(ភ្នំពេញ)៖ តារាចម្រៀងប្រុស ប្រចាំផលិតកម្មភ្លេងរីខដ ទើបតែលើកពាន «I am A Singer Cambodia» លោក ដួង វីរៈសិទ្ធ ដែលមហាជនជាច្រើន បានសាទរជាខ្លាំងជាមួយរូបលោក ដោយថ្មីៗនេះ ត្រូវបានប្រភពព័ត៌មាន ទម្លាយចេញពីអ្នកធ្វើការងារ ក្នុងចង្កើមសិល្បៈដូចជាថា តម្លៃខ្លួនរបស់ តារាចម្រៀង បែបយុវវ័យ ដួង វីរៈសិទ្ធ ចាប់ផ្ដើមហក់ឡើង គួរឲ្យកត់សម្គាល់ ខុសប្លែកពីពេលមុន ដែលនេះជាទម្លាប់មួយទៅហើយ សម្រាប់សិល្បករ-សិល្បការិនីដែលមានឈ្មោះល្បី និងមានការគាំទ្រច្រើន។
លោក ដួង វីរៈសិទ្ធ បានក្លាយជាតារាចម្រៀង មានអ្នកគាំទ្រច្រើនជាងគេ ក្នុងផលិតកម្ម ភ្លេងរីខដ ហើយក៏មិនចាញ់ តារាចម្រៀងរៀមច្បង ក្នុងផលិតកម្មហង្សមាសដែរ។ ការលើកពានរបស់លោក ក៏ធ្វើឲ្យតារាចម្រៀងរៀមច្បង ក្នុងផលិតកម្មអន់ចង់ មិនតិចទេ ព្រោះលោកមានវ័យក្មេង សំឡេងមិនខ្ពស់ខ្លាំង តែលោកច្រៀងបានពីរោះ និង មានអ្នកគាំទ្រច្រើនមិនធម្មតា រហូតតារាចម្រៀង ហ្សូណូ ក៏បាក់មុខមិនតិចទេ ក្រោយពីធ្លាក់ពីកម្មវិធី ម្ដងជាពីរដង។
តារាចម្រៀង ដួង វីរៈសិទ្ធ មុនពេលចូលរួម ប្រកួតក្នុងកម្មវិធី «I am A Singer Cambodia» តម្លៃខ្លួនលោកច្រៀង សម្រាប់កម្មវិធីមង្គលផ្សេងៗ ត្រឹមតែ៥០០ដុល្លារប៉ុណ្ណោះ សម្រាប់ការប្រគំតន្រ្តី តាមបណ្ដាខេត្ត ពី៥០០ទៅ៧៥០ដុល្លារ តាមកម្មវិធីនីមួយៗ ដែលធំ ឬក៏តូច។ សម្រាប់ការឡើងច្រៀង តាមបណ្ដាលស្ថានីយទូរទស្សន៍ផ្សេងៗ គឺពី១០០ទៅ១៥០ដុល្លារ ព្រោះការឡើងច្រៀងតាមទូរទស្សន៍ មិនបានតម្លៃខ្លួនខ្ពស់ឡើយ ។
ក្រោយពីបានលើកពាន ក្នុងកម្មវិធី «I am A Singer Cambodia» មកភ្លាម តម្លៃខ្លួន លោក ដួង វីរៈសិទ្ធ បានឡើងក្រឺតៗស្ទើរមិនគួរឲ្យជឿ តែម្ដង។ ប្រភពពីអ្នកអញ្ជើញតារាឡើង ទូរទស្សន៍របស់ស្ថានីយមួយ បាននិយាយប្រាប់ Khmertalking ដួង វីរៈសិទ្ធ បានឡើងថ្លៃខ្លួន ខ្ពស់ជាងមុនបន្តិច តែមិនមែនខ្ពស់ រហូតមិនអាចទទួលយកបានទេ ពោលគឺសមស្របតាមអ្វី ដែលស័ក្តិសមនឹងកេរ្តិ៍ឈ្មោះ នាពេលបច្ចុប្បន្ន។
ចំណែកឯក្រុមហ៊ុន P enter ជាក្រុមហ៊ុនរៀបចំ កម្មវិធីកំសាន្ត និងប្រគំតន្ត្រី តែងតែហៅ ដួង វីរៈសិទ្ធ ច្រៀងញឹកញាប់ជាងគេ បាននិយាយថា វីរៈសិទ្ធ តម្លៃខ្លួនពេលនេះ គឺ៨០០ដុល្លារ ក្នុងមួយកម្មវិធីពេលល្ងាច ច្រៀងពីម៉ោង៥ ទៅដល់ម៉ោង១០យប់។ តំណាងក្រុមហ៊ុនបានបន្តថា កាលពីមុនជាប់ ក្នុងកម្មវិធី «I am A Singer Cambodia» លោក ដួង វីរៈសិទ្ធ យកតម្លៃត្រឹមតែ៥០០ប៉ុណ្ណោះ តែពេលនេះខុសគ្នា។
តំណាងក្រុងហ៊ុនខាងលើបន្តថា តារាចម្រៀង ដួង វីរៈសិទ្ធ ច្រៀងកម្មវិធីពេលល្ងាចឲ្យ ក្រុមហ៊ុននេះ ញឹកញាប់ជាងគេ ក្រៅពីនេះមិនសូវមានទេ ប៉ុន្តែដួង វីរៈសិទ្ធ ជាតារាចម្រៀងមានអត្តចរឹតល្អ ស្លូតបូត ងាយស្រួលធ្វើការងារជាមួយគ្នា ហើយលោកច្រៀងបានច្រើនបទ ច្រើនទំរង់ ធ្វើឲ្យម្ចាស់កម្មវិធីសប្បាយចិត្ត ពិសេសអ្នកអញ្ជើញលោក ឲ្យចូលរួមភាគច្រើនជាអ្នកគាំទ្រ លោកផ្ទាល់តែម្ដង ៕
