កណ្តាល៖ មន្ត្រីនគរបាលចរាចរណ៍ រាជធានីភ្នំពេញ ម្នាក់ បានស្លាប់ភ្លាមៗនៅកន្លែងកើតហេតុ បន្ទាប់ពីបានបើកម៉ូតូ រ៉េចង្គូតទៅបុកគ្រែលក់ដូរតាមផ្លូវ នៅវេលាម៉ោង ២៣៖៥០នាទី ថ្ងៃទី២៩ ខែមេសា ឆ្នាំ២០១៦ នៅលើកំណាត់ផ្លូវជាតិ លេខ១១០ ក្នុងភូមិឈើទាល ឃំុឈើទាល ស្រុកកៀនស្វាយ ខេត្តកណ្តាល។
លោក ព្រុំ សំណាង អធិការរងនគរបាលស្រុកកៀនស្វាយ បានឲ្យដឹងថា ជនរងគ្រោះមានឈ្មោះប៉ុក វិរៈ ហៅសុង ភេទប្រុសអាយុ៥៥ឆ្នាំ ជាមន្ត្រីនគរបាលចរាចរណ៍រាជធានីភ្នំពេញ (ស្លាប់) នៅកន្លែងកើតហេតុ ។
លោកអធិការ បញ្ជាក់ថា ជនរគ្រោះបើកម៉ូតូម៉ាកនិច ពណ៌ត្រួយចេក គ្មានស្លាកលេខបានធ្វើដំណើរ ចេញពីច្បារអំពៅទៅឃំុកំពង់ស្វាយលុះមកដល់ត្រង់ចំណុច ខាងលើសង្ស័យងងុយដេក ក៏រ៉េចង្គូតម៉ូតូ ទៅបុកជាមួយគ្រែលក់ដូរ នៅលើចញ្ចើមផ្លូវខាងស្តាំដៃបណ្តាលស្លាប់។
លោកអធិការថា ក្រោយពីកើតហេតុសមត្ថកិច្ច ជំនាញបានចុះទៅកន្លែងកើតហេតុ ហើយបានប្រគល់សាកសព ជូនក្រុមគ្រួសារយកទៅធ្វើបុណ្យតាមប្រពៃណី៕
ប្រភព៖ ដើមអម្ពិល
កំណត់ហេតុខ្មែរឡូត៖
ជាមួយគ្នានេះផងដែរ ខណៈដែលមេឃកំពុងតែភ្លៀង ក៏មានករណីគ្រោះថ្នាក់ចរាចរណ៍ មួយកើតឡើង ស្ថិតលើកំណាត់ ផ្លូវជាតិលេខ៥ រវាងរថយន្តសាំយ៉ុងមួយគ្រឿង បានបើកទៅបុករថយន្តហ៊ីណូ ពីក្រោយដែលចតនៅស្ងៀម បណ្ដាលឱ្យរួញមួយកំណាត់មុខ ស្លាប់មនុស្សម្នាក់ និងរងរបួសធ្ងន់ម្នាក់ កាលពីវេលាម៉ោង ០២រំលងអាធ្រាត្រឈានចូលថ្ងៃទី៣០ មេសា ២០១៦ ស្ថិតក្នុងភូមិក្រាំងធំ ឃុំអូរសណ្ដាន់ ស្រុកក្រគរ ខេត្តពោធិ៍សាត់ ។
ប្រភពឱ្យដឹងថា ជនរងគ្រោះដែលស្លាប់ឈ្មោះអ៊ុក វុទ្ធី ភេទប្រុស អាយុ៣៣ឆ្នាំ មានទីលំនៅភូមិថ្មី ឃុំផ្សារស្រុកបរិបូរណ៍ ខេត្តកំពង់ឆ្នាំង (ជាព្រូរថយន្ត) ។ អ្នកបើកមិនស្គាល់ឈ្មោះ រងរបួសយ៉ាងធ្ងន់ធ្ងរបំផុតបញ្ជូនទៅសង្គ្រោះនៅមន្ទីរពេទ្យខេត្តកំពង់ឆ្នាំង ។ចំណែកខាងរថយន្តហ៊ីណូដែលចតស្ងៀម អ្នកបើកពុំមានអ្នកណាស្គាល់អត្តសញ្ញាណនោះទេ បានគេចខ្លួនបាត់ ។
គ្រោះថ្នាក់ចរាចរណ៍នេះ បង្កឡើងដោយរថយន្តម៉ាកសាំយ៉ុង ពណ៌សំបកឪឡឹក ពាក់ស្លាកលេខភ្នំពេញ 2AE-2533 ជាមួយរថយន្តម៉ាកហ៊ីណូ ពណ៌.ស ពាក់ស្លាកលេខក្រុងព្រះសីហនុ 3A-0803 ដែលខូចហើយបានចតទុកចោលលើចិញ្ចើមផ្លូវបែរមុខទៅលិច ដើម្បីរកជាងមកជួសជុល ដោយមានដាក់មែកឈើពីមុខពីក្រោយ ដើម្បីធ្វើជាសញ្ញាផងដែរ ។
លុះនៅវេលារំលងអាធ្រាត្រ មុនពេលកើតហេតុនោះ ក៏មានភ្លៀងធ្លាក់មួយមេធំ ហើយមានខ្យល់បំប៉ើងមែកឈើដែលដាក់ជាសញ្ញានោះរប៉ាត់រប៉ាយអស់ ។ ពេលនោះ ម្ចាស់រថយន្តបានយកអំពូលភ្លើងមកចាប់ពីមុខពីក្រោយ ដើម្បីបំភ្លឺឲ្យអ្នកធ្វើដំណើរទៅមកបានឃើញជាសញ្ញា ។ ខណៈពេលដែលមេឃកំពុងភ្លៀងនោះ រថយន្តម៉ាកសាំយ៉ុងខាងលើ ដែលមានដឹកក្រូចឆ្មាពេញបានបោះពួយយ៉ាងលឿន មកពីកើត ទៅលិច ក្នុងទិសដៅស្របគ្នា ។
មកដល់ចំណុចកើតហេតុ មិនដឹងជាយ៉ាងម៉េច ស្រាប់តែមកបុករថយន្តហ៊ីណូ ដែលចតស្ងៀមពីក្រោយបណ្ដាលឱ្យខ្ទេចមួយកំណាត់មុខគាបជាប់អ្នកបើកបរបាក់ដៃបាក់ជើងរបួសយ៉ាងធ្ងន់ធ្ងរ និងព្រូរថយន្តខ្ទេចក្បាល និងដើមទ្រូងស្លាប់ភ្លាមៗ នៅនឹងកន្លែងកើតហេតុ ។ លុះទៀបភ្លឺ ទើបនាំគ្នាគាស់យកសាកសព និងជនរងគ្រោះចេញពីក្នុងរថយន្តបាន៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]