ខេត្តបន្ទាយមានជ័យ ៖ ប្តីចោទថាប្រពន្ធរវល់លេងទូរស័ព្ទមិនព្រមដួសបាយឲ្យហូប និងមិនព្រមចូលគេង ចំណែកប្រពន្ធថា ប្តីស្រវឹងស្រាបិទទ្វារមិនឲ្យចូលផ្ទះ ក៏ផ្ទុះជម្លោះបណ្ដាលឲ្យរបួសទាំងសងខាង និងបង្កឲ្យមានការភ្ញាក់ផ្អើលកាលពីវេលាម៉ោងជាង៨យប់ ថ្ងៃទី១៩ ខែកញ្ញា ឆ្នាំ២០១៦ នៅភូមិផ្សារកណ្ដាល សង្កាត់ផ្សារកណ្តាល ក្រុងប៉ោយប៉ែត ។
គ្រួសារផ្ទុះជម្លោះខាងលើនេះ ប្តីឈ្មោះ អាន ហេង អាយុ៣៤ឆ្នាំ ជាកម្មករសំណង់ ស្នាក់នៅបន្ទប់ជួលក្នុងភូមិកើតហេតុខាងលើ រីឯប្រពន្ធឈ្មោះ ម៉ែន អូន អាយុ៣៧ឆ្នាំ កម្មកររោងចក្រ ហាត ឌីស្ក នៅក្រុងប៉ោយប៉ែត ។
បុរសជាប្តីគេឃើញរបួសកែងដៃស្តាំ ហើយអះអាងថាជាស្នាដៃប្រពន្ធគប់និងដុំឥដ្ឋ ។ ចំណែងនាងជាប្រពន្ធរងរបួសជើងទាំងសងខាង និងស្មាខាងស្តាំ អះអាងថា ដោយសារស្នាដៃបុរសជាប្តីគប់និងកៅអី និងខាំ ពេលប្រតាយប្រតប់គ្នា ។
បុរសជាប្តីបានប្រាប់ឲ្យដឹងថា ដំបូងខ្លួនមកពីធ្វើការ ហៅប្រពន្ធដួសបាយឲ្យញ៉ាំ នាងមិនត្រឹមតែមិនដួសឲ្យទេ ហើយហៅថែមទាំងចូលដេកទៀត គឺនាងរវល់វក់លេងទូរស័ព្ទ ខ្លួនក៏បិទទ្វារតែម្តង ។ បុរសរូបនោះបន្តថា ដោយសារនាងរំខានដំណេកគាស់ទ្វារមិនឈប់ ក៏បើកទ្វាររុញនាងមិនឲ្យចូលផ្ទះ ស្រាប់តែផ្ទុះជាជម្លោះដោយនាងទាញដុំឥដ្ឋគប់ខ្លួនឲ្យរបួស ទើបទ្រាំមិនបានទះមួយកំភ្លៀងទៅ ។
បុរសជាប្តីបន្តថា ក្នុងជម្លោះនាងជាប្រពន្ធបានលោកធាក់ខ្លួនមួយជើង ហើយដោយសារខឹងពេកក៏គប់១កៅអីជ័រវិញដែរ មិនតែប៉ុណ្ណោះបុរសនេះអះអាងថា ពេលប្រតាយប្រតប់គ្នាគិតថាមិនឈ្នះនាងក៏ខាំនាងចំស្មាស្តាំតែម្តង ។ យ៉ាងណាក៏ដោយបុរសរូបនោះទទួលស្គាល់ថា ខ្លួនបានស្រវឹង គឺមុនមានជម្លោះផឹកស្រាបៀអស់៤-៥កំប៉ុង ។
ជុំវិញបញ្ហាខាងលើ នាងជាប្រពន្ធបានច្រានចោលការចោទប្រកាន់ថា នាងរវល់លេងទូរស័ព្ទ តែការពិតនាងថាពេលប្តីមកពីធ្វើការបានរៀបចំបាយទឹកឲ្យប្តីរួចហើយ តែប្តីនាងក្រោយបាយបែរជាផឹកស្រាស្រវឹងចូលបន្ទប់បិទទ្វារមិនឲ្យនាងចូលផ្ទះ មិនតែប៉ុណ្ណោះពេលនាងហៅឲ្យបើកទ្វារបែរជាបុរសជាប្តីដាល់មួយដៃចំមុខ ទើបក្លាយជាជម្លោះកើតឡើង ។
