រាជធានីភ្នំពេញ ៖ កាលពីវេលាម៉ោង៩ព្រឹកថ្ងៃទី ២០ ខែកុម្ភៈ ឆ្នាំ២០១៧ ស្ត្រីម្នាក់បានជិះម៉ូតូឌុបទៅសម្រាលកូន នៅមន្ទីរពេទ្យបង្អែកមានជ័យ ប៉ុន្តែដោយសារស្ទះចរាចរណ៍ខ្លាំងពេក ស្រាប់តែស្ត្រីរូបនោះចុះពីលើម៉ូតូឆ្លងទន្លេ បានកូនស្រីមួយនៅលើស្ពានព្រះមុនីវង្សថ្មី ត្រើយខាងកើត ស្ថិតក្នុងសង្កាត់ច្បារអំពៅទី១ ខណ្ឌច្បារអំពៅ បង្កឲ្យការភ្ញាក់ផ្អើលជាខ្លាំង ។
ស្ត្រីរូបនេះឈ្មោះ ស្រីចិន អាយុ២៩ឆ្នាំ មុខរបរមិនពិតប្រាកដ បច្ចុប្បន្នសុំផ្ទះប្រជាពលរដ្ឋស្នាក់នៅបណ្តោះអាសន្ន នៅភូមិព្រែកតានូ សង្កាត់ចាក់អង្រែលើ ខណ្ឌមានជ័យ ។
ប្រភពព័ត៌មានពីក្រុមអ្នកភូមិ ដែលរស់នៅជាមួយនាង បានឲ្យដឹងថា កាលពីវេលាព្រឹកថ្ងៃ២០ ខែកុម្ភះ នាងថ្ងូរថាឈឺពោះ ខ្លាំងណាស់ ម្យ៉ាងទៀតកូនដែលនៅក្នុងផ្ទៃរបស់នាងក៏គ្រប់ខែនឹងត្រូវកើតទៀត ។ ដោយឃើញការខ្វះខាត អ្នកស្រុកបានរៃអង្គាសលុយគ្នាម្នាក់បន្តិច ជួលម៉ូតូឌុបឲ្យឌុបនាងទៅសម្រាកកូន នៅមន្ទីរពេទ្យបង្អែកមានជ័យ ស្ថិតក្នុងសង្កាត់ច្បារអំពៅ១ ខណ្ឌច្បារអំពៅ ។
លុះធ្វើដំណើរមកដល់ លើស្ពានព្រះមុនីវង្សថ្មី ត្រើយខាងកើត ដោយសារស្ថានភាពចរាចរណ៍មានភាពណែនណាន់ តាន់តាប់ខ្លាំងពេក ស្ត្រីខាងលើក៏បានចុះពីលើម៉ូតូ ហើយសម្រាលកូន នៅលើស្ពានដោយខ្លួនឯង បង្កឲ្យមានការភ្ញាក់ផ្អើលដល់អ្នកដំណើរពាសពេញស្ពាន នាំគ្នាចោមរោមមើល ខណៈចរាចរណ៍នៅចំណុចខាងលើកំពុងមានការកកកុញស្ទះយ៉ាងខ្លាំង ។
ភ្លាមៗនោះ គេសង្កេតឃើញកម្លាំង អាជ្ញាធរមូលដ្ឋានចុះអន្តរាគមន៍ និងជួយទំនាក់ទំនងទៅកាន់រថយន្ត សាមុយរបស់មន្ទីរពេទ្យបង្អែក មានជ័យឲ្យមកជួយសង្គ្រោះផងដែរ ។ ប៉ុន្តែយ៉ាងណាក៏ដោយ មុនពេលរថយន្ត សាមុយមកដល់ ស្ត្រីរូបនេះបានប្រសូតបានកូនស្រីម្នាក់ហើយ ព្រមទាំងមានឈាមស្រោច ពេញថ្នល់លាយឡំនឹងសម្រែកស្រែកថ្ងូរគួរឲ្យអាណិតជាទីបំផុត ។
យ៉ាងណាមិញ គិតមកត្រឹមម៉ោង១រសៀល ថ្ងៃដដែលនេះ ស្ត្រីខាងលើ និងកូនស្រី កំពុងសម្រាកព្យាបាល នៅមន្ទីរពេទ្យបង្អែកមានជ័យ ដោយមានការយកចិត្តទុកដាក់ពីក្រុមគ្រូពេទ្យផងដែរ ៕
