(ឧត្តរមានជ័យ)៖ ក្មេងប្រុសអាយុ២ឆ្នាំម្នាក់ បានស្លាប់គួរឲ្យអាសូរ ខណៈដែលឪពុកម្ដាយបង្កើត បានទុកកូនរបស់ខ្លូន ឲ្យយាយតាមើលថែ ហើយខ្លួនបានទៅរកស៊ីនៅប្រទេសថៃ។ ហេតុការណ៍នេះ កើតឡើងនៅព្រឹកថ្ងៃទី២១ ខែកក្កដា ឆ្នាំ២០១៦នេះ ស្ថិតក្នុងភូមិជើងទៀន ឃុំជើងទៀន ស្រុកចុងកាល ខេត្តឧត្តរមានជ័យ។
សមត្ថកិច្ចនគរបាលមូលដ្ឋាន បានឲ្យដឹងថា មុនពេលកើតហេតុក្មេងរងគ្រោះ បានជិះកង់រុញលេងក្បែផ្ទះ ខណៈដែលលោកយាយ របស់ក្មេងប្រុសនោះមានជម្ងឺថ្លង់ ហើយកំពុងអង្គុយធ្វើត្រីក្បែផ្ទះ និងជីតាកំពុងធ្វើទ្រុងទា លុះមួយសន្ទុះក្រោយមក ពួកគាត់បាត់ចៅមិនឃើញ ក៏បាននាំគ្នាដើររក ស្រាប់តែពេលនោះឃើញ ចៅស្លាប់អណ្តែតទឹកបាត់ទៅហើយ។ សមត្ថកិច្ចបន្ដថា ក្មេងប្រុសដែលស្លាប់ឈ្មោះ ជើន ណាចេ មានឪពុកឈ្មោះ ចាន់ ជួយ អាយុ២៣ឆ្នាំ និងម្ដាយឈ្មោះ ពឿន ស្រីនី អាយុ២០ឆ្នាំ។
ក្រោយពេលកើតហេតុសមត្ថកិច្ចជំនាញ បានចុះទៅដល់កន្លែងកើតហេតុភា្លមៗដើម្បីពិនិត្យសាកសព ហើយរកឃើញថាក្មេងប្រុសនេះ ពិតជាស្លាប់ដោយលង់ទឹកពិតប្រាកដមែន និងបានប្រគល់ឲ្យក្រុមគ្រួសារ ធ្វើបុណ្យតាមប្រពៃណី៕
ប្រភព៖ Fresh News
កំណត់ហេតុខ្មែរឡូត៖ ស្រដៀងគ្នានេះដែរ ករណីមួយផ្សេងទៀត ឪពុកម្ដាយធ្វេសប្រហែស កូនអាយុ២ឆ្នាំលង់ទឹកស្លាប់ គួររំលឹកផងដែរថា ក្មេងប្រុសម្នាក់អាយុទើបតែបាន២ឆ្នាំ បានលង់ទឹកស្លាប់ នៅក្នុងស្រះទឹកមួយកន្លែងនៅក្បែរផ្ទះចម្ងាយប្រហែលជា ៥០ម៉ែត្រ ស្ថិតនៅក្នុងភូមិចុងកាល់ ឃុំចុងកាល់ ស្រុកចុងកាល់ ខេត្តឧត្តរមានជ័យ។ ក្មេងប្រុសរងគ្រោះឈ្មោះ គ្រឿន មករា អាយុ ២ឆ្នាំ ហើយឪពុកកុមាររងគ្រោះឈ្មោះ ប៉ាត គ្រឿន អាយុ៣២ឆ្នាំ មុខរបរជាមន្ត្រីយោធា ចំណែកឯម្តាយឈ្មោះ តុល ភាត់ អាយុ២៦ឆ្នាំ មុខរបរ ជាកសិករ មានទីលំនៅក្នុងភូមិ-ឃុំកើតហេតុខាងលើ។
ហេតុការណ៍ដែលបានរកឃើញសាកសពកុមាររងគ្រោះ កាលពីវេលាម៉ោង៩ និង៣០នាទីព្រឹក ថ្ងៃទី១២ ខែកក្កដា ឆ្នាំ២០១៦ បើតាមរៀបរាប់ពីស្ត្រីជាម្ដាយបានឱ្យដឹងថា នៅមុនកើតហេតុកុមាររងគ្រោះ នឹងមានក្មេងជាច្រើនផ្សេងទៀត បានលេងទឹកនៅក្បែរផ្ទះ។
ខណៈមេឃកំពុងតែភ្លៀង ហើយខ្លួនជាម្ដាយ កំពុងជាប់រវល់ធ្វើកិច្ចការងារផ្ទះ ចំណែកឯឪពុក ជាប់រវល់ទៅបន្ទាយទាហាន ដោយសំអាងកូនរបស់ខ្លួន កំពុងតែលេងទឹកភ្លៀងជាមួយក្មេងៗ ក្នុងភូមិ នៅក្បែរផ្ទះ មិនបានចាប់អារម្មណ៍។ នៅពេលរកកូនប្រុស ដើម្បីបញ្ចុកបាយ ក៏ស្រាប់តែបាត់ ហើយបានសួរទៅក្មេងដែលលេងជាគ្នា ក៏រកមិនឃើញ ហើយថែមទាំងបានដើររកនៅតាមទឹកថ្លុក និងទឹកពាងនៅក្បែរផ្ទះ ក៏រកមិនឃើញទៀត។
ពេលនោះសាច់ញាតិ និងអ្នកជិតខាង ក៏ជួយរកដែរ ដោយមានការសង្ស័យ ក៏ទៅរកនៅស្រះ ដែលមានចម្ងាយពីផ្ទះប្រហែលជា ៥០ម៉ែត្រ ហើយពេលទៅដល់ក៏ឃើញសពកុមាររងគ្រោះអណ្តែតចេញពីទឹក ឪពុកម្ដាយ និងអ្នកជិតខាងឃើញសភាពបែបនេះមានក្ដីតក់ស្លុតបំផុត។
ភ្លាមៗនោះខ្លួនជាម្តាយបានរាយការណ៍ដល់សមត្ថកិច្ច ចុះមកពិនិត្យ និងធ្វើកោសល្យវិច័យ។ ក្រោយពិនិត្យសាកសពរួចសមត្ថកិច្ចបានប្រគល់សព ឳ្យក្រុមគ្រួសារធ្វើបុណ្យតាមប្រពៃណី៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
