រាជធានភ្នំពេញ ៖ បុរសម្នាក់ស្រវឹងស្រាបើករថយន្តឡិចស៊ីស LX៤៧០ សង្ស័យងោកមួយភាំង ក៏រេចង្កូតជ្រុលទៅបុករថយន្តឡិចស៊ីស RX៣៣០ ដែលចតនៅមុខផ្ទះ បណ្តាលឲ្យរងការខូចខាតទាំងសងខាង បានតារាចំរៀង លោក ទិត្យ វិច្ឆិកា ជួយសម្របសម្រួល។
ហេតុការណ៍នេះបានកើតឡើងកាលពីវេលាម៉ោង១១យប់ ថ្ងៃទី១៧ ខែតុលា ឆ្នាំ២០១៧ តាមបណ្តោយផ្លូវ២៨២ នៅចំណុចមុខផ្ទះលេខ៣៨Eo ស្ថិតនៅក្នុងសង្កាត់បឹងកេងកង១ ខណ្ឌចំការមន ។
តាមប្រភពព័ត៌មានពីសាក្សីដែលឃើញហេតុការណ៍បានឲ្យដឹងថា មុនពេលកើតហេតុ គេបានឃើញរថយន្តមួយគ្រឿងម៉ាកឡិចស៊ីស RX៣៣០ ពណ៌ស ពាក់ស្លាកលេខភ្នំពេញ ២AH-១៣២៧ ឈប់ចតនៅមុខផ្ទះក្នុងទិសដៅពីកើតទៅលិច ខណៈពេលដល់ម៉ោងកើតហេតុខាងលើ ក៏ស្រាប់តែមានបុរសម្នាក់មិនដឹងថា ទើបតែចេញមកពីផឹកស៊ីនៅទីណានោះទេ បានបើករថយន្តបង្កម៉ាកឡិចស៊ីស LX៤៧០ ពណ៌ស ពាក់ស្លាកលេខ ភ្នំពេញ ២AJ-៧២៧៨ តាមបណ្តោយផ្លូវ២៨២ ទិសដៅពីលិចទៅកើត ក្នុងល្បឿនលឿន លុះមកដល់ចំណុចកើតហេតុខាងលើ ដោយសារតែនៅម្តុំនោះមិនមានភ្លើងបំភ្លឺផ្លូវ ហើយម្ចាស់រថយន្តសង្ស័យងោកមួយភាំង បានរេចង្កូតទៅខាងស្តាំជ្រុលទៅបុករថយន្តឡិចស៊ីសដែលចតទុកចោល បណ្តាលឲ្យរងការខូចខាតបាក់កញ្ចក់មុខខាងស្តាំ និងកំពឹតទ្វារមុខខាងស្តាំ រីឯរថយន្តបង្កវិញរងការខូចខាតហើបកាងខាងស្តាំបន្តិចបន្តួច តែជជែកគ្នាជាង១ម៉ោង នៅតែមិនត្រូវគ្នា ។
ក្រោយពេលកើតហេតុ មានតារាចំរៀងគឺ លោក ទិត្យ វិច្ឆិកា ធ្វើដំណើរឆ្លងកាត់ ក៏ប្រទះឃើញរថយន្តដែលគាត់ស្គាល់ផងនោះ ក៏បានជួយសម្របសម្រួល ដោយមុនដំបូងខាងរថយន្តឡិចស៊ីស RX៣៣០ គាត់ទាមទារសំណងចំនួន៤,០០០ដុល្លារ ប៉ុន្តែសមត្ថកិច្ច និងលោក ទិត្យ វិច្ឆិកា ជួយនិយាយផងនោះ ក៏ចុះនៅសល់តែ១,២០០ដុល្លារ ហើយខាងរថយន្តឡិចស៊ីស RX៣៣០ យល់ព្រមយកសំណង១,២០០ដុល្លារ ដើម្បីបញ្ចប់រឿងនៅនឹងកន្លែងកើតហេតុ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
