ហម ឆរ៉ា​ និង គូស្នេហ៍ ចន ច័ន្ទលក្ខិណា ផ្តល់កម្លាំងចិត្ត ដល់ វ៉ន វីវ៉ា ដែលខំបើកឡានតាក់ស៊ី ដើម្បីគ្រួសារ

ភ្នំពេញ៖ ចាប់តាំងពី អ្នកប្រដាល់ល្បីឈ្មោះនៃប្រទេសកម្ពុជា និងជាម្ចាស់ខ្សែក្រវ៉ាត់ ពិភពលោក ISKA លោក វ៉ន វីវ៉ា បានចាប់អាជីពមួយទៀត ជាអ្នកបើកឡានតាក់ស៊ីរួចមក បានធ្វើឲ្យមហាជន ចាប់អារម្មណ៍យ៉ាងខ្លាំង និងថែមទាំងនាំគ្នាជួយជិះតាក់ស៊ី របស់លោកទៀតផង។

ជាការពិត ទោះបីជាការងារនេះ វាពិតជាមិនសាកសមក្នុងនាម លោក វ៉ន វីវ៉ា ជាកំពូលអ្នកប្រដាល់ក៏ដោយ ក៏នេះជាការងារ ត្រឹមត្រូវមួយ ដែលអាចជួយរកថវិកាបន្ថែម ក្នុងការផ្គត់ផ្គង់ក្រុមគ្រួសាររបស់គាត់ផងដែរ។

ក្រោយពី ដំណឹងលេចឮថា លោកវ៉ន វីវ៉ា បានបើកឡានតាក់ស៊ី ក៏មានមហាជន រួមទាំង តារាសិល្បៈ ដូចជា តារាសម្តែងជើងចាស់ លោក ហម ឆរ៉ា និង គូស្នេហ៍របស់អ្នកនាង ចន ច័ន្ទលក្ខិណា ក៏បានឡើងជិះឡានតាក់ស៊ីរបស់ លោក វ៉ន វីវ៉ា ផងដែរ ដែលនេះជាការផ្តល់កម្លាំងចិត្ត និងគាំទ្រ ទៅកាន់រូបលោក ដើម្បីឲ្យខិតខំតស៊ូ  និងអត់ធ្មត់ក្នុងអាជីពមួយនេះ៕ 

កំណត់ហេតុខ្មែរឡូត៖

ដោយឡែក រំលឹកព័ត៌មានចាស់លើកមុនផងដែរថា ប្រពន្ធរបស់លោក វ៉ន វីវ៉ា បង្ហាញ ពីអារម្មណ៍ពិតរបស់នាង ពេលឃើញស្វាមី បើកឡានតាក់ស៊ី។

អ្នកប្រដាល់ល្បីឈ្មោះម្នាក់នៃប្រទេសកម្ពុជា និងជាម្ចាស់ខ្សែក្រវ៉ាត់ពិភពលោក ISKA លោក វ៉ន វីវ៉ា ស្រវ៉ាទៅចាប់អាជីពមួយទៀតដែលគ្រប់គ្នាសឹងមិនជឿភ្នែក គឺជាអ្នកបើកឡានតាក់ស៊ីម្នាក់។ តើមានមូលហេតុអ្វីខ្លះទើបធ្វើអោយ អ្នកប្រដាល់ល្បីឈ្មោះរូបនេះសំរេចចិត្តទៅធ្វើជាអ្នកបើកឡានតាក់ស៊ីទៅវិញ?

ជុំវិញបញ្ហាដែលលោកវ៉ន វីវ៉ាដាក់ចិត្តដាក់កាយទៅធ្វើជា អ្នកបើកឡានតាក់ស៊ីនេះ បើតាមការអោយដឹងពីអ្នកនាង ស៊ន ដាវីន ដែលជាភរិយារបស់លោកបានអោយដឹងថា អ្នកនាងដំបូងឡើយពិតជាតូចចិត្តខ្លាំងណាស់ ពេលលឺលោកវ៉ន វីវ៉ា ប្រាប់ថាទៅធ្វើជាអ្នកបើកឡានតាក់ស៊ីនេះ ព្រោះវាមិនសាកសម នឹងកេរ្ដិ៍ឈ្មោះរបស់លោក។យ៉ាងណាមិញអ្នកនាងស៊ន ដាវីន ក៏បានចោទជាសំនួរសួរទៅលោកវ៉ន វីវ៉ា ដែរថាការងារច្រើនណាស់គេហៅទៅធ្វើ ហេតុអ្វីមិនធ្វើ បែរជាទៅធ្វើជាអ្នកបើកតាក់ស៊ីនេះទៅវិញ?

ប៉ុន្តែចំលើយរបស់លោកវ៉ន វីវ៉ាបានឆ្លើយតបទៅ ភរិយាវិញធើ្វអោយអ្នកនាង ស៊ន ដាវី កើតចិត្តអាណិតប្តីជាពន់ពេក ដោយលោកបានឆ្លើយថា ការងារអ្វីមិនសំខាន់ សំខាន់គ្មានអ្នកជេរស្តី មានពេលវេលាច្រើន និងមានសេរីភាព ហើយអ្វីដែលសំខាន់នោះគឺដើម្បីកូន។ ខាងក្រោមជាសារដែលអ្នកស៊ន ដាវីន រៀបរាប់អាណិតប្តី៖

«ពេលគាត់ប្រាប់ខ្ញុំថាគាត់ និងធ្វើការងារមួយនិង ខ្ញុំតូចចិត្តអាណិតគាត់ណាស់ ខ្ញុំសួរគាត់ថាការងារច្រើនណាស់ដែលគេហៅធ្វើ ហេតុអីមិនធ្វើ ខ្ញុំគិតការងារនិងមិនសមនិងគាត់ទេ ព្រោះគាត់ជាមនុស្សល្បីម្នាក់ដែរ តែគាត់និយាយថាសំខាន់មិនមានអ្នកណាជេស្ដី ទំនេរច្រើន ហើយមានសេរីភាពទៀត (សំខាន់ដើម្បីកូន) អរគុណណាស់លោកប្ដី»

• ហម ឈរ៉ា
• គ្រួសារ
• ការងារ
• ជីវិត