ភ្នំពេញ៖ មានការភ្ញាក់ផ្អើលយ៉ាងខ្លាំង បន្ទាប់ពីតារាចម្រៀង និងជាម្ចាស់ផលិតកម្ម Galaxy បានប្រកាសបើកជំនួញវ៉ាល់លានដុល្លារ ក្នុងគម្រោងសង់បុរីវីឡាកូនកាន់រាប់រយល្វែងដាក់លក់ កាលពីថ្ងៃទី១៨ តុលា។ តែអ្វីដែលគេចាប់អារម្មណ៍គឺលោកប្រកាសជូនកាកបាទក្រហមកម្ពុជាចំនួន ១០០លានរៀល និងប្រគល់ជូនមន្ទីរពេទ្យគន្ធបុប្ផាចំនួន ៥០លានរៀល ដើម្បីធ្វើជាកាដូក្នុងពិធីប្រកាសបើកនូវផ្ទះគំរូរបស់លោកដែលជំនួញទ្រង់ទ្រាយធំ។
លោកឡេង ណាវ៉ាត់ត្រា បានថ្លែងបញ្ជាក់ក្នុងពិធីបើកសម្ពោធផ្ទះគំរូរបស់វីឡាកូនកាត់ឡេងណាវ៉ាត់ត្រា ស្ថិតនៅខាងក្រោយផ្សារកាណាស៊ីធីផ្លូវវេងស្រេងថា បើទោះជាលោកមានសំណាងបានក្លាយជាម្ចាស់សំណង់បុរីដែលមានដើមទុនរហូតដល់រាប់លានដុល្លារ និងមានការរវល់ជាងមុនលើមុខជំនួញ ក៏លោកនៅតែប្រកាន់ជំហររឿង និងផលិតបទចម្រៀងជាពិសេសគឺ Original Song ធ្វើអោយផលិតកម្ម Galaxy របស់លោកបន្តសកម្មភាពនៅក្នុងសិល្បៈនោះដែរ ដោយសារតែនោះគឺជាមុខជំនួញដែលលោកចូលចិត្តតាំងពីពេលដែលលោកនៅធ្វើជាពលករនៅក្នុងប្រទេសកូរ៉េ។ លោកនិយាយថាលោកនឹងរកអ្នកមានសមត្ថភាពអោយដឹកនាំផលិតកម្មរបស់លោកក្នុងពេលដែលលោកមមាញឹកនឹងមុខជំនួញបើកលក់ដីឡូតិ៍ និងសង់វីឡាកូនកាត់ដាក់លក់នៅក្នុងពេលនេះ ដោយមិនអោយផលិតកម្មមិនមានសកម្មភាព ហើយស្ងាត់មិនមានស្នាដៃថ្មីៗនោះទេ។ មកទល់ពេលនេះលោកថាផលិតកម្ម Galaxy បានផលិតបទចម្រៀងជាច្រើនដោយមានទាំងបទប្រភេទចម្លងសាច់ភ្លេងពីជំនាន់ដើម និងបទ Original Song ផង ដោយក្នុងនោះក៏មានភាពយន្តមួយរឿងក្រោមចំណងជើងថា«កំពូលល្ងង់នៅអាស៊ី»វាយលុកទីផ្សារផងដែរ។ លោកមានគម្រោងផលិតរឿង និងបទចម្រៀងល្អបន្ថែមទៀត បើទោះជាការផលិតភាពយន្ត និងផលិតចម្រៀងកន្លងមក មិនអាចអោយលោកទទួលផលចំណេញណាមួយ។ លោកថាសិល្បៈគឺលោកស្រឡាញ់ ហើយលោកក៏មិនខ្វល់ពីការចំណាយនោះដែរ សំខាន់អោយលោកតែអាចផលិតរឿង និងបទចម្រៀងដែលមានគុណភាពដូចដែលមហាជនធ្លាប់បានទទួលស្គាល់គឺលោកអស់ចិត្តហើយ។
នៅក្នុងពិធីសម្ពោធលក់វីឡាកូនកាត់ចំនួនជាង២០០ ល្វែងស្ថិតនៅខាងក្រោយផ្សារកាណាស៊ីធី ផ្លូវវ៉េងស្រេងនោះ លោកក៏បានប្រកាសបរិច្ចាគចំនួន ១០០លានរៀលជូនដល់កាកបាទក្រហមកម្ពុជា និង៥០លានរៀលបន្ថែមទៀត ប្រគល់ជូនដល់មន្ទីរពេទ្យគន្ធបុប្ផាផងដែរ ដោយលោកនឹងពាំនាំទឹកប្រាក់ទាំំងនេះយកទៅប្រគល់ជូនក្នុងពេលខាងមុខ។ ក្នុងនោះលោក ក៏បានប្រកាសថាក្នុងចំណោមវីឡាកូនកាត់របស់លោកចំនួនជាង ១០០ល្វែង ដែលជាគម្រោងធំក៏នឹង ប្រកាសបញ្ចុះតម្លៃចំនួន៥ពាន់ដុល្លារភ្លាមៗសម្រាប់អតិថិជនរយៈពេល ១០ថ្ងៃ ក្រោយពីលោកប្រកាសលក់នោះផងដែរ។ លោកថាក្នុងចំណោមផ្ទះសរុបទាំងជាង ២០០ល្វែងបុរីរបស់លោកលក់អស់ជាង១០០ល្វែងហើយ ដោយក្រុមហ៊ុនវីឡាកូនកាត់ឡេងណាវ៉ាត់ត្រារបស់លោក នឹងបន្តបើកគម្រោងថ្មីនោះនៅក្បែរបន្ទាប់ទៀតក្នុងពេលខាងមុខ។ លោកថាខ្លួនប្រកាសលក់វីឡាកូនកាត់កម្ពស់ ២ជាន់ ត្រឹមតែតម្លៃ២៩០០ទៅជាង៣ម៉ឺនប៉ុណ្ណោះ ដើម្បីជួយសម្រួលដល់អ្នកខ្វះខាត អោយមានលទ្ធភាពមានផ្ទះរស់នៅ ខណៈដែលបុរីរបស់លោកក៏ពង្រឹងគុណភាពជាធំ បើទោះជាបានដាក់លក់ក្នុងតម្លៃធូរថ្លៃជាងគេ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]