(ភ្នំពេញ)៖ កម្មវិធីបើកកីឡាជាតិ ជាប្រវត្តិសាស្រ្តលើកទី១ ឆ្នាំ២០១៦ នឹងចាប់ផ្តើមសម្ពោធនារសៀលថ្ងៃសុក្រ ទី២៨ ខែតុលាស្អែកនេះហើយនៅពហុកីឡដ្ឋានជាតិ ដែលត្រូវបានរៀបចំបំពាក់ភ្លើង ពណ៌ទំនើប និងបាញ់កាំជ្រួចដូចទៅនឹងការបើកកីឡា SEA Games ផងដែរ ដោយអនុញ្ញាតឲ្យចូលទស្សនាដោយសេរី និងពុំមានលក់សំបុត្រអ្វីឡើយ ជាមួយនឹងកងកម្លាំង ការពារសន្តិសុខ និងសណ្តាប់ធ្នាប់ជិត ៣០០០នាក់។
អ្វីដែលរឹតតែពិសេសថែមទៀតនោះ គឺមានការប្រគំតន្រ្តីខ្នាតយក្សពីសំណាក់តារាងចម្រៀងកំពូលប្រចាំព្រះរាជាណាចក្រកម្ពុជា លោក ព្រាប សុវត្ថិ កញ្ញា មាស សុខសោភា កញ្ញា ឱក សុគន្ធកញ្ញា និងក្រុមកំប្លែង ព្រហ្មម៉ាញ ថែម ទៀតផង ក្រៅពីកងយោធពលខេមរភូមិន្ទ ត្រៀមបង្ហាញក្បាច់គុនបុរាណល្បុក្កតោ និងហោះឆ័ត្រយោងថែមទៀតនោះ។
ក្នុងពិធីបើកនោះដែរ ក៏មានការអញ្ជើញចូលរួមពីអធិបតីភាព សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដើម្បីញាំងឲ្យកម្មវិធីអធិកអធមឡើង ថែមទៀតចាប់ផ្តើមពីម៉ោង ៣៖០០នាទីរៀលស្អែកនេះតែម្តង ក្រោមកិច្ចសហការរវាងក្រសួងអប់រំ យុវជន និងកីឡា សហការជាមួយគណៈកម្មាធិ ការជាតិអូឡាំពិកកម្ពុជា (NOCC) ដែលគ្រោងចំណាយរហូតដល់ទៅ ១លានដុល្លារសហរដ្ឋអាមេរិក។
សូមបញ្ជាក់ដែរថា កីឡាចំនួន ១៥ប្រភេទ នឹងត្រូវដាក់ឲ្យប្រកួតក្នុងព្រឹត្តិការណ៍កីឡាជាតិ National Games លើកទី១ នេះ នៅ២ទីតាំងផ្សេងគ្នា គឺស្តាតអូឡាំពិក ក្នុងរាជធានីភ្នំពេញ និងមណ្ឌលកីឡាហែលទឹកតេជោសែន ខេត្តកំពង់ចាម ក្នុងគោលបំណងពង្រឹងសមត្ថភាពអត្តពលិក ត្រៀមកីឡា SEA Games ដែលកម្ពុជាធ្វើម្ចាស់ផ្ទះឆ្នាំ២០២៣ខាងមុខ៕
ប្រភព៖ Fresh News
កំណត់ហេតុខ្មែរឡូត៖
ដោយឡែក រំលឹកព័ត៌មានចាស់លើកមុនផងដែរថា សមត្ថកិច្ចត្រៀមកម្លាំងនគរបាល និងអាវុធហត្ថចំនួនជិត ៣០០០នាក់ ដើម្បីការពារសន្តិសុខ សណ្តាប់ធ្នាប់ ក្នុងការប្រកួតកីឡាជាតិលើកទី១ ។ គួររំលឹកផងដែរថា លោកឧត្តមសេនីយ៍ឯក ទូច ណារ៉ុថ អគ្គស្នងការរងនគរបាលជាតិ និងជាប្រធាននាយកដ្ឋានអង្គរក្ស នៅព្រឹកថ្ងៃទី២៦ ខែតុលានេះបានបើកកិច្ចប្រជុំ ដើម្បីត្រៀមរៀបចំកម្លាំងការពារសន្តិសុខ សណ្តាប់ធ្នាប់ ក្នុងឱកាសប្រារព្ធពិធីបើកការប្រកួតកីឡាជាតិលើកទី១ ដែលនឹងត្រូវរៀបចំឡើងនៅពហុកីឡដ្ឋានជាតិអូឡាំពិកកម្ពុជាថ្ងៃទី២៨ ខែតុលា ដល់ថ្ងៃទី៥ ខែវិច្ឆិកា ឆ្នាំ២០១៦។
យោងតាមរបាយការណ៍ផែនការសកម្មភាព ការពារសុន្តិសុខ សណ្តាប់ធ្នាប់ ក្នុងពីធីបើកការប្រកួតកីឡាជាតិលើកទី១នេះបានឲ្យដឹងថា សមត្ថកិច្ចបានត្រៀមកម្លាំងនគរបាល និងកម្លាំងកងរាជអាវុធហត្ថចំនួន ២៨២៣នាក់ ដើម្បីត្រៀមការពារសន្តិសុខ ជូនថ្នាក់ដឹកនាំ កីឡាករ កីឡាការិនី ភ្ញៀវជាតិ អន្តរជាតិដែលទស្សនាព្រឹត្តិការណ៍កីឡាជាប្រវត្តិសាស្ត្រ លើកទី១នេះ។
ក្រសួងអប់រំបានឲ្យដឹងថា សម្ដេចតេជោ ហ៊ុន សែន នាយករដ្ឋមន្រី្តនៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នឹងអញ្ជើញជាអធិបតីភាពក្នុងពិធីបើក និងបិទការប្រកួតកីឡាជាតិលើកទី១នេះ។
សូមជម្រាបថា ក្រសួងអប់រំ យុវជន និងកីឡា សហការជាមួយគណៈកម្មាធិការជាតិអូឡាំពិកកម្ពុជា នឹងរៀបចំការប្រកួតកីឡាជាតិលើកទី១ ជាប្រវត្តិសាស្ត្រដែលនឹងចាប់ផ្ដើម ចាប់ពីថ្ងៃទី២៥ ខែតុលា ដល់ថ្ងៃទី០៥ ខែវិច្ឆិកា ឆ្នាំ២០១៦ នៅពហុកីឡដ្ឋានជាតិរាជធានីភ្នំពេញ និងខេត្តកំពង់ចាម៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]