ប្រភព៖ Khmertalking
កំណត់ត្រាខ្មែរឡូត៖
គួររំលឹកថា ទីបំផុត កម្មវិធី «I Am a singer Cambodia» បានរកឃើញម្ចាស់ពានហើយ គឺលោក ដួង វីរៈសិទ្ធ ដែលជាតារាចម្រៀងប្រចាំក្នុងផលិតកម្ម ភ្លេងរីខដ បានជាប់ជាជ័យលាភី ក្នុងរដូវកាលនេះ ខណៈកម្មវិធីមានរយៈពេល១៣សប្ដាហ៍ ហើយមាន៦ជុំ និងមានវិញ្ញាសារចម្រៀងជាច្រើនដូចជា បទចម្រៀងផ្ទាល់ខ្លួន បទចម្រៀងញាក់ បទចម្រៀងស្រី តែអ្នកចម្រៀងប្រុសចច្រៀង បទចម្រៀងយីកេ ល្ខោនបាសាក់ និងវិញ្ញសារចុងក្រោយ គឺច្រៀងជាមួយតារាចម្រៀង អាជីពផ្ទាល់តែម្ដង។
នៅវគ្គចុងក្រោយ លោក ដួង វិរៈសិទ្ធ បានប៉ះជាមួយ លោក ឯក ស៊ីដេ តារាចម្រៀងសំឡេងផ្អែមពីរោះ បែបគ្រលួច ហើយអ្នកទាំងពីរច្រៀងបានល្អឥតខ្ចោះ ក្នុងបទចម្រៀង «ស្នេហ៍ស្រីង៉កង» ដែលបទចម្រៀងដ៏ល្បីល្បាញ កាលពីលោក ឯក ស៊ីដេ បានចូលសិល្បៈដំបូងៗ។ លោក ដួង វីរៈសិទ្ធ មានគ្រូភ្លេង តាមបង្ហាត់បង្ហាញតែម្នាក់គត់ គឺលោក ម៉ម មិថុនា ដែលបានបង្រៀនលោក តាំងពីវគ្គដំបូងៗ រហូតដល់សប្ដាហ៍ចុងក្រោយ ហើយមានទាំងបង្ហាត់ឲ្យលោក វិរៈសិទ្ធ ចេះផ្លុំខ្លុយ ថែមទៀតផង។
លោក ដួង វីរៈសិទ្ធ បាននិយាយថា «ការកាន់ពាន ជាអ្វីដែលលោកមិនធ្លាប់ស្រមៃ ទាល់តែសោះ ពិសេសក្នុងកម្មវិធីនេះ ផ្ទាល់តែម្ដង ព្រោះ តារាចម្រៀងក្នុងកម្មវិធី មានសមត្ថភាពគួរឲ្យញាក់សាច់ណាស់ ដូចជា លោក ហ្សូណូ, កញ្ញា សួស វីហ្សា, កញ្ញាផន ស្រីខួច ជាដើម សុទ្ធតែមានដើមទុននៃសំឡេងដ៏អស្ចារ្យ ពិសេសពួកគាត់ ប្រឡូកសិល្បៈយូរមកហើយ»។
តារាចម្រៀង ដួង វិរៈសិទ្ធ បានថ្លែងបន្តថា «លោកគិតថា ចូលរួមកម្មវិធីគ្រាន់តែកំដរគេប៉ុណ្ណឹង ហើយខ្លាចតែមិនដល់ជុំ ចុងក្រោយផងក៏មិនដឹង តែមកពីអ្នកគាំទ្រលោក ទើបមានថ្ងៃនេះ ព្រោះកម្មវិធីត្រូវឲ្យបោះឆ្នោត តាមប្រព័ន្ធទូរស័ព្ទ ហើយលោកជាតារា ដែលមានអ្នកបោះឆ្នោតឲ្យច្រើន ស្ទើរតែរាល់សប្ដាហ៍ !»។
លោក ដួង វីរៈសិទ្ធ ថ្វីត្បិតតែមានពាន ក្នុងដៃ និងទទួលបានប្រាក់លើកទឹកចិត្តច្រើនក៏ពិតមែន ក៏គេមិនអាចដឹងថា លោកនឹងមានបទចម្រៀងច្រៀងច្រើនទៀត ឬយ៉ាងណាទេ ទោះបីលោកស្ថិតក្នុងផលិតកម្ម រស្មីហង្សមាស ហើយក៏ដោយ ។ លោក ដួង វីរៈសិទ្ធ ក៏ត្រូវបានមហាជនមួយចំនួន មិនសូវពេញចិត្ត ដោយសារតែហ្វេនលោកច្រើន ទើបជាប់ តែនេះជាលក្ខខ័ណ្ឌ នៃកម្មវិធីតម្រូវ ទើបលោកជាប់បានបានយ៉ាងងាយស្រួល។ បើសិនជាមានគណៈមេប្រយោគ លោកក៏មិនអាចកាន់ពានបានដែរ។ តែផ្ទុយពីនេះវិញ អ្នកគាំទ្របាននិយាយ លោក ដួង វិរៈសិទ្ធ ពិតជាមនុស្សមានសមត្ថភាព ខាងតន្ត្រីយ៉ាងពិតប្រាកដ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