ស្ត្រីជាប្រពន្ធប្រាប់ថា បុរសខាងលើជាប្តីទី២ទើបរស់នៅជុំគ្នាបាន៨ខែប៉ុណ្ណោះ ដោយប្តីមុននាងមានកូន២នាក់ តែប្តីនាងលួចទៅមានស្រីផ្សេង នាងក៏សម្រេចចែកផ្លូវ ដឹងអីមកយកប្តីក្រោយនេះរងកម្ម ត្រូវគេវាយធ្វើបាប និងគំរាមកំហែងញយដង ។ នាងបញ្ជាក់ថា នឹងមិនយកប្តីក្រោយនេះទៀតទេ ។
ទោះជាបែបណា គូជម្លោះខាងលើដោយសារនាងជាប្រពន្ធទាក់ទងទៅសមត្ថកិច្ចសុំការអន្តរាគមន៍ជួយ ទើបបុរសជាប្តីក្លាយជនសង្ស័យបង្កហិង្សាក្នុងគ្រួសារ ត្រូវនគរបាលប៉ុស្តិ៍រដ្ឋបាលសង្កាត់ផ្សារកណ្តាលសហការជាមួយនគរបាលក្រុងឃាត់ខ្លួនយកទៅអធិការដ្ឋាននគរបាលក្រុងប៉ោយប៉ែត ដើម្បីសួរនាំទាំងយប់តែម្តង ៕
ប្រភព៖ កោះសន្តិភាព
កំណត់ហេតុខ្មែរឡូត៖ ដោយឡែក ករណីមួយផ្សេងទៀត កាលពីលើកមុន ករណីហិង្សាក្នុងគ្រួសារដ៏រន្ធត់មួយបានកើតឡើងបង្កឲ្យមានការភ្ញាក់ផ្អើល បន្ទាប់ស្ត្រីជាប្រពន្ធ បានយកកូនកាំបិតចុងស្រួចទៅចាក់ប្តីជាច្រើនកាំបិត រួចចាក់ខ្លួនឯងបណ្តាលឲ្យរងរបួសធ្ងន់ទាំង២នាក់កាលពីវេលាម៉ោង៨យប់ ថ្ងៃទី១៩ ខែសីហា ឆ្នាំ២០១៦ នៅភូមិបឹងស្នោរ ឃុំស្លក្រាម ស្រុកស្វាយចេក ខេត្តបន្ទាយមានជ័យ ។
លោកវរសេនីយ៍ត្រី ជា ស្លូញ អធិការនគរបាលស្រុកស្វាយចេក បានឲ្យដឹងថា មុនពេលកើតហេតុប្តីប្រពន្ធនេះ បានផឹកស្រាជុំគ្នារហូតស្រវឹងរៀងខ្លួន តែមិនដឹងថាប្រពន្ធខឹងប្តីដោយសាររឿងអ្វីទេ ក៏ស្រាប់តែឈ្មោះ ផូ សុធន អាយុ២២ឆ្នាំ ជាប្រពន្ធ បានស្ទុះទៅយកកូនកាំបិតចុងស្រួចចាក់ប្តីឈ្មោះ ពៅ សានិត អាយុ៣២ឆ្នាំ បណ្តាលឲ្យរបួសពេញខ្លួន ក្រោយមកប្តីក៏បាននិយាយថា អញឈប់យកនាងឯងធ្វើជាប្រពន្ធ ហើយភ្លាមៗនោះស្ត្រីជាប្រពន្ធក៏បានចាក់ខ្លួនឯងដោតកាំបិតជាប់នឹងពោះរងរបួសធ្ងន់ទាំងអស់គ្នា ។
លោកអធិការ បញ្ជាក់ថា ក្រោយពីកើតហេតុ ប្តីប្រពន្ធ២នាក់នេះត្រូវបានបងប្អូនដឹកយកទៅសង្គ្រោះនៅមណ្ឌលសុខភាពឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ។
បើតាមការសាកសួរ ក្នុងពេលផឹកនោះប្តីនិយាយលេងថា បើបានប្រពន្ធចេះផឹកស្រាអញមិនយកទេ ទៅយកស្រីក្មេងជាងនេះហើយមិនចេះផឹកវិញល្អជាង ។ ប្រហែលដោយសារការនិយាយលេងនេះហើយទើបធ្វើឲ្យប្រពន្ធខឹង យកកូនកាំបិតមកចាក់ប្តីតែម្តងទៅ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
