ខេត្តកំពង់ស្ពឺ ៖ លុយជិត១០ម៉ឺនដុល្លារអាមេរិក ត្រូវបានក្រុមចោរយកទៅបាត់ដោយសុវត្ថិភាព ខណៈមានសន្តិសុខយាម ទាំងយប់ទាំងថ្ងៃយ៉ាងព្រោងព្រាត ។
ហេតុការណ៍ចោរគាស់ទូដែក យកលុយនេះកើតឡើង កាលពីយប់ថ្ងៃទី១៩ ខែកញ្ញា ឆ្នាំ២០១៦ នៅក្នុងរោងចក្រកាត់ដេរសម្លៀកបំពាក់ វ៉ាយ ធី ស៊ី ខបប៉ូរ៉េសិន ដែលមានទីតាំងនៅភូមិវល្លិ៍ស ឃុំវល្លិ៍ស ស្រុកសំរោងទង ខេត្តកំពង់ស្ពឺ ។
លោកអនុសេនីយ៍ឯក ម៉ិច សុភាន់ អធិការរងនគរបាលស្រុកសំរោងទង បានឲ្យដឹងថា កាលពីយប់ (មិនដឹងម៉ោងប៉ុន្មាន) ថ្ងៃទី១៩ ខែកញ្ញា ឆ្នាំ២០១៦ ចោរ១ក្រុមមិនដឹងមុខ និងចំនួន បានធ្វើសកម្មភាពកាត់សោឃ្លាំងទូដែក និងកាត់សោបន្ទប់អគ្គនាយក របស់រោងចក្រកាត់ដេរសំលៀកបំពាក់ វ៉ាយ ធី ស៊ី ខបប៉ូរ៉េសិនយកលុយ តម្កល់ទុកសម្រាប់ចំណាយក្នុងរោងចក្រអស់ចំនួន ៤៥.៧៤៣,៥៧ (បួនម៉ឺនប្រាំពាន់ប្រាំពីររយសែសិបបីដុល្លារចុចហាសិបប្រាំពីរសែន) និងលុយខែ្មរចំនួន១១.៦៧១.៣០០រៀល(ដប់មួយលានប្រាំមួយរយចិតសិបមួយពាន់បីរយរៀល) ។
លោកអធិការរងបន្តថា លុះដល់ម៉ោង៦ និង៣០នាទីព្រឹកថ្ងៃទី២០ ខែកញ្ញា ឆ្នាំ២០១៦ ទើបសន្តិសុខវេនពេល ថ្ងៃចូលធ្វើការបានដឹង និងមានការភ្ញាក់ផ្អើលថា មានចោរមួយក្រុមបានធ្វើសកម្មភាពគាស់ លួចយកលុយអស់រាប់ម៉ឺនដុល្លារ ទើបខាងរោងចក្ររាយការណ៍មកសមត្ថកិច្ចឲ្យចុះទៅពិនិត្យ ។
សមត្ថកិច្ចស្រុកសំរោងទងបានឲ្យដឹងថា រោងចក្រ វ៉ាយ ធី ស៊ី ខបប៉ូរ៉េសិន (YTC CORPORATION) នេះមានអគ្គនាយកឈ្មោះ គឹម ម៉ីជីន ជនជាតិកូរ៉េ ។ ហើយរោងចក្រនេះមានសន្តិសុខយាមច្រើនណាស់ មិនគួរណាចោរហ៊ានលួចចូលគាស់នោះទេ ម្យ៉ាងទៀតខាងសន្តិសុខ ដែលយាមពេលយប់ហាក់ មិនចង់សហការជាមួយ សមត្ថកិច្ចដើម្បី ធ្វើការស្រាវជ្រាវឡើយ ។