ប្រភព៖ កោះសន្តិភាព
ដោយឡែក ព័ត៌មានចាប់អារម្មណ៍មួយផ្សេងទៀត៖
អាណិតខ្លាំងណាស់ ! អុសធ្លាក់ត្រូវក្បាលរងរបួសធ្ងន់ ជីដូនជីតាគ្មានប្រាក់ព្យាបាល
ខេត្តកំពង់ស្ពឺ ៖ ក្មេងប្រុសម្នាក់ ត្រូវអុសធ្លាក់ចំក្បាល ហូរឈាមស្រោចខ្លួនកាលពីថ្ងៃ១៨ ខែកុម្ភៈ ឆ្នាំ២០១៧ តែជីដូនជីតាគ្មានប្រាក់ ដើម្បីយកចៅទៅព្យាបាលនៅមន្ទីរពេទ្យឡើយ ។
ប្រភពពីអ្នកភូមិជ័យមានល័ក្ខ ឃុំក្រាំងដីវ៉ាយ ស្រុកភ្នំស្រួច ខេត្តកំពង់ស្ពឺ ដែលជាអ្នកភូមិផងរបងជាមួយបានប្រាប់ឲ្យដឹងថា ឪពុកម្តាយរបស់គេលែងលះគ្នាជាច្រើនឆ្នាំមកហើយ និងមិនដែលមកមើលកូននោះទេ ដោយបានទុកក្មេងប្រុសរូបនេះបានរស់នៅជាមួយជីតាដែលមានជីវភាពខ្វះខាត រកព្រឹកខ្វះល្ងាច ចិញ្ចឹមបីបាច់ចៅទាំងលំបាកវេទនា ដោយប្រកបរបរជាអ្នកកាប់អុសលក់ ដើម្បីបានប្រាក់កម្រៃចិញ្ចឹមចៅ ។
ប្រភពបន្តថា មុនពេលកើតហេតុ ជីតាបានទុកចៅនៅផ្ទះ ហើយទៅកាប់អុសរហូតដល់ល្ងាចទើបត្រឡប់មកវិញ ដោយអស់កម្លាំងគាត់មិនបានទម្លាក់អុសពីរទេះនោះទេ លុះព្រឹកឡើងក្មេងប្រុសរងគ្រោះបានរត់លេងនៅជិតរទេះ ចៃដន្យរត់ទៅប៉ះរទេះ ស្រាប់តែអុសធ្លាក់មកចំក្បាលបណ្តាលឲ្យបែកក្បាលហូរឈាមជោកខ្លួនរងរបួសធ្ងន់តែម្តង ។
ក្រោយពេលកើតហេតុ ជីតាបានយកទៅពេទ្យឃុំដែរ តែគ្រូពេទ្យនៅតំបន់នោះប្រាប់ថា ក្មេងប្រុសរងគ្រោះបាក់ឆ្អឹង ចិញ្ចើម ឬផុងលលាដ៍ក្បាលក៏មិនដឹង ពេទ្យនៅតំបន់នោះមិនហ៊ានព្យាបាលទេ ដោយប្រាប់ថា ត្រូវបញ្ជូនទៅពេទ្យខេត្ត ដើម្បីធ្វើការសង្គ្រោះ ។ ដោយមានការអាណិតអាសូរខ្លាំង អ្នកជិតខាងបានរៃលុយគ្នាដើម្បីឲ្យជីតាយកចៅទៅកាន់ពេទ្យខេត្ត ។ រហូតមកដល់ព្រឹក ថ្ងៃទី២០ ខែកុម្ភៈ ឆ្នាំ២០១៧នេះ អាការៈក្មេងប្រុសរងគ្រោះ យ៉ាងម៉េចក៏អ្នកភូមិ មិនទាន់ដឹងនៅឡើយដែរ ។
អ្នកភូមិបានសំដែង នូវទឹកចិត្តអាណិតក្មេងម្នាក់នេះ ជាពន់ពេកណាស់ ដោយអ្នកខ្លះលើកឡើងថា ឪពុកម្ដាយបានលែងលះគ្នា ជាយូរមកហើយ រាល់ថ្ងៃរស់នៅជាមួយយាយតាដែលពួកគាត់ កំពុងមានជីវភាពខ្វះខាត បែរជាជួបគ្រោះអកុសលបែបនេះទៀត ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]