ស្វីស៖ ស្របពេលដែលខ្សែប្រយុទ្ធឆ្នើមរបស់ Real Madrid កីឡាករ Cristiano Ronaldo ឈ្នះពានកីឡាករល្អជាងគេហើយនោះ ទន្ទឹមនឹងនេះដែរ កីឡាករមកពីក្លិបនៅប្រទេសម៉ាឡេស៊ីមួយរូប បានឈ្នះនូវពានរង្វាន់គ្រាប់បាល់ស៊ុតបញ្ចូលទីល្អជាងគេ ក្នុងព្រឹត្តការណ៍ FIFA Football Award ដែលប្រារព្ធឡើងកាលពីយប់មិញនេះ ក្នុងទីក្រុង Zurich ប្រទេសស្វីស។
កីឡាករវ័យ២៩ឆ្នាំ ឈ្មោះ Mohd Faiz Subri មកពីទីក្រុងប៉េណាំង ប្រទេសម៉ាឡេស៊ី បានធ្វើឲ្យអ្នកគាំទ្រក្នុងតំបន់អាស៊ីទាំងមូលភ្ញាក់ផ្អើល ក្រោយពីទទួលបានពានរង្វាន់ គ្រាប់បាល់ស៊ុតបញ្ចូលទីល្អជាងគេប្រចាំឆ្នាំ។
ពឹងផ្អែកលើការបោះឆ្នោត កីឡាករដែលមកពីក្របខ័ណ្ឌបាល់ទាត់ Malaysian Super League រូបនេះទទួលបានសម្លេងខ្ពស់ជាងគេ រហូតដល់៦០ភាគរយ វ៉ាដាច់គេ ជាមួយនឹងគ្រាប់បាល់ស៊ុត Free Kick កោងបញ្ចូលទីដ៏អស្ចារ្យ។
ក្នុងការប្រគល់ពានរង្វាន់ជូន ពីសំណាក់វីរៈបុរសបាល់ទាត់ Ronaldo (ប្រេស៊ីល) កីឡាករ Mohd Faiz Subri បានថ្លែងឲ្យដឹងថា «ខ្ញុំពិតជារីករាយខ្លាំងណាស់ ពានរង្វាន់នេះធ្វើឲ្យខ្ញុំភ្ញាក់ផ្អើលខ្លាំង និងនឹកស្មានមិនដល់ថាបានឈ្នះ។ នេះគឺជាពានរង្វាន់ធំបំផុត ក្នុងអាជីពបាល់ទាត់របស់ខ្ញុំ» ។
កីឡាកររូបនេះ បានបន្តទៀតថា «អាថ៌កំបាំងនៃភាពជោគជ័យមួយនេះ គឺដោយសារតែ ការខំហ្វឹកហាត់ ហើយខ្ញុំសន្យាថា នឹងខិតខំផ្តោតយកចិត្តទុកដាក់បន្ថែមទៀតជាមួយក្លិប ក្នុងការប្រកួតប្រជែងក្នុងលីក» ៕
ដោយឡែកព័ត៌មានគួរឲ្យចាប់អារម្មណ៍មួយផ្សេងទៀត៖ Ronaldo ឈ្នះពានកីឡាឆ្នើមជាងគេលើពិភពលោក ក្នុងព្រឹត្តការណ៍ FIFA Football Award
ព្រឹត្តការណ៍ FIFA Football Award ជាព្រឹត្តការណ៍ពានរង្វាន់បាល់ទាត់ទើបតែបង្កើតឡើងក្នុងឆ្នាំនេះ ដែលរៀបចំដោយសហព័ន្ធបាល់ទាត់ FIFA បានរកឃើញម្ចាស់ពានកីឡាករឆ្នើមជាងគេលើពិភពលោកហើយ គឺខ្សែប្រយុទ្ធរបស់ក្លិប Real Madrid កីឡាករ Cristiano Ronaldo ។
គួរបញ្ជាក់ដែរថា Ronaldo គឺជាកីឡាដំបូងគេបង្អស់ ដែលឈ្នះពានរង្វាន់នេះ តាមរយៈសម្លេងបោះឆ្នោតខ្ពស់ជាងគេ លើកីឡាករ Lionel Messi និង Griezmann ខណៈយប់មិញនេះ Messi មិនចូលរួមក្នុងព្រឹត្តការណ៍នេះទេ។
ក្នុងការទទួលបានពានរង្វាន់កីឡាករឆ្នើមប្រចាំឆ្នាំរបស់ FIFA កីឡាករវ័យ៣១ឆ្នាំរូបនេះ បានថ្លែងរៀបរាប់ពីអារម្មណ៍របស់ខ្លួនផងដែរថា «វាពិតជាអស្ចារ្យណាស់! នេះមិនមែនជាលើកទីមួយទេក្នុងការឈ្នះពានកីឡាករល្អ ប៉ុន្តែពានរង្វាន់មួយនេះ គឺជាពានទីមួយដែលខ្ញុំឈ្នះ» ។
Ronaldo បានបន្តថា «ខ្ញុំចង់អរគុណទៅមិត្តរួមក្រុមរបស់ខ្ញុំ គ្រូបង្វឹក ហើយខ្ញុំអរគុណគ្រប់យ៉ាងទៅកាន់គ្រួសាររបស់ខ្ញុំ និងបុគ្គលិកទាំងអស់ផងដែរ» ។
លើសពីនេះទៀត Ronaldo បានបន្ថែមថា «ខ្ញុំក៏មានការសោកស្តាយផងដែរ ដែលកីឡាករមួយចំនួនរបស់ Barcelona មិនមែនវត្តមាននៅទីនេះ ប៉ុន្តែខ្ញុំយល់នូវអារម្មណ៍នេះ» ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]