(ភ្នំពេញ)៖ បន្ទាប់ពីការងារសិល្បៈ កំពុងតែមានភាពមមាញឹក គួរឲ្យកត់សម្គាល់ តារាសម្ដែងរាងតូចច្រឡឹង កញ្ញា ពៅ លីដា ស្រាប់តែក្ដាប់បានឱកាសមាស ចេញទៅសម្ដែង នៅទឹកដីមហាសេដ្ឋកិច្ច សម្បូរដុល្លារ នៃសហរដ្ឋអាមេរិក រយៈពេល២ខែ ធ្វើឲ្យនាងបង្ហាញអារម្មណ៍ ត្រេកអរស្ទើរហោះ ព្រោះមិននឹកស្មានថា ខ្លួនត្រូវសម្ភាសន៍ជាប់ បានចេញទៅសម្ដែងបែបនេះឡើយ។ ពេលក្ដាប់បានឱកាសជាលើកដំបូងនេះ នៅពេលចោទសួរពីរឿងស្នេហាក្រៅប្រទេស ពៅ លីដា បានបង្ហើបឲ្យដឹងថា នាងនឹងបើកបេះដូង ពិចារណាស្នេហ៍ ពីសំណាក់បុរសក្រៅស្រុក ពោលគឺបុរសនៅអាមេរិក ប៉ុន្តែអ្វីៗស្ថិតនៅលើពេលវេលា និងនិស្ស័យជាអ្នកសម្រេច។
តារាសម្ដែង ពៅ លីដា ត្រូវបានគេមើលឃើញថា ជាតារាមានសំណាងខ្ពស់មួយដួង ក្នុងចំណោមតារាខ្មែរ ដែលបានចេញទៅសម្ដែង នៅសហរដ្ឋអាមេរិក ខណៈដែលតារាសម្ដែង តារាចម្រៀងជាច្រើននាក់នោះ ត្រូវបានខកបំណង ក្នុងការចេញទៅសម្ដែង នៅលើទឹកដីសម្បូរប្រាក់ដុល្លារនេះ ព្រោះតែការបំពេញសំណុំបែបបទ ការរៀបចំឯកសារ និងលក្ខខណ្ឌច្រើនពេក ត្រូវបានដាក់ចេញឲ្យតែអនុវត្តន៍។ ការបង្កឲ្យមានភាពតឹងតែង រាល់ពេលចេញទៅសម្ដែង នៅអាមេរិកនេះ ក៏ព្រោះតែតារាខ្មែរមួយចំនួន បានបង្កឲ្យមានផលវិបាកដល់អ្នកធានា ឲ្យឈឺក្បាលវិលមុខ និងគេចវេសមិនចង់ត្រឡប់មកវិញ ធ្វើឲ្យកើតបញ្ហាជាច្រើន។
ចុងក្រោយនេះ កញ្ញា ពៅ លីដា ត្រូវបានគេសង្កេតឃើញថា ក្រសោបបានតំណែងជាតួឯក ជាបន្តបន្ទាប់ ជាស្ដែងដូចជារឿង «វិថីនារី» របស់ MYTV រឿង«ស្នេហ៍បញ្ច្រាស់ទិស» និងរឿង «ចាប៉ីនាគត្រាច់ចរ» ជាដើម ហើយស្របពេលកំពុងត្រូវប៉ាន់ អាជីពសិល្បៈនៅក្នុង ស្រុកនោះ ស្រាប់តែឆក់បានឱកាស ចេញទៅសម្ដែងរកប្រាក់ដុល្លារ នៅលើទឹកដី មហាអំណាចសហរដ្ឋអាមេរិក ដោយបានអូសវ៉ាលីស ឡើងយន្តហោះចេញទៅនៅរាត្រីថ្ងៃទី២៦ ខែកញ្ញា ឆ្នាំ២០១៦នេះ។
ថ្លែងឲ្យដឹង នៅមុនពេលឡើងយន្តហោះ កញ្ញា ពៅ លីដា បានបញ្ជាក់ ទាំងអារម្មណ៍ត្រេកអរ ឥតឧបមាថា តាមគម្រោងនាងត្រូវសម្ដែងរយៈពេល២ខែ ជាមួយនឹងតារាចម្រៀងម្នាក់ទៀត គឺអ្នកនាង អឿន ស្រីមុំ ហើយនៅអំឡុងខែវិច្ឆិកា ឆ្នាំ២០១៦ នាងនិងត្រឡប់មកមាតុប្រទេសវិញ។
ពេលមានសំណួរថា ប្រសិនបើមានបុរសណាម្នាក់ ពេញចិត្តចង់បាន លីដា ធ្វើជាគូស្នេហ៍ ហើយចង់បានទៅរស់អាមេរិក តើ លីដា គិតយ៉ាងណាដែរ ? កញ្ញា ពៅ លីដា ឆ្លើយបញ្ជាក់ថា «រឿងនេះ ខ្ញុំមិនទាន់គិតទេបង..! តែប្រសិនបើមានបែបនេះមែន ខ្ញុំនឹងពិចារណាលើបុរសម្នាក់នោះ ហើយត្រូវមើលទៅលើនិស្ស័យថែមទៀត។ ខ្ញុំគិតថា ស្រេចតែលើនិស្ស័យទេបង.. បើគូគង់តែនឹងជួបគ្នាទេ។ ប៉ុន្តែបើតាមចិត្តខ្ញុំ ខ្ញុំមិនចង់រស់នៅប្រទេសគេទេ គឺចង់រស់នៅជួបជុំបងប្អូន ម៉ាក់ ប៉ា នៅស្រុកខ្មែរ គឺខ្ញុំពេញចិត្តណាស់ទៅហើយ មិនបានគិតប្រាថ្នា ដល់ថ្នាក់ទៅរស់នៅស្រុកគេទេ បង..!»។
