បរទេស៖ សារព័ត៌មានដេលីម៉ែល បានចុះផ្សាយព្រឹកថ្ងៃទី២៣ ខែកុម្ភៈ ឆ្នាំ២០១៧នេះថា អង្គការណាសា ធ្វើការប្រកាសជាផ្លូវការ កាលពីយប់មិញថា ពួកគេបានរកឃើញភពជាច្រើននៅក្នុងប្រព័ន្ធព្រះអាទិត្យថ្មីមួយ ដែលមានសភាពដូចជាភពផែនដី និងអាចមានលទ្ធភាពឲ្យជីវិតរស់នៅបានថែមទៀតផង។

ប្រភពព័ត៌មានបានឲ្យដឹងថា ប្រព័ន្ធព្រះអាទិត្យថ្មីនេះ មានភពចំនួន ៧ ដែលមានទំហំប្រហាក់ប្រហែលនឹងភពផែនដី ធ្វើដំណើរជុំវិញតារាពណ៌ក្រហមមួយ ដែលមានឈ្មោះថា TRAPPIST-1។ វាមានចម្ងាយ ៣៩ឆ្នាំពន្លឺ ពីផែនដី ហើយនៅក្នុងភពទាំង ៧នោះ គេជឿថាយ៉ាងហោចណាស់មានភពចំនួន ៣ដែលមានលក្ខណៈដូចភពផែនដី និងអាចឲ្យជីវិតរស់នៅបាន។

ការរកឃើញថ្មីនេះ ត្រូវបានធ្វើឡើងដោយក្រុមអន្តរជាតិ ដោយប្រើប្រាស់កែវពង្រីកកម្រិតខ្ពស់ និងទំនើប ដែលបានបង្ហោះទៅក្នុងលំហអាកាស និងស្ថិតនៅទីដ៏សែនឆ្ងាយជុំវិញពិភពលោក។ 

ភពថ្មីដែលគួរឲ្យចាប់អារម្មណ៍ទាំងអស់នោះ គឺស្ថិតនៅកៀកៗនឹងគ្នា ប៉ុន្តែការនៅកៀកគ្នាបែបនេះ វាអនុញ្ញាតឲ្យអ្នកវិទ្យាសាស្ត្រអាចប្រើប្រាស់កែវពង្រីកដ៏ទំនើប Ultra-Sophisticated Telescopes និងម៉ាស៊ីនស្គែន ដើម្បីតាមដានភពទាំងអស់នោះ និងធ្វើការបញ្ជាក់ឲ្យកាន់តែច្បាស់ថានៅក្នុងភពទាំងនោះមានទឹក ហើយបរិយាកាសអាចទ្រទ្រង់ជីវិតលូតលាស់បាន។

ក្រុមតារាវិទូ បានឲ្យដឹងថា ភពទាំង ៧នោះ ត្រូវបានគេជឿជាក់ថា យ៉ាងហោចណាស់វាមានអាយុកាល ១ពាន់លានឆ្នាំ ហើយមានបឹង និងមហាសមុទ្រជាច្រើនទៀតផង។ ប៉ុន្តែមានភពចំនួន៣ នៅកៀកនឹងតារា TRAPPIST-1 ដែលអាចមានសភាពក្តៅខ្លាំង និងមិនមានទឹក ខណៈភព១ ផ្សេងទៀតហាក់នៅឆ្ងាយ និងមានសភាពត្រជាក់ខ្លាំង។

ទោះជាយ៉ាងណា នៅមានភពចំនួន ៣ ទៀតដែលស្ថិតនៅកណ្តាល គឺភព (E1 F1 និង G1) ជាភពដែលអ្នកវិទ្យាសាស្រ្តកំពុងចាប់អារម្មណ៍ខ្លាំង ព្រោះវាមិនក្ដៅ និងមិនត្រជាក់ពេកសម្រាប់ជីវិតលូតលាស់។ សីតុណ្ហភាពនៅលើផ្ទៃភព មានកម្រិតចាប់ពី សូន្យ ដល់ ១០០អង្សា ដូច្នេះទឹកនៅក្នុងភពនោះ នឹងមិនពុះ ហើយក្លាយជាចំហាយនោះទេ។

