តារា & កម្សាន្ដ

រហូតដល់ពេលនេះទៅហើយ នៅមានអ្នកគាំទ្រប្រកែកគ្នា​ថាមិនមែនជា ថៃ នរៈពិទូទៀត ព្រោះតែឃើញចំណុចមួយដែលខុសគ្នា!

និកា ១១ ខែមុន

បាត់ដំបង៖ រហូតមកទល់ពេលនេះ ទោះបីជា ចាប់ឃាត់ខ្លួនអតីតFreshie Boy លេខ១ ឆ្នាំ២០០៦ លោក ថៃ នរៈពិទូ រួមទាំងប្រពន្ធរបស់លោក នៅឯខេត្តបាត់ដំបង ក៏ដោយក្តី ក៏មានអ្នកគាំទ្រមួយចំនួន នៅតែខំនាំគ្នាប្រកែកយកឈ្នះរៀងៗខ្លួនទៀត ថាមិនមែនជាលោកឡើយ ដោយសម្អាងនឹងហេតុផលមួយ ដែលពួកគេស្វែងរកឃើញ។

ក្រោយពីរូបថតមួយសន្លឹក ដែលទំព័រហ្វេសប៊ុក ស្នងការដ្ឋាននគរបាលខេត្តបាត់ដំបង បានធ្វើការបង្ហោះកាលពីម្សិលមិញ ត្រូវបានគេនាំគ្នាចែកចាយតៗគ្នា ព្រោះវាជារឿងមួយមិនគួរឲ្យជឿទាល់តែសោះ ដែលលោក ថៃ នរៈពិទូ និងប្រពន្ធ សុទ្ធជាកូនអ្នកមានមុខមានមាត់ ត្រូវបានសមត្ថកិច្ចចាប់បាន ពាក់ព័ន្ធនឹងរឿងគ្រឿងញៀនយ៉ាងដូច្នេះ។

ប៉ុន្តែទោះបី ជាមានភស្តុតាង និងរូបថតច្បាស់ដល់ថ្នាក់នេះក៏ដោយ ក៏មានអ្នកគាំទ្រមួយចំនួន នៅមិនជឿ ហើយនាំគ្នាគិតថា ជាមនុស្សផ្សេងគ្នា គ្រាន់តែមុខមាត់ស្រដៀង និងឈ្មោះដូចគ្នា ហើយការធ្វើបែបនេះ គឺដើម្បីទាញចំណាប់អារម្មណ៍ រឺការថតកុនតែប៉ុណ្ណោះ។ ជាពិសេសអ្វីដែលសំខាន់ជាងនេះទៅទៀត អ្នកគាំទ្រ បានយករូបថតកាលពីមុនរបស់លោក ថៃ នរៈពិទូ មកប្រៀបធៀបនឹងរូបបច្ចុប្បន្នទៀត ដែលរូបពីមុនរបស់លោក មានប្រជ្រុយលើបបូរមាត់ តែបែរជារូបបច្ចុប្បន្ន មិនមានប្រជ្រុយត្រង់ទីនោះ និងមានស្នាមខ្មៅធំមួយ នៅលើថ្គាមទៀត ដូច្នេះចំនុចនេះ គឺបានធ្វើឲ្យពួកគេ មិនជឿថា ជាលោក ថៃ នរៈពិទូឡើយ៕ 

តើប្រិយមិត្តយល់យ៉ាងណាដែរចំពោះរឿងនេះ? 

អ្នកគាំទ្រប្រៀបធៀប ជាមួយនឹងរូបមួយនេះ ដែលមួយមានប្រជ្រុយ និងមួយទៀតអត់ប្រជ្រុយ
មតិរបស់អ្នកលេងហ្វេសប៊ុក
រូបថតពី៖ ទំព័រហ្វេសប៊ុក ស្នងការដ្ឋាននគរបាលខេត្តបាត់ដំបង

កំណត់ហេតុខ្មែរឡូត៖

ពាក់ព័ន្ធនឹង លោក ថៃ នរៈពិទូ ត្រូវបានប៉ូលិសបានឃាត់ខ្លួន រួមទាំងប្រពន្ធទៀតផង ពាក់ព័ន្ធនឹងគ្រឿងញៀន។