សមត្ថកិច្ចនៅមិនទាន់បង្ហាញ តម្រុយណាមួយនៅឡើយទេ ដោយនិយាយថា ករណីនេះមានពន្លឺខ្លះហើយ ដោយសុំពេលប្រមូលភស្តុតាងបន្តិចសិន ពេលនេះជំនាញកំពុងសហការជាមួយកម្លាំ ងព្រហ្មទណ្ឌកម្រិតស្រាល និងជំនាញបច្ចេកទេសខេត្តដើម្បីស្រាវជ្រាវតាមរយៈ ស្នាមក្រយៅដៃដែលជាប់ នៅនឹងទូដែករកសាវតាពិតនៃម្ចាស់ស្នាមក្រយៅដៃទាំងនេះ ។
ទោះជាយ៉ាងណាមជ្ឈដ្ឋាន មហាជនបានដាក់ការសង្ស័យថា ក្រុមចោរដែលចូលមកលួចគាត់ទូដែកយកលុយ ដ៏ច្រើនសន្ឋឹកសន្ឋាប់បែបនេះ គ្មានមនុស្សខាងក្រៅឯណាធ្វើបានឡើយ គឺមានតែចោរស្រុកឲ្យដៃទេ ទើបចោរព្រៃហ៊ានចូល៕
ប្រភព៖ កោះសន្តិភាព
កំណត់ហេតុខ្មែរឡូត៖
គួររំលឹកព័ត៌មានចាស់ដែរថា ដោយឡែកករណីមួយវិញទៀត ចោរមួយក្រុមបើករថយន្តកុងតឺន័រ យកទៅគាស់ទូ ប្លន់យកសម្លៀកបំពាក់ជិត៣០០០កំប្លេ នៅស្រុកសំរោងទង។ កម្លាំងអាវុធហត្ថខេត្តកំពង់ស្ពឺ ក្រោមការដឹកនាំបញ្ជាផ្ទាល់ពីលោកឧត្តមសេនីយ៍ មេបញ្ជាការ ជូ សារុន នៅល្ងាចថ្ងៃទី២៣ ខែមិថុនា ឆ្នាំ២០១៦ កន្លងទៅ បានបើកប្រតិបត្តិការ ចុះបង្ក្រាបករណីចោរមួយក្រុម (អ្នកបើករថយន្ត) បានរួមគំនិតគ្នា បើករថយន្តកុងតឺន័រ យកទៅគាស់ទូ ប្លន់យកសម្លៀកបំពាក់ នៅស្រុកសំរោងទង ខេត្តកំពង់ស្ពឺ។
មន្រ្តីអាវុធហត្ថ បានឲ្យដឹងថា ជនសង្ស័យមិនទាន់ដឹងចំនួនពិតប្រាកដនោះ បានបើករថយន្ត កុងតឺន័រដឹកសម្លៀកបំពាក់ ម៉ាក Puma ឆ្ពោះទៅកំពង់ផែ ខេត្តព្រះសីហនុ ដើម្បីគ្រោងនាំចេញ ប៉ុន្តែពេលដល់ខេត្តកំពង់ស្ពឺ ក្នុងទឹកដីស្រុកសំរោងទង សម្រាប់អ្នកបើករថយន្ត បានបើកបង្ហួសទៅតាមផ្លូវជាតិលេខ៤៤ ដើម្បីគាស់ទូ ប្លន់យកសម្លៀកបំពាក់។
ពេលកំពុងធ្វើសកម្មភាពនោះ ទំនងដឹងខ្លួន ក្រុមចោរបានបើករថយន្តចេញទៅដោយបន្សល់ទុក សម្លៀកបំពាក់ចាក់ចោលនៅទីនោះ ។ មន្រ្តីអាវុធហត្ថ បានបញ្ជាក់ថា ពេលចុះរាប់នោះ ឃើញមានសម្លៀកបំពាក់ចំនួន២៧០បេ ដែលមួយបេមាន១១សម្លៀកបំពាក់។
នៅពេលនេះ កម្លាំងសមត្ថកិច្ច បាននិងកំពុងតាមបង្ក្រាបក្រុមចោរទាំងនោះ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]