រាជធានីភ្នំពេញ ៖ បុរសជនជាតិចិនម្នាក់ ក្នុងចំណោមបក្សពួក២នាក់ ស្រវឹងស្រាជោកជាំចូលទៅម៉ាស្សារួចរាល់ហើយ ឃើញនារីម៉ាស្សាសាច់សខ្ចី ទ្រាំមិនបានក៏ស្ទុះទៅខ្ទប់មាត់សម្រាតខោអាវ បំណងចាប់រំលោភ តែត្រូវបុគ្គលិកម៉ាស្សាមិនព្រមក៏ប្រតាយប្រតប់គ្នាបង្កការភ្ញាក់ផ្អើល កាលពីវេលាម៉ោង១១ និង៣០នាទីយប់ ថ្ងៃទី២៥ ខែកញ្ញា ឆ្នាំ២០១៦ នៅចំណុចហាងម៉ាស្សាយីហោឡូទូស ស្ប៉ា និងសាឡន ដែលមានទីតាំងនៅខាងត្បូងវិទ្យាល័យបឹងកេងកង តាមបណ្តោយផ្លូវលេខ៣៩២ ស្ថិតក្នុងសង្កាត់បឹងកេងកងទី១ ខណ្ឌចំការមន ។
ប្រភពព័ត៌មានពីបុគ្គលិក ដែលធ្វើការនៅទីនោះបានឲ្យដឹងថា មុនពេលកើតហេតុមានជនជាតិចិន២នាក់ បានចូលមកម៉ាស្សានៅក្នុងហាង ខាងលើទាំងស្ថានភាពស្រវឹង ដោយបានចែកបន្ទប់២ផ្សេងគ្នា ហើយនៅពេលម៉ាស្សារួចនារីបម្រើការបានចូលទៅលាងដៃក្នុងបន្ទប់ទឹក ពេលនោះជនជាតិចិនដែលមានអាការៈ ស្រវឹងស្រាជោគជាំនោះបានចូលទៅឈរ ពីក្រោយនារីម៉ាស្សា ហើយយកដៃខ្ទប់មាត់ និងចាប់សម្រាតខោចេញបំណងចាប់រំលោភ ប៉ុន្តែនាងមិនព្រមដោយបាន ប្រតាយប្រតបគ្នារហូតឮដល់អ្នកនៅខាងក្រោម ។
ប្រភពដដែលបានបន្តថា បន្ទាប់ពីឮសម្លេងក្តុងក្តាំងពីក្នុងបន្ទប់ អ្នកនៅក្នុងហាងទាំងប្រុសទាំងស្រី បាននាំគ្នាស្ទុះឡើងទៅមើល ក៏ស្រាប់តែឃើញជនជាតិចិនម្នាក់នោះកំពុងតែចាប់ស្រាតខោនារីរងគ្រោះ ចេញរៀបនឹងចាប់រំលោភទៅហើយ ទើបនាំគ្នាចាប់ជនជាតិចិនម្នាក់នោះ និងជួយសម្រួលដង្ហើមដល់នារីរងគ្រោះ ដោយសារត្រូវគេខ្ទប់មាត់យូរពេក ។
ភ្លាមៗនោះ ជនបង្ក និងជនរងគ្រោះ បានធ្វើការសម្របសម្រួលគ្នា ដោយជនបង្កសុំទោស និងសុខចិត្តសងថ្លៃជំងឺចិត្ត ទៅនារីរងគ្រោះដោយមិនចង់មានរឿងវែងឆ្ងាយ តែមិនបានជាប់លុយ មកក៏ឲ្យមិត្តភក្តិទៅយកលុយ ។ ខណៈអង្គុយរង់ចាំមិត្តភក្តិរបស់ជនជាតិចិនទៅយកលុយយូរពេក ស្រាប់តែជនបង្កបានរត់ចេញពីក្នុងហាងម៉ាស្សាបំណងគេចខ្លួន។
ប៉ុន្តែសំណាងល្អ ត្រូវសន្តិសុខដេញតាម និងស្រែកចោរផ្អើលដល់សមត្ថកិច្ចដែលជិះល្បាតជួយដេញ មកដល់ចំណុចមុខ សណ្ឋាគារផាមទ្រី ស្ថិតនៅតាមបណ្តោយផ្លូវលេខ៣៩៨ បានទាក់ជើងដួលក៏ត្រូវអ្នកធ្វើការក្នុងហាង និងសមត្ថកិច្ចដែលដេញតាមពីក្រោយចាប់បានមកវិញ ។
បុគ្គលិកនៅទីនោះ បានបញ្ជាក់ឲ្យដឹងថា គ្រប់ភ្ញៀវទាំងអស់ដែលចូលមកម៉ាស្សាក្នុងហាង ពួកគាត់តែងតែនិយាយប្រាប់ថា ហាងនេះគ្រាន់តែម៉ាស្សាធម្មតាទេ មិនមានបម្រើសេវាផ្លូវភេទទេ ។
ក្រោយមកសមត្ថកិច្ច ក៏បានយកជនបង្កទៅកន្លែងកើតហេតុវិញ ហើយមួយសន្ទុះក្រោយមិត្តភក្តិជនបង្កបានមកដល់ហាងខាងលើដើម្បីធ្វើការសម្របសម្រួលជាមួយភាគីរងគ្រោះ ហើយក្នុងរឿងនេះក៏មិនបានដឹងថា ភាគីទាំង២សម្របសម្រួលគ្នាយ៉ាងណាដែរ ដោយមិនមាននណារម្នាក់បង្ហើបប្រាប់នោះទេ គ្រាន់តែដឹងថា ភាគីខាងរងគ្រោះទាមទារសងជំងឺចិត្ត៥០០ដុល្លារ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