ចំពោះលក្ខណៈពិសេសផ្សេងៗរបស់ភពទាំង ៧ ដែលស្ថិតនៅក្នុងប្រព័ន្ធព្រះអាទិត្យថ្មីនេះ រួមទាំងព័ត៌មានជាក់លាក់ផ្សេងទៀត អង្គការ ណាសា គ្រោងនឹងបង្ហាញនៅឆ្នាំក្រោយនេះ ដូច្នេះយើងរង់ចាំតាមដានទាំងអស់គ្នាថា ភពទាំងនោះ ពិតជាអាចឲ្យយើងរស់នៅបានដែរ ឬក៏អត់៕ 

ប្រភព : Dailymail

ដោយឡែកព័ត៌មានគួរឲ្យចាប់អារម្មណ៍មួយទៀត៖ រុស្ស៊ីផលិតបានកង់ហោះ សម្រាប់ធ្វើដំណើរដំបូងបំផុតក្នុងលោក តែតម្លៃកប់ក្តោង

សារព័ត៌មានដេលីម៉ែល បានចុះផ្សាយកាលពីថ្ងៃទី២០ ខែកុម្ភៈ ឆ្នាំ២០១៧ ថាក្រុមហ៊ុនរបស់រុស្ស៊ីមួយ បានផលិតម៉ាស៊ីនដ៏អស្ចារ្យ ឈ្មោះ HOVERBIKE ឬ កង់ហោះ សម្រាប់ធ្វើដំណើរដំបូងបំផុត ក្នុងពិភពលោក ដែលអាចកាត់បន្ថយពេលវេលាធ្វើដំណើរជាប្រចាំថ្ងៃបានយ៉ាងច្រើន។

HOVERBIKE ឬ កង់ហោះនេះ ត្រូវបានរចនាឡើងមកជាមួយនឹងបច្ចេកវិទ្យាដ៏អស្ចារ្យ ដោយបំពាក់កៅអីអង្គុយចំនួន១ និងអាចលើកមនុស្សចំនួនម្នាក់ទៅលើអាកាសបាន ជាមួយប្រព័ន្ធគ្រប់គ្រងការហោះហើរ យ៉ាងមានសមត្ថភាព។

ប្រភពព័ត៌មានបានឲ្យដឹងថា កង់ហោះ នេះមានឈ្មោះថា Scorpion-3 វាត្រូវបានរចនាឡើងដោយរួមបញ្ចូលជាមូយបច្ចេកវិទ្យាស្តង់ដា របស់ម៉ូតូ និងការផ្គុំគ្នារវាងឧទ្ធម្ភាគចក្រដ្រូន ដែលមានស្លាបបួន។ ការរួមបញ្ចូលគ្នានូវបច្ចេកវិទ្យាទាំងនេះ អនុញ្ញាតឲ្យអ្នកបើកបរ អាចបត់បែននៅក្នុងអាកាស ដូចកំពុងតែជិះកង់អ៊ីចឹង។

អ្នកជំនាញដែលបង្កើតកង់ហោះមួយនេះ បាននិយាយថា Scorpion-3 អាចផ្ទុកទំងន់បានចំនួន ១២០គីឡូក្រាម និងអាចហោះបានក្នុងល្បឿនជិត ៥០គីឡូម៉ែត្រ ក្នុងមួយម៉ោង លើកម្ពស់ជាង១០ម៉ែត្រ។ អ្នកជំនាញបន្តថា វាអាចហោះហើរបានរយៈពេលជាង ២៧នាទី ហើយជាមួយនឹងសមត្ថភាពដ៏អស្ចារ្យបែបនេះ តម្លៃក៏មិនធម្មតាដែរ ដោយអ្នកអាចបញ្ជាទិញបានក្នុងតម្លៃប្រមាណ ១៥០.០០០ដុល្លារអាមេរិក។

គួរបញ្ជាក់ថា ល្បឿនអតិបរមារបស់ Scorpion-3 គឺត្រូវបានកំណត់ឲ្យស៊ីគ្នាជាមួយនឹងកម្ពស់ដែលវាអាចហោះបាន ដើម្បីជាយន្តការសុវត្ថិភាពបើកបរ និងស្ថិតក្នុងគោលបំណងដើម្បីបង្ការការកើតមានគ្រោះថ្នាក់ ខណៈក្រុមអ្នកផលិត មានបំណងចង់ បង្កើនសមត្ថភាពរបស់វាបន្ថែមទៀត៕ 

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