រាជធានីភ្នំពេញ៖ បុរសអ្នករត់រ៉ឺម៉កកង់បីម្នាក់ បន្ទាប់ពីឈ្លោះប្រកែកជាមួយប្រពន្ធរឿងសុំទិញកង់បីថ្មីមិនបានក៏ដើរចេញបាត់ពីផ្ទះ២ថ្ងៃ ស្រាប់តែនៅវេលាម៉ោង៦ និង៣០នាទីព្រឹក ថ្ងៃទី១៩ ខែមករា ឆ្នាំ ២០១៧ ត្រូវបានគេប្រទះឃើញសពគាត់អណ្ដែតទឹកមកទើរនៅមាត់ច្រាំងទន្លេខាងក្រោយសណ្ឋាគារកាំបូឌីយ៉ាណា ស្ថិតក្នុងសង្កាត់ចតុមុខ ខណ្ឌដូនពេញ ។
ប្រភពព័ត៌មានពីនគរបាលបានប្រាប់ឱ្យដឹងថា សពបុរសរងគ្រោះឈ្មោះ ចិន កេ អាយុ៥២ឆ្នាំ មុខរបររត់ម៉ូតូកង់បី មានប្រពន្ធឈ្មោះ ឱក កក់ អាយុ៤២ឆ្នាំ មុខរបរកល់ដូរ ស្នាក់នៅផ្ទះជួលក្នុងសង្កាត់បឹងកក់ទី១ ខណ្ឌទួលគោក ។
ប្រភពដដែលបានប្រាប់បន្តទៀតថា ពេលទទួលបានព័ត៌មានថា មានសាកសពរបស់បុរសម្នាក់ត្រូវបានគេប្រទះឃើញអណ្តែតមកទើរនៅមាត់ច្រាំងទន្លេនៅចំណុចក្រោយសណ្ឋាការកាំបូឌីយ៉ាណា កម្លាំងសមត្ថកិច្ចបានចុះទៅដល់ ហើយស្រង់យកមកលើគោកដើម្បីធ្វើកោសល្យវិច្ច័យ ដោយបានឃើញថា បុរសរងគ្រោះពិតជាស្លាប់ដោយសារតែការលង់ទឹក ។
ក្រោយពេលពិនិត្យ និងធ្វើកោសល្យវិច្ច័យសាកសពរួច កម្លាំងមានសមត្ថកិច្ចក៏បានធ្វើការស្រាវជ្រាវរកក្រុមគ្រួសារសព ភ្លាមៗនោះក៏លេចមុខស្ត្រីម្នាក់អះអាងថា បុរសរងគ្រោះគឺជាប្តីរបស់គាត់ ដែលបានបាត់ពីផ្ទះតាំងពីរសៀលថ្ងៃទី១៧ ខែមករា ឆ្នាំ២០១៧ ក្រោយពីមានជម្លោះជាមួយគាត់រឿងសុំទិញម៉ូតូរ៉ឺម៉កកង់បីថ្មីមិនបាន ដោយគាត់គ្មានលុយឲ្យប្តូរនោះ ។ បន្ទាប់មកសមត្ថកិច្ចបានប្រគល់សពទៅឲ្យក្រុមគ្រួសារយកទៅធ្វើបុណ្យតាមប្រពៃណី ។
ពាក់ព័ន្ធការស្លាប់របស់បុរសវ័យចំណាស់អ្នករត់ម៉ូតូរ៉ឺម៉កកង់បីខាងលើនេះដែរ មានមតិមួយចំនួនបានលើកឡើងថា ទំនងជាគាត់ខឹងប្រពន្ធគ្មានលុយប្តូរម៉ូតូរ៉ឺម៉កកង់បីថ្មីឲ្យ ទើបដាច់ចិត្តធ្វើអត្តឃាតដោយលោតទឹកសម្លាប់ខ្លួនពីលើស្ពានជ្រោយចង្វា ហើយអណ្តែតមកទើលើមាត់ច្រាំងបែបនេះ ៕
ប្រភព៖ កោះសន្ដិភាព
ដោយឡែកពត៌មានគួរឲ្យចាប់អារម្មណ៍មួយផ្សេងទៀត៖
សល់៣ខែទៀតចូលរោង តូចចិត្តម្តាយស្តីបន្ទោសដាច់ចិត្តចងកសម្លាប់ខ្លួន
