ខេត្តឧត្តរមានជ័យ ៖ ក្មេងប្រុសម្នាក់អាយុទើបតែបាន២ឆ្នាំ បានលង់ទឹកស្លាប់ នៅក្នុងស្រះទឹកមួយកន្លែងនៅក្បែរផ្ទះចម្ងាយប្រហែលជា ៥០ម៉ែត្រ ស្ថិតនៅក្នុងភូមិចុងកាល់
ឃុំចុងកាល់ ស្រុកចុងកាល់ ខេត្តឧត្តរមានជ័យ។ ក្មេងប្រុសរងគ្រោះឈ្មោះ គ្រឿន មករា អាយុ ២ឆ្នាំ ហើយឪពុកកុមាររងគ្រោះឈ្មោះ ប៉ាត គ្រឿន អាយុ៣២ឆ្នាំ មុខរបរជាមន្ត្រីយោធា ចំណែកឯម្តាយឈ្មោះ តុល ភាត់ អាយុ២៦ឆ្នាំ មុខរបរ ជាកសិករ មានទីលំនៅក្នុងភូមិ-ឃុំកើតហេតុខាងលើ។
ហេតុការណ៍ដែលបានរកឃើញសាកសពកុមាររងគ្រោះ នៅវេលាម៉ោង៩ និង៣០នាទីព្រឹក ថ្ងៃទី១២ ខែកក្កដា ឆ្នាំ២០១៦ បើតាមរៀបរាប់ពីស្ត្រីជាម្ដាយបានឱ្យដឹងថា នៅមុនកើតហេតុកុមាររងគ្រោះ នឹងមានក្មេងជាច្រើនផ្សេងទៀត បានលេងទឹកនៅក្បែរផ្ទះ។
ខណៈមេឃកំពុងតែភ្លៀង ហើយខ្លួនជាម្ដាយ កំពុងជាប់រវល់ធ្វើកិច្ចការងារផ្ទះ ចំណែកឯឪពុក ជាប់រវល់ទៅបន្ទាយទាហាន ដោយសំអាងកូនរបស់ខ្លួន កំពុងតែលេងទឹកភ្លៀងជាមួយក្មេងៗ ក្នុងភូមិ នៅក្បែរផ្ទះ មិនបានចាប់អារម្មណ៍។ នៅពេលរកកូនប្រុស ដើម្បីបញ្ចុកបាយ ក៏ស្រាប់តែបាត់ ហើយបានសួរទៅក្មេងដែលលេងជាគ្នា ក៏រកមិនឃើញ ហើយថែមទាំងបានដើររកនៅតាមទឹកថ្លុក និងទឹកពាងនៅក្បែរផ្ទះ ក៏រកមិនឃើញទៀត។
ពេលនោះសាច់ញាតិ និងអ្នកជិតខាង ក៏ជួយរកដែរ ដោយមានការសង្ស័យ ក៏ទៅរកនៅស្រះ ដែលមានចម្ងាយពីផ្ទះប្រហែលជា ៥០ម៉ែត្រ ហើយពេលទៅដល់ក៏ឃើញសពកុមាររងគ្រោះអណ្តែតចេញពីទឹក ឪពុកម្ដាយ និងអ្នកជិតខាងឃើញសភាពបែបនេះមានក្ដីតក់ស្លុតបំផុត។
ភ្លាមៗនោះខ្លួនជាម្តាយបានរាយការណ៍ដល់សមត្ថកិច្ច ចុះមកពិនិត្យ និងធ្វើកោសល្យវិច័យ។ ក្រោយពិនិត្យសាកសពរួចសមត្ថកិច្ចបានប្រគល់សព ឳ្យក្រុមគ្រួសារធ្វើបុណ្យតាមប្រពៃណី៕
ប្រភព៖ កោះសន្តិភាព
កំណត់ហេតុខ្មែរឡូត៖
គួររំលឹកដែរថា ដោយឡែកករណីស្រដៀងគ្នានេះដែរ ប្រជាពលរដ្ឋនៅក្រុងប៉ោយប៉ែត ល្ងាចថ្ងៃទី៤ ខែកក្កដា ឆ្នាំ២០១៦ កន្លងទៅ បានប្រទះឃើញ សាកសពក្មេងប្រុស អណ្តែតទឹកស្រះ នៅចំណុច (ដើមស្រល់ របស់ក្រុមហ៊ុនហ្គោលឌិន) ភូមិសាមគ្គីមានជ័យ សង្កាត់/ក្រុងប៉ោយប៉ែត។
គរបាលការពារព្រំដែន៩១១ បានឲ្យភ្នាក់ងារ Fresh News ថា ក្រោយពីប្រជាពលរដ្ឋប្រទះឃើញសាកសព ក្មេងប្រុសខាងលើ កម្លាំងបានធ្វើការស្រាវជ្រាវរកឪពុកម្តាយភ្លាមៗ សាកសពឈ្មោះ កក្កដា ពិសិដ្ឋ ភេទប្រុស អាយុ១០ឆ្នាំ ឪពុកម្តាយ រស់នៅមណ្ឌល២ ស្ថិតភូមិប្រជាធម្មកើត សង្កាត់ផ្សារកណ្តាល ក្រុងប៉ោយប៉ែត។