មិនគួរឲ្យជឿថា អតីតFreshie Boy លេខ១ ឆ្នាំ២០០៦ លោក ថៃ នរៈពិទូ ត្រូវបានប៉ូលិសឃាត់ខ្លួន ពីបទចែកចាយគ្រឿងញៀន នៅចំណុចខារ៉ាអូខេ ដឹសោនហ្វាមីលី(The Sound Family) កាលពីវេលាម៉ោង ២៣៖២០នាទី កាលពីថ្ងៃទី៩ ខែមករា ឆ្នាំ២០១៧។

បើតាមគេហទំព័រហ្វេសប៊ុក អគ្គស្នងការដ្ឋាននគរបាលជាតិ បានឲ្យដឹងថា កម្លាំងការិយាល័យប្រឆាំងគ្រឿងញៀន សហការជាមួយក្រុមអន្តគមន៍ប្រឆាំងបង្ការ បង្រ្កាប នៃស្នងការដ្ឋាននគរបាលខេត្ត បានចុះបង្រ្កាបករណីផ្តល់ទីកន្លែងឲ្យប្រើប្រាស់ និងរក្សាទុកគ្រឿងញៀន១លើក។ មិនតែប៉ុណ្ណោះ សមត្ថកិច្ចក៏បានឃាត់ខ្លួន ជនសង្ស័យទៅដល់៦នាក់ ដែលក្នុងនោះ មាន លោក ថៃ នរៈពិទូ ដែលជា អតីតFreshie Boy លេខ១ ឆ្នាំ២០០៦ ហើយរួមទាំងប្រពន្ធរបស់លោកទៀតផង គឺអ្នកនាង អោក រតនៈប៉ុណ្ណិកា ដែលមានឪពុកជាមន្រ្តីនគរបាលជាតិផងដែរ។

អ្វីដែលសមត្ថកិច្ច បានធ្វើការចាប់បាន និងដកហូត មានដូចជាថ្នាំញៀន ប្រភេទកេតាមីន( Ketamine) ចំនួន០៣កូនថង់ ទម្ងន់ ០,៨៨ ក្រាម ឧបករណ៍(ពុម្ភ) សម្រាប់កែច្នៃថ្នាំញៀនអ៊ិចស្តាស៊ី ចំនួន០២ ថ្នាំអំពូល Diazepam ចំនួន ០២អំពូល ថ្នាំ ថ្នាំគ្រាប់ Zepam ចំនួន ១៦បន្ទះ ដែកកេះចំនួន ០៣ គំរបដកកែច្នៃសំរាប់ជក់ថ្នាំញៀនចំនួន ០១ បំពង់ទុយោប៉ឺតចំនួន ០១ដុំ ថង់សំរាប់ច្រកថ្នាំញៀនមួយចំនួន ក្រដាសអាលុយមីញ៉ូមចំនួន ០១ដុំ និងសំបកថ្នាំមួយចំនួន។

គួររំលឹកផងដែរ លោក ថៃ នរៈពិទូ គឺជា អតីតFreshie Boy លេខ១ ឆ្នាំ២០០៦ ដែលមហាជន ភាគច្រើន បានស្គាល់ និងគាំទ្រយ៉ាងខ្លាំង ទៅលើសមត្ថភាពរបស់លោក គួបផ្សំនឹងរូបសម្រស់ស្រស់សង្ហា។ ប៉ុន្តែមិនដឹងជាយ៉ាងណា រូបលោក ក៏ស្ងាត់ដំណឹងសូន្យតែម្តង មិនបង្ហាញមុខនៅក្នុងវង្វង់សិល្បៈតទៅទៀត ហើយទើបតែពេលថ្មីៗនេះទេ ស្រាប់តែធ្លាយដំណឹងថា រូបលោក ត្រូវបានសមត្ថកិច្ច ចាប់ឃាត់ខ្លួន ពាក់ព័ន្ធនឹងគ្រឿងញៀនយ៉ាងដូច្នេះ៕

រូបថតពី៖ គេហទំព័រហ្វេសប៊ុក អគ្គស្នងការដ្ឋាននគរបាលជាតិ

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 085836679 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 085836679 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload