ស្វីស៖ ព្រឹត្តការណ៍ FIFA Football Award ជាព្រឹត្តការណ៍ពានរង្វាន់បាល់ទាត់ទើបតែបង្កើតឡើងក្នុងឆ្នាំនេះ ដែលរៀបចំដោយសហព័ន្ធបាល់ទាត់ FIFA បានរកឃើញម្ចាស់ពានកីឡាករឆ្នើមជាងគេលើពិភពលោកហើយ គឺខ្សែប្រយុទ្ធរបស់ក្លិប Real Madrid កីឡាករ Cristiano Ronaldo ។
គួរបញ្ជាក់ដែរថា Ronaldo គឺជាកីឡាដំបូងគេបង្អស់ ដែលឈ្នះពានរង្វាន់នេះ តាមរយៈសម្លេងបោះឆ្នោតខ្ពស់ជាងគេ លើកីឡាករ Lionel Messi និង Griezmann ខណៈយប់មិញនេះ Messi មិនចូលរួមក្នុងព្រឹត្តការណ៍នេះទេ។
ក្នុងការទទួលបានពានរង្វាន់កីឡាករឆ្នើមប្រចាំឆ្នាំរបស់ FIFA កីឡាករវ័យ៣១ឆ្នាំរូបនេះ បានថ្លែងរៀបរាប់ពីអារម្មណ៍របស់ខ្លួនផងដែរថា «វាពិតជាអស្ចារ្យណាស់! នេះមិនមែនជាលើកទីមួយទេក្នុងការឈ្នះពានកីឡាករល្អ ប៉ុន្តែពានរង្វាន់មួយនេះ គឺជាពានទីមួយដែលខ្ញុំឈ្នះ» ។
Ronaldo បានបន្តថា «ខ្ញុំចង់អរគុណទៅមិត្តរួមក្រុមរបស់ខ្ញុំ គ្រូបង្វឹក ហើយខ្ញុំអរគុណគ្រប់យ៉ាងទៅកាន់គ្រួសាររបស់ខ្ញុំ និងបុគ្គលិកទាំងអស់ផងដែរ» ។
លើសពីនេះទៀត Ronaldo បានបន្ថែមថា «ខ្ញុំក៏មានការសោកស្តាយផងដែរ ដែលកីឡាករមួយចំនួនរបស់ Barcelona មិនមែនវត្តមាននៅទីនេះ ប៉ុន្តែខ្ញុំយល់នូវអារម្មណ៍នេះ» ។
គួរបញ្ជាក់បន្ថែមទៀតថា សរុបពានរង្វាន់ទាំងអស់កាលពីយប់មិញ Ronaldo ឈ្នះពានកីឡាករឆ្នើមជាងគេ ហើយក៏បានស្ថិតក្នុងចំនោមជម្រើសកីឡាករល្អ១១នាក់ អមជាមួយនឹង Suarez និង Messi ផងដែរ។
ស្របពេលជាមួយគ្នានេះ គ្រូបង្វឹករបស់ក្លិបកញ្ជ្រោងខៀវ Leicester លោក Claudio Ranieri ត្រូវបានប្រសិទ្ធនាមជាគ្រូបង្វឹកឆ្នើមប្រចាំឆ្នាំ ខណៈគ្រាប់បាល់ស៊ុតបញ្ចូលទីល្អជាងគេ បានទៅលើ កីឡាករមកទ្វីបអាស៊ី Mohz Faiz Subri សញ្ជាតិម៉ាឡេស៊ី៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]