បើតាមឪពុកម្តាយក្មេងរងគ្រោះ បានឲ្យដឹងថា ក្មេងនេះបានបាត់ខ្លួនតាំង ពីថ្ងៃទី៣ ខែកក្កដា ឆ្នាំ២០១៦ មកម្ល៉េះ ខណៈកុមារារងគ្រោះខាងលើមកលេងជាមួយឪពុកមារ និងម្តាយមីងនៅចំណុចនេះ ហើយបានចុះលេងទឹកស្រះរួចក៏បាត់ខ្លួនតែម្តង ។
បច្ចុប្បន្ននេះ សមត្ថកិច្ចបានធ្វើកោសល្យវិច័យសពក្មេងប្រុស មិនមានស្នាកស្នាមអ្វីពាក់ព័ន្ធនិងឃាតកម្មទេ សពក្មេងប្រុសនេះពិតជាលង់ទឹកពិតប្រាកដមែន។
សមត្ថកិច្ចបានប្រគល់សពក្មេង ទៅឪពុកម្តាយយកទៅធ្វើបុណ្យតាមប្រពៃណី៕
ទន្ទឹមនឹងនោះផងដែរ រំលឹកព័ត៌មានចាស់ ក្មេងប្រុសម្នាក់លង់ទឹកប្រឡាយស្លាប់ ខណៈម្តាយកំពុងជជែក គ្នាលេងក្រោមផ្ទះ ភ្លេចគិតកូន នៅល្ងាចថ្ងៃទី៣០ ខែមិថុនា ឆ្នាំ២០១៦ កន្លងដែរ នៅចំណុចប្រឡាយ ស្ថិតក្នុងភូមិម៉ាន់ចែ សង្កាត់ព្រៃញី ក្រុងពោធិ៍សាត់ ខេត្តពោធិ៍សាត់។
លោក ឈន រិទ្ធិ អធិការនគរបាល ក្រុងពោធិ៍សាត់ បានប្រាប់ភ្នាក់ងារ Fresh News ឱ្យដឹងព្រឹកនេះថា ក្មេងរងគ្រោះដែលលង់ទឹកស្លាប់ មានឈ្មោះ ឡេង សៀវ អាយុ៣ខួប ឪពុកឈ្មោះ ឡាញ់ ចាន់ឡា អាយុ៣២ឆ្នាំ និងម្តាយឈ្មោះ ឈន ប្រឹម អាយុ២៦ឆ្នាំ រស់នៅភូមិ សង្កាត់កើតហេតុខាងលើ។
លោកអធិការ បានឲ្យដឹងទៀតថា មុនពេលកើតហេតុ ម្តាយក្មេងរងគ្រោះ បាននាំកូនទៅលេងផ្ទះអ្នកភូមិ ជាមួយគ្នាលុះទៅដល់ក៏បាន អង្គុយជជែកគ្នាលេងនៅក្រោមផ្ទះ ហើយក្មេងរងគ្រោះក៏បានរត់លេងនៅក្បែរៗនោះដែរ ស្រាប់តែមួយសន្ទុះក្រោយមករកមើលកូន មិនឃើញ ក៏ដើររកកូនក៏ប្រទះឃើញអណ្តែត នៅក្នុងប្រឡាយទឹក នាំគ្នាផ្អើតឆោឡោចុះស្រង់ជួយសង្គ្រោះ។
លោកអធិការបន្ថែមថា ដោយម្តាយក្មេងរងគ្រោះមិនអស់ចិត្ត ក៏បញ្ជូនកូនរបស់ខ្លួនទៅ សង្គ្រោះនៅមន្ទីរពេទ្យបង្អែកពោធិ៍សាត់ តែជាអកុសល ពេទ្យបានបញ្ជាក់ថា ក្មេងនោះបានដាច់ខ្យល់ស្លាប់បាត់ទៅហើយ។
ក្រោយពេលកើត ហេតុសពក្មេងរងគ្រោះ ត្រូវបានក្រុមគ្រួសារយកទៅធ្វើបុណ្យតាមប្រពៃណី។ សូមបញ្ជាក់ថា ដំណឹងនេះបានទៅដល់ លោក ម៉ៅ ធនិន អភិបាលខេត្ត បានចាត់ឲ្យលោក ចាប នាង អភិបាលក្រុងពោធិ៍សាត់ ចូលរួមរំលែកទុក្ខដល់គ្រួសារសពនិងបានផ្តល់ នូវអង្ករ៤០គីឡូក្រាម មី២កេស ទឹកស៊ីអ៊ីវ២យួរ ថវិកា១០ម៉ឺនរៀល សម្រាប់ចាត់ចែងធ្វើបុណ្យទៅតាមប្រពៃណី៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]