រាជធានីភ្នំពេញ ៖ បុរសម្នាក់បានចងកសម្លាប់ខ្លួន នឹងច្រវាក់ក្នុងបន្ទប់ជួល រហូតដល់ហើមស្អុយ ទើបប្រជាពលរដ្ឋប្រទះឃើញ និងបង្កឲ្យមានការភ្ញាក់ផ្អើលកាលពីវេលាម៉ោង១១ និង៣០នាទីព្រឹក ថ្ងៃទី១៨ ខែមករា ឆ្នាំ២០១៧ នៅក្នុងបន្ទប់ជួលលេខ៩ ជាន់ទី១ ផ្ទះលេខ១៣៤អា ផ្លូវបេតុង ភូមិឡកំបោ សង្កាត់ស្វាយប៉ាក ខណ្ឌឬស្សីកែវ។
បុរសដែលធ្វើអត្តឃាតឈ្មោះ ផា សូលីដា អាយុ២៨ឆ្នាំ មុខរបរ បុគ្គលិកក្រុមហ៊ុនតេលា ផ្នែកតេលាហ្គាស ស្នាក់នៅកន្លែងកើតហេតុខាងលើ និងមានទីលំនៅភូមិព្រែកព្នៅ សង្កាត់ព្រែកព្នៅ ខណ្ឌព្រែកព្នៅ។
តាមប្រភពព័ត៌មានឲ្យដឹងថា បុរសដែលគិតខ្លីមានគូដណ្តឹងឈ្មោះ យន់ ដាលីន ហៅយឿន អាយុ២៧ឆ្នាំ ស្នាក់នៅបន្ទប់ជួលជាមួយគ្នា ហើយគ្រោងចូលរោងការនៅខែមេសាខាងមុខនេះ គឺសល់តែ៣ខែទៀតទេ បែរជាចងសម្លាប់ខ្លួនទៅវិញ។ ទាក់ទិនការធ្វើអត្តឃាតនេះ ត្រូវបានក្រុមគ្រួសារឲ្យដឹងថា ដោយសារតែតូចចិត្តខ្លួនឯង ដែលសុំប្រាក់ទៅលោះទូរស័ព្ទ ម្តាយមិនឲ្យ ហើយម្តាយបានស្តីបន្ទោស ក៏បានចងកសម្លាប់ខ្លួនតែម្តង។ នៅថ្ងៃទី១៥ ខែមករា ឆ្នាំ២០១៧ វេលាម៉ោង៧យប់ បុរសរូបនោះបានទៅសុំលុយម្តាយបង្កើតនៅស្រុក ដើម្បីយកទៅលោះទូរស័ព្ទ ដែលខ្លួនបានដាក់បញ្ចាំ ហើយម្តាយមិនមាន ថែមទាំងស្តីបន្ទោសឱ្យបន្តិបន្តួច។
បន្ទាប់ពីទៅយកប្រាក់ ម្តាយមិនឲ្យក៏ត្រលប់មកផ្ទះជួលវិញ ហើយបានយកច្រវាក់ដែកប្រវែង២ម៉ែត្រដាក់ចូលក្នុងហោប៉ោខោ រត់ចេញពីផ្ទះ ប្រាប់គូដណ្តឹងថា ទៅមើលក្មួយនៅពេទ្យក៏បានបាត់ដំណឹងរហូត ស្រាប់តែនៅវេលាម៉ោង ប្រមាណ១១ព្រឹក មានអ្នកជួលផ្ទះក្បែរគ្នាធុំក្លិន ក៏បាននាំគ្នាដើររកឃើញ សពបុរសនោះហើមស្អុយ ចងកសម្លាប់ខ្លួននៅបន្ទប់ទំនេរជាន់ទី១។
បន្ទាប់ពីភ្ញាក់ផ្អើល នគរបាលបានចុះពិនិត្យសពបញ្ជាក់ថា បុរសនោះចងកសម្លាប់ខ្លួនឯង ហើយនៅក្នុងកាបូប និងក្នុងបន្ទប់ក៏មានសម្ភារ សម្រាប់ប្រើប្រាស់គ្រឿងញៀនផងដែរ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
