ខេត្តពោធិ៍សាត់ ៖ ខណៈដែលមេឃកំពុងតែភ្លៀង ក៏មានករណីគ្រោះថ្នាក់ចរាចរណ៍មួយកើតឡើង ស្ថិតលើកំណាត់ផ្លូវជាតិលេខ៥រវាងរថយន្តសាំយ៉ុងមួយគ្រឿង បានបើកទៅបុករថយន្តហ៊ីណូពីក្រោយដែលចតនៅស្ងៀម បណ្ដាលឱ្យរួញមួយកំណាត់មុខ ស្លាប់មនុស្សម្នាក់ និងរងរបួសធ្ងន់ម្នាក់ កាលពីវេលាម៉ោង០២រំលងអាធ្រាត្រឈានចូលថ្ងៃទី៣០ មេសា ២០១៦ ស្ថិតក្នុងភូមិក្រាំងធំ ឃុំអូរសណ្ដាន់ ស្រុកក្រគរ ខេត្តពោធិ៍សាត់ ។
ប្រភពឱ្យដឹងថា ជនរងគ្រោះដែលស្លាប់ឈ្មោះអ៊ុក វុទ្ធី ភេទប្រុស អាយុ៣៣ឆ្នាំ មានទីលំនៅភូមិថ្មី ឃុំផ្សារស្រុកបរិបូរណ៍ ខេត្តកំពង់ឆ្នាំង (ជាព្រូរថយន្ត) ។ អ្នកបើកមិនស្គាល់ឈ្មោះ រងរបួសយ៉ាងធ្ងន់ធ្ងរបំផុតបញ្ជូនទៅសង្គ្រោះនៅមន្ទីរពេទ្យខេត្តកំពង់ឆ្នាំង ។ចំណែកខាងរថយន្តហ៊ីណូដែលចតស្ងៀម អ្នកបើកពុំមានអ្នកណាស្គាល់អត្តសញ្ញាណនោះទេ បានគេចខ្លួនបាត់ ។
គ្រោះថ្នាក់ចរាចរណ៍នេះ បង្កឡើងដោយរថយន្តម៉ាកសាំយ៉ុង ពណ៌សំបកឪឡឹក ពាក់ស្លាកលេខភ្នំពេញ 2AE-2533 ជាមួយរថយន្តម៉ាកហ៊ីណូ ពណ៌.ស ពាក់ស្លាកលេខក្រុងព្រះសីហនុ 3A-0803 ដែលខូចហើយបានចតទុកចោលលើចិញ្ចើមផ្លូវបែរមុខទៅលិច ដើម្បីរកជាងមកជួសជុល ដោយមានដាក់មែកឈើពីមុខពីក្រោយ ដើម្បីធ្វើជាសញ្ញាផងដែរ ។
លុះនៅវេលារំលងអាធ្រាត្រ មុនពេលកើតហេតុនោះ ក៏មានភ្លៀងធ្លាក់មួយមេធំ ហើយមានខ្យល់បំប៉ើងមែកឈើដែលដាក់ជាសញ្ញានោះរប៉ាត់រប៉ាយអស់ ។ ពេលនោះ ម្ចាស់រថយន្តបានយកអំពូលភ្លើងមកចាប់ពីមុខពីក្រោយ ដើម្បីបំភ្លឺឲ្យអ្នកធ្វើដំណើរទៅមកបានឃើញជាសញ្ញា ។ ខណៈពេលដែលមេឃកំពុងភ្លៀងនោះ រថយន្តម៉ាកសាំយ៉ុងខាងលើ ដែលមានដឹកក្រូចឆ្មាពេញបានបោះពួយយ៉ាងលឿន មកពីកើត ទៅលិច ក្នុងទិសដៅស្របគ្នា ។
មកដល់ចំណុចកើតហេតុ មិនដឹងជាយ៉ាងម៉េច ស្រាប់តែមកបុករថយន្តហ៊ីណូ ដែលចតស្ងៀមពីក្រោយបណ្ដាលឱ្យខ្ទេចមួយកំណាត់មុខគាបជាប់អ្នកបើកបរបាក់ដៃបាក់ជើងរបួសយ៉ាងធ្ងន់ធ្ងរ និងព្រូរថយន្តខ្ទេចក្បាល និងដើមទ្រូងស្លាប់ភ្លាមៗ នៅនឹងកន្លែងកើតហេតុ ។ លុះទៀបភ្លឺ ទើបនាំគ្នាគាស់យកសាកសព និងជនរងគ្រោះចេញពីក្នុងរថយន្តបាន ។
ប្រភព៖ កោះសន្តិភាព
កំណត់ហេតុខ្មែរឡូត
គួររំលឹកផងដែរថា កាលពីវេលាម៉ោង០៣ និង៣០នាទីរសៀលថ្ងៃទី២៣ មេសា ២០១៦ កន្លងទៅនេះ សេចក្តីរាយការណ៍បឋមឱ្យដឹងថា យ៉ាងហោចណាស់ មនុស្ស៧នាក់បានស្លាប់ និងរងរបួសធ្ងន់-ស្រាល២៩នាក់ ក្នុងហេតុការណ៍គ្រោះថ្នាក់ចរាចរណ៍មួយដ៏គួរឱ្យរន្ធត់ រវាងរថយន្តក្រុងរបស់ក្រុមហ៊ុន (ជី អេស) បុកជាមួយរថយន្តប្រភេទយីឌុបធុនធំ ស្ថិតតាមបណ្តោយផ្លូវជាតិលេខ៥ ត្រង់ចំណុចភូមិព្រៃដំរី ឃុំព្រៃតូច ស្រុកមោងប្ញស្សី ខេត្តបាត់ដំបង។
ប្រភពឱ្យដឹងថា ជំហានដំបូងគេមិនទាន់ ស្គាល់អត្តសញ្ញាណ ជនរងគ្រោះ ដែលស្លាប់ និងរងរបួសនោះទេ ខណៈត្រូវគេបញ្ជូន ទៅសង្គ្រោះភ្លាមៗ គ្រាន់តែដឹងថា ភាគច្រើនគឺជាអ្នកជិះក្នុងរថយន្តក្រុង ។ រថយន្តក្រុងខាងលើ ពាក់ស្លាកលេខភ្នំពេញ ៣D-3906 ធ្វើដំណើរពