ដើម្បីលុយ សុវណ្ណ មករា ខំប្រឹងធ្វើការទាំងព្យួរសេរ៉ូម

ភ្នំពេញ៖ អតីតតារាសម្ដែង ដែលពោរពេញដោយទេពកោសល្យលោក សុវណ្ណ មករា ត្រូវបានគេស្គាល់ថាជាតារាមួយរូប ដែលមានមុខជំនួញក្នុងដៃច្រើនមិនធម្មតាទេ។

តួយ៉ាងទោះបីជាបច្ចុប្បន្នលោក ហាក់មិនសូវបង្ហាញមុខក្នុងកម្មវិធីនានា តែចំពោះការងារប្រចាំរបស់ប៉ាៗវ័យក្មេងនេះវិញ គឺមានច្រើនខ្លាំង រហូតសឹងរកពេលសម្រាកគ្មានផង។

ជាក់ស្ដែង កាលពីយប់មិញនេះដែរ អតីតស្វាមីអ្នកនាង ឈិន សុធារី រូបនេះ បានទម្លាយ​រូបភាពដែលលោកកំពុងធ្វើការ ទាំងដៃកំពុងព្យួរសេរ៉ូម លើគណនីហ្វេសប៊ុកផ្លូវការរបស់លោក អមនឹងសារដ៏កម្សត់មួយថា៖ 

«អស់នឹងគេអង្គុយផឹកមើលបាល់ទាត់ ចំណែកខ្ញុំវិញអង្គុយដែរ តែអង្គុយព្យួរសេរ៉ូមធ្វើការងារទៅវិញ សង្ឃឹមថាអ្នកយល់អារម្មណ៍របស់ខ្ញុំពេលនេះ ហើយយើងខំប្រឹងដើរទៅមុខទាំងអស់គ្នា» ។

សារនិងរូបភាពនេះ បានធ្វើឲ្យប្រិយមិត្តជាច្រើនមានការកោតសរសើរ ពីភាពតស៊ូព្យាយាមរបស់លោកជាខ្លាំង ព្រោះតែមិននឹកស្មានថាតារារូបនេះស្រលាញ់ការងារខ្លាំង ដល់ថ្នាក់មិនហ៊ានសម្រាក សូម្បីតែខ្លួនកំពុងមានសុខភាពមិនល្អក៏ដោយ ។ យ៉ាងណាមិញ គ្រាន់តែឃើញរូបភាពទាំងនេះហើយភ្លាម ក៏មានអ្នកគាំទ្របាននាំគ្នាផ្ញើសារជូនពរឲ្យលោកឆាប់ជាសះស្បើយផងដែរ៕

• សុវណ្ណ មករា
• តារាខ្មែរ