ខេត្តពោធិ៍សាត់ ៖ បន្ទាប់ពីអ្នកជិតខាងឮសំឡេងស្រែក «អូយ» តែមួយម៉ាត់ហើយស្ងាត់ឈឹងទៅវិញ ក៏នាំគ្នារត់ទៅមើល ស្រាប់តែប្រទះឃើញស្ត្រីជាប្រពន្ធដេកដួលស្លាប់ក្នុងថ្លុកឈាម យ៉ាងអាណោចអាធ័ម បាត់ទៅហើយ ។
ករណីអំពើហិង្សា ក្នុងគ្រួសារនេះ បានកើតឡើងកាលពីវេលាម៉ោង ១០និង៤០នាទីយប់ ថ្ងៃទី០៤ ខែធ្នូ ឆ្នាំ២០១៦ នៅក្នុងផ្ទះរបស់ជនរងគ្រោះ ស្ថិតក្នុងភូមិស្ទឹងថ្មី ឃុំប្រមោយ ស្រុកវាលវែង ខេត្តពោធិ៍សាត់ ។
នគរបាលប៉ុស្តិ៍រដ្ឋបាល ប្រមោយបានឲ្យដឹងថា បុរសសង្ស័យជាប្តីឈ្មោះ ឆេង សារិទ្ធ ហៅវិត អាយុ៣៥ឆ្នាំ រីឯប្រពន្ធជនរងគ្រោះឈ្មោះ សួន ធី អាយុ៤០ឆ្នាំ មានកូន២នាក់ រស់នៅភូមិ-ឃុំកើតហេតុខាងលើ ។ បុរសជាប្ដីបានប្រើ កាំបិតផ្គាក់កាប់ប្រពន្ធមួយកាំបិតចំក្បាលពីក្រោយ ធ្លាយខួរបណ្ដាលឲ្យ ស្លាប់ភ្លាមៗមួយរំពេច ។
ប្រភពព័ត៌មាន ពីកន្លែងកើតហេតុបានឲ្យដឹងថា បុរសជាប្ដីជាមនុស្សញៀនថ្នាំ ហើយផឹកស្រាស្រវឹងស្ទើរតែរាល់ថ្ងៃ ។ នៅពេលស្រវឹងម្ដងៗ តែងតែរករឿងឈ្លោះប្រកែកជាមួយប្រពន្ធ ញឹកញាប់ណាស់ ដែលភាគច្រើនផ្ដើមចេញ ពីការប្រច័ណ្ឌ ។
ជាក់ស្ដែងនៅយប់ថ្ងៃកើតហេតុ បុរសជាប្ដីផឹកស្រាស្រវឹង ហើយបានរករឿងឈ្លោះប្រកែកជាមួយប្រពន្ធ ដូចសព្វមួយដង ប៉ុន្តែអ្នកជិតខាងមិន ចាប់អារម្មណ៍ទេ ព្រោះវាជាទម្លាប់របស់គ្រួសារនោះទៅហើយ ។ លុះមួយសន្ទុះក្រោយមក អ្នកជិតខាងឮសំឡេងប្រពន្ធស្រែក «អូយ» ហើយស្ងាត់មាត់ឈឹងទៅវិញ ក៏នាំគ្នារត់ទៅមើល ស្រាប់តែឃើញស្ត្រី ជាប្រពន្ធដេកដួលស្លាប់ ក្នុងថ្លុកឈាមបាត់ទៅហើយ ក៏ទៅរាយការណ៍ប្រាប់សមត្ថកិច្ច ឲ្យឃាត់ខ្លួនបុរស ជាប្តីភ្លាមៗតែម្ដង ។
សមត្ថកិច្ចសន្និដ្ឋានថា ករណីនេះអាចបណ្ដាល មកពីបុរសជាប្ដីញៀនថ្នាំ ហើយស្រវឹងស្រា គួបផ្សំភ្លើងប្រច័ណ្ឌផង ទើបបែកស្លុយបែបនេះតែម្ដង ។ ជនសង្ស័យជាប្តីត្រូវបានកសាងសំណុំរឿងបញ្ជូន ទៅសាលាដំបូងខេត្ត ដើម្បីចាត់ការបន្ត ៕
ប្រភព៖ កោះសន្តិភាព
កំណត់ហេតុខ្មែរឡូត៖
គួររំលឹកព័ត៌មានចាស់ដែរថា ករណីស្រដៀងគ្នានេះដែរ ឃោរឃៅណាស់ ! កាប់ប្រពន្ធរហូតទាល់តែស្លាប់។
សេចក្តីរាយការណ៍បឋមបានឲ្យដឹងថា ប្តីចិតឃោរឃៅម្នាក់បានយកពូថៅកាប់ប្រពន្ធរហូតទាល់តែស្លាប់នៅផ្ទះរបស់ខ្លួនក្នុងភូមិពាមទង់ ឃុំត្រែងត្រយឹង ខេត្តកំពង់ស្ពឺ កាលពីថ្ងៃទី៣ ខែធ្នូ ឆ្នាំ២០១៦ កន្លងទៅ។
ប្រភពពីសមត្ថកិច្ចនគរបាលស្រុកភ្នំស្រួចបានឲ្យដឹងថា បុរសជាប្តីឈ្មោះ ម៉ក់ សំអាត អាយុ៣៩ឆ្នាំ ត្រូវបានចាប់ខ្លួន ចំណែកប្រពន្ធរងគ្រោះឈ្មោះ ចាន់នី មែល អាយុ៣៣ឆ្នាំ ។
ប្រភពបានបន្តឲ្យដឹងទៀតថា ករណីប្តីកាប់ប្រពន្ធរហូតស្លាប់នេះគឺផ្តើមឡើងដោយបុរសជាប្តីខឹងប្រពន្ធមិនដាំបាយឲ្យស៊ី គិតតែពីផឹកស៊ី ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]