗ គឺពួកយើងនៅតែរាប់អាន និងជួយយកអាសារគ្នា ក្នុងនាមជាខ្មែរដូចគ្នា ក៏សង្ឃឹមថាថ្ងៃណាមួយយើងនឹងអាចរួមការងារជាមួយគ្នាបន្តទៀត ទោះជាក្នុងរូបភាពណាក៏ដោយ មួយវិញទៀតក្នុងនាមខ្ញុំជាស្វាមី អ្នកនាង យក់ ថិតរដ្ឋា សូមមេត្តាអភ័យទោសរាល់ពាក្យពេចន៍ទាំងឡាយ បើមានការលើសលោះ ដោយប្រការណាមួយ ។ ជាចុងក្រោយសូមជូនពរ ដល់បងប្អូនទាំងអស់ និង ក្រុមហ៊ុន ហង្សមាស មានសុខភាពល្អ អរគុណ ។ ឃុំ ប៉ុណ្ណាដែត»។
យ៉ាងណាមិញ ទាក់ទងទៅនឹងការសម្រេចចិត្តដើរចេញពីផលិតកម្ម របស់អ្នកនាង យក់ ថិតរដ្ឋានេះផងដែរ បានធ្វើឲ្យអ្នកគាំទ្រជាច្រើនជឿជាក់ថា មូលហេតុដែលនាងសម្រេចចិត្តលាឈប់នេះ គឺដោយសារតែ អ្នកនាងមានការអាក់អន់ស្រពន់ជាខ្លាំងចិត្តជាមួយនឹងក្រុមហ៊ុន ដែលមិនបានផ្តល់ភាពសំខាន់ និងការយកចិត្តទុកដាក់មកលើរូបនាង ទាំងដែលនាងក៏ជាតារាចម្រៀងជើងចាស់ មានប្រជាប្រិយមួយរូប និងបានឈរជើងនៅក្រោមទ្រនំផលិតកម្ម ហង្សមាសនេះ អស់រយៈពេលជាង៥ឆ្នាំមកហើយដែរ ប៉ុន្តែហាក់បីដូចជា មិនមានផ្លែផ្កាឬទទួលបានការយកចិត្តទុកដាក់ណាមួយពីក្រុមហ៊ុន ដូចអ្វីដែលនាងធ្លាប់បានរៀបរាប់នៅលើបណ្តាញសង្គមកន្លងមកនេះ៕
កំណត់ហេតុខ្មែរឡូត៖
ដោយឡែក រំលឹកព័ត៌មានចាស់លើកមុនផងដែរថា អ្នកនាងយក់ ថិតរដ្ឋា និងកញ្ញាសុន ស្រីពេជ្រ ក៏ធ្លាប់បានព្រមានដើរចេញពីផលិតកម្មហង្សមាសផងដែរ ដោយសារផលិតកម្មនេះ បាននាំចូលតារាចម្រៀង ថ្មីៗជាច្រើន ធ្វើឱ្យតារាចម្រៀងចាស់ៗមួយចំនួនហាក់កប់បាត់ ។
ការប្រកាសរបស់តារាចម្រៀងស្រីទាំងពីរនាក់នោះធ្វើឱ្យមានការចាប់អារម្មណ៍ពីមជ្ឈដ្ឋានអ្នកតាមដានសិល្បៈចម្រៀង ខណៈប្រិយមិត្តគាំតារាចម្រៀងទាំងពីរក៏សម្តែងការមិនពេញចិត្តដែរចំពោះផលិតកម្មហង្សមាស ដែលហាក់មិនសូវអើពើនឹងតារាចម្រៀងចាស់ៗ ។
នៅលើហ្វេសប៊ុក របស់តារាចម្រៀងកញ្ញា សុន ស្រីពេជ្រ កាលពីពេលកន្លងមកនេះនាងបានសរសេរបង្ហោះថា «ជម្រើសល្អគឺចាកចេញគេមានមនុស្សច្រើនហើយអីុចឹងយើងគួរចេញទៅចាប់យកទ្រនំថ្មីដែលផ្តល់ក្តីសង្ឃឹមថ្មីសម្រាប់យើងទាន់មានឱកាស» ។
បន្ទាប់ពីសាររបស់កញ្ញាសុន ស្រីពេជ្របង្ហោះបានប៉ុន្មានម៉ោង ស្រាប់តែលុបចេញវិញ ប៉ុន្តែតាមរយៈសារនោះគឺជាហេតុផលមួយដែលសមស្របទៅនឹងអ្វីដែលនាងធ្លាប់បានបញ្ជាក់ពីពេលកន្លងមក ។
កញ្ញាសុន ស្រីពេជ្រ ធ្លាប់អះអាងថា នាងអាចនឹងផ្លាស់ចេញពីផលិតកម្មហង្សមាស បន្ទាប់ពីផលិតកម្មមួយនេះហាក់មិនចេញបទ ថ្មីៗឱ្យនាងច្រៀង បូករួមទាំងមិនបានចូលរួមច្រៀងតាមឆាកប្រគំតន្ត្រី ធំៗផងដែរ ។ បច្ចុប្បន្នផលិតកម្មបានសម្រិតសម្រាំងតែបទសម័យថ្មី ដូច្នេះវាគឺជាមូលហេតុដែលនាងគ្មានបទច្រៀង ហើយអ្នកចម្រៀងដែលអាចច្រៀងបទពីសម័យដើមក៏ត្រូវបានកាត់បន្ថយ ។
សុន ស្រីពេជ្រ នៅមិនទាន់ទម្លាយឱ្យដឹងទេថា នាងនឹងផ្លាស់ទៅកាន់ផលិតកម្មថ្មីណាមួយនោះ ក្នុងពេលដែលជំហរនៃការចាកចេញពីផលិតកម្មហង្សមាសនៅមិនទាន់ប្រាកដនៅឡើយ ។
ដោយឡែកសម្រាប់តារាចម្រៀងជើងចាស់អ្នកនាងយក់ ថិតរដ្ឋា ក៏ត្អូញត្អែរអំពីរឿងបែបនោះដែរ ហើយនាងព្រមាននឹងចាកចេញពីផលិតកម្មហង្សមាសដូចគ្នា ។
អ្នកនាងយក់ ថិតរដ្ឋា សរសេរសារបង្ហោះតាមហ្វេសប៊ុកខ្លីថា «បើគិតថាខ្ញុំមិនមានអ្វីសំខាន់ សម្រាប់អ្នកទៅហើយ! សុំតែអ្នកនិយាយប្រាប់ខ្ញុំតែមួយម៉ាត់បានហើយថា មិនត្រូវការខ្ញុំទៀត! សោះនឹងខ្ញុំរង់ចាំលទ្ធផលចុងក្រោយទាំងអស់សង្ឃឹម !» ។
សារដ៏ខ្លីមួយនេះត្រូវប្រិយមិត្តគាំទ្រអ្នកនាង យក់ ថិតរដ្ឋា យល់យ៉ាងច្បាស់ថា នាងសរសេរសំដៅទៅលើផលិតកម្មហង្សមាសក្នុងពេលដែលតារាចម្រៀងរូបនេះមិនសូវមានបទច្រៀងច្រើន និងឱកាសបង្ហាញមុខតាមឆាកតន្ត្រីដែលរៀបចំដោយផលិតកម្មមួយនេះក៏ស្ទើរតែគ្មានរូបនាងដែរ ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]