ពៅ លីដា បន្ថែមថា នាងបានត្រៀមបទចម្រៀងជាច្រើនបទ រួមទាំងម៉ូដសម្លៀកបំពាក់បែបប្រពៃណីខ្មែរ ចំនួន១០កំប្លេរ ដើម្បីបង្ហាញជូនបងប្អូន នៅទីនោះ ហើយការចេញទៅសម្តែងនៅសហរដ្ឋអាមេរិក ជាលើកដំបូងនេះ នាងគ្មានការព្រួយបាយម្ភ ឬភ័យព្រួយទេ ព្រោះនាងធ្លាប់សម្ដែងជោគជ័យ នៅប្រទេស បារាំង និង អូស្ត្រាលី នាពេលកន្លងមក។
មុនពេលឡើងយន្តហោះ ត្រូវឃ្លាតឆ្ងាយពីក្រុមគ្រួសារ ពៅ លីដា បានលុតជង្គង់ជំរាបលា និងអរគុណម្ដាយ នៅចំពោះមុខមហាជន ហាក់បញ្ជាក់ថា នាងមិនចង់ឃ្លាតឆ្ងាយពីម្ដាយ មួយជំហ៊ានសោះឡើយ ខណៈដែលម្ដាយ និងប្អូនប្រុសរបស់នាងធ្លាប់មើលថែ និងតាមការពារស្ទើរគ្រប់ជំហាន៕
ប្រភព៖ Khmertalking
កំណត់ហេតុខ្មែរឡូត៖
ដោយឡែក រំលឹកព័ត៌មានចាស់លើកមុនផងដែរថា ពៅ លីដា នាំគ្រួសារទៅ ដើរលេងនៅថៃ និងសាំងហ្គាពួរ ។ គួររំលឹកផងដែរថា តារាសម្តែងជាច្រើនដួង បានកំពុងតែមមាញឹកជាប់ដៃ ថតរឿងឲ្យបណ្តាផលិតកម្ម និងស្ថានីយទូរទស្សន៍ ជាច្រើននោះ ស្រាប់តែតារាសម្តែង នាង ពៅ លីដា បែរជាបោះបង់ចោល ឱកាសកើបលុយពីការសម្តែង ទៅសម្ងំដឹកដៃ ម្តាយនិងប្អូនប្រុស ទៅដើរកម្សាន្ត នៅក្រៅប្រទេសធ្វើព្រងើយ ។
តារាសម្តែងច្រមុះស្រួច សម្បុរខ្មៅស្រអែម កញ្ញា ពៅ លីដា នៅពេលថ្មីៗនេះ បាននាំម្តាយ និងប្អូនប្រុសរូបសង្ហា ទៅដើរកម្សាន្ត លក្ខណៈគ្រួសារ ដោយកាលពី ប៉ុន្មានថ្ងៃមុននោះ នាងបានធ្វើដំណើរទៅ ដើរកម្សាន្តនៅប្រទេសថៃ ហើយក៏បានត្រឡប់មក ដល់ប្រទេសកំណើត មិនទាន់បានប៉ុន្មានថ្ងៃផង នាងក៏នាំគ្រួសារទៅ ដើរកម្សាន្តបន្តនៅ សាំងហ្គាពួរថែមទៀត ។
ក្នុងមួយរយៈ ពេលចុងក្រោយនេះ គេសង្កេតឃើញថា តារាសម្តែងរូបនេះ ហាក់មានភាពហ៊ឺហារ ស៊ីវិល័យដើរលេងកម្សាន្ត និង Shopping នៅក្រៅប្រទេសជាញឹកញាប់ ដោយមិនខ្វល់ពីការងារសិល្បៈ ទាល់តែសោះ ខុសប្លែកពីមុនៗ ដែលនាងមាន ការយកចិត្តទុកដាក់ ទៅលើការងារចង់ សាងប្រជាប្រិយភាព ឲ្យល្បីលេចធ្លោ។ ទន្ទឹមជាមួយនឹងការ មានភាពហ៊ឺហារ របស់នាងនេះដែរ ក៏ត្រូវបានមហាជន ភាគច្រើនគិតថា ប្រហែលជានាង មានម្ចាស់បេះដូង ដែលជាអ្នកមានទ្រព្យសម្បត្តិ ហើយមើលទៅ បានជានាងគិតតែ ពីដើរលេងមិនខ្វល់ រឿងការងារបែបនេះ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]