រាជធានីភ្នំពេញ៖ តារាភាពយន្តល្បីឈ្មោះជំនាន់ទសវត្សទី៦០-៧០ អ្នកស្រីវីរៈ តារា បានមកប្រទេសកម្ពុជាដើម្បីចូលរួមកម្មវិធី «មួយម៉ឺនអាល័យ» ដែលចាក់បញ្ចាំងខ្សែភាពយន្តជំនាន់អ្នកស្រីនោះ ។
ប្រសិនសាមីខ្លួនមិនប្រាប់ពីអាយុ គឺនឹកស្មានថាអ្នកស្រីវីរៈ តារា មានវ័យត្រឹមតែ៥០ឆ្នាំប៉ុណ្ណោះ តែការណ៍ពិតមានវ័យជិត៧០ឆ្នាំទៅហើយ ។ អ្នកស្រីវីរៈ តារា នៅតែស្រស់ស្អាតបែបវ័យចំណាស់និងមានអត្តចរិតសមសួនជាស្ត្រីខ្មែរតាំងពីការនិយាយស្តី ។ អ្នកស្រីវីរៈ តារា មកប្រទេសកំណើតនេះក្នុងរយៈពេល១ខែ ហើយប្រសិនបើមានពេលគ្រប់គ្រាន់អាចបង្ហាញវត្តមានតាមបណ្តាស្ថានីយទូរទស្សន៍នានា ។
បញ្ជាក់ប្រាប់អ្នកយកព័ត៌មានក្នុងកិច្ចសម្ភាសកាលពីពេល ថ្មីៗកន្លងមក អ្នកស្រីវីរៈ តារា ឱ្យដឹងថា អ្នកស្រីមកលេងប្រទេសកម្ពុជា បានច្រើនដងហើយតាំងពីអំឡុងឆ្នាំ១៩៩០មក។ ក្នុងចិត្តចង់មករស់នៅស្រុកយើងវិញ តែជាប់ភារៈមើលថែកូនចៅនៅទីនោះមិនអាចមកបាន ។
អ្នកស្រីវីរៈ តារា មានកូន៦នាក់ ប្រុស៥ នាក់ ស្រីម្នាក់ និងចៅ១២នាក់ ។ កូនទាំង៦នាក់ នៅសល់ពីរនាក់ទៀតមិនទាន់រៀបការ ។ ក្នុងចំណោមកូន៦នាក់នោះមានកូនប្រុសម្នាក់មាននិស្ស័យសិល្បៈ គឺមានជំនាញខាងថត និងដឹកនាំរឿងដោយរៀននៅហូលីវូដ ។
នៅមានចិត្តចង់ចូលប្រឡូកសិល្បៈ ប៉ុន្តែយោងលើពេលវេលា ទើបធ្វើឱ្យអ្នកស្រីវីរៈ តារា អាក់ខាន ។ ទោះជាយ៉ាងណាក្តី ប្រហែលជាពេលណាមួយអ្នកស្រីវីរៈ តារានឹងលៃលកពេលឱ្យបានដើម្បីចូលរួមសម្តែងគ្រាមានវ័យចំណាស់ ។
នៅពេលសួរនាំពីការថែរក្សាសម្រស់ឱ្យស្ថិតក្នុងសភាពស្រស់សោភាបានយូរ អ្នកស្រីវីរៈ តារា ផ្តល់បទពិសោធន៍ថា មកពីអ្នកស្រីមិនសូវមានជំងឺ ហើយមិនគិតច្រើន ធ្វើអារម្មណ៍ឱ្យធូរស្រាល ។ មិនទទួលទានគ្រឿងស្រវឹង និងហាត់ប្រាណជាប្រចាំ ។ មួយទៀតវិធីដែលធ្លាប់ធ្វើគឺខំធ្វើការ ហើយពេលបានប្រាក់សប្បាយចិត្តក៏អាចជួយឱ្យក្មេងជាងវ័យដែរ ។
អ្នកស្រីវីរៈ តារា បញ្ជាក់ថា «មកកម្ពុជាពេលនេះតាមសំណូមពរក្រុមយុវជនព្រះសុរិយា ដែលខិតខំស្រាវជ្រាវឯកសារសិល្បៈ ចាស់ៗ។ ពួកគេអញ្ជើញខ្ញុំមក ដូចនេះខ្ញុំសប្បាយចិត្តចង់លើកទឹកចិត្តគ្នា កម្រមានក្មេងសម័យនេះចេះដឹងនឹកឃើញណាស់ ខំប្រមូលការងារ ស្វែងរកមូលនិធិជួយដល់អ្នកសិល្បៈចាស់ជរានៅរស់រានសល់ពីសម័យសង្គមមកម្ល៉េះ នេះជាចំណុចដែលខ្ញុំត្រូវមកវិញម្តងទៀត » ។
អ្នកស្រីវីរៈ តារា ធ្លាប់ចូលរួមសម្តែងភាពយន្តចំនួន១២រឿង ក្នុងនោះមានរឿង «សព្វសិទ្ធិ» រឿង «ពុទ្ធិសែននាងកង្រី» និងរឿង «អនអើយស្រីអន» ជាដើម ។
ចំពោះវិស័យភាពយន្តខ្មែរសព្វថ្ងៃអ្នកស្រីវីរៈ តារាយល់ឃើញថា តារាយើងជំនាន់ក្រោយក្លាហានក្នុងការសម្តែង ។ មិនតែប៉ុណ្ណោះមានអ្នកមានទេពកោសល្យល្អច្រើននាក់ ប៉ុន្តែគួរចាំបាច់ហ្វឹកហាត់បន្ថែម និងឆ្លៀតពេលមើលរៀមច្បង ព្រមទាំងមានសាលាត្រឹមត្រូវ ៕
ប្រភព៖ កោះសន្តិភាព
កំណត់ហេតុខ្មែរឡូត៖ ស្រដៀងគ្នានេះផងដែរ គួរឲ្យដឹងថា តារាសម្តែងដ៏ល្បីល្បាញ ក្នុងទស្សវត្សទី៨០ អ្នកនាង អម្ពរ ទេវី គឺបានមកដល់ទឹកដីកម្ពុជាហើយ កាលពីប៉ុន្មានថ្ងៃមុននេះ។
ចំពោះវត្តមានរបស់ តារាស្រីរូបនេះ បានធ្វើឲ្យអ្នកគាំទ្រភ្ញាក់ផ្អើល និងរីករាយពន់ពេក ព្រោះនឹងបានមើលស្នាដៃក្នុងការសម្តែងរបស់ អ្នកនាងម្តងទៀត តាមរយៈរឿងថ្មី ចំណងជើងថា"ទឹកចិត្តម្តាយសម័យថ្មី" ដែលដឹកនាំដោយ អ្នកស្រី ពាន់ ភួងបុប្ផា។
ដោយយោងតាមរូបថតជាច្រើនសន្លឹក របស់ទំព័រហ្វេសប៊ុកសិល្បករកម្ពុជា បានបង្ហាញឲ្យឃើញ នូវរូបសម្រស់របស់ អ្នកនាង អម្ពរ ទេវី យ៉ាងស្រស់សោភា ទោះបីពេលនេះនាងមានវ័យជ្រេបន្តិចក៏ដោយ។
ក្នុងនោះដែរ ទំព័រហ្វេសប៊ុកសិល្បករកម្ពុជា ក៏បានសរសេរបញ្ជាក់ដែរថា អ្នកនាង អម្ពរទេវី នឹងមកថតរឿង ទឹកចិត្តអ្នកម្តាយសម័យថ្មី មានរយៈពេលត្រឹម៣០ថ្ងៃតែប៉ុណ្ណោះ ហើយនេះក៏ជាវត្តមានដែលប្លែក និងគួរឲ្យចាប់អារម្មណ៍បំផុតក្នុងវិស័យភាពយន្តខ្មែរ ដែលអ្នកនាង សម្ពរទេវី បានបាត់មុខក្នុងវិស័យភាពយន្ត អស់រយៈពេលជាង២០ឆ្នាំកន្លងមកនេះ៕
ចុះតើប្រិយមិត្ត នឹងចង់រង់ចាំមើលស្នាដៃក្នុងការសម្តែង របស់អ្នកនាង អម្ពរទេវី សាជាថ្មីដែរទេ?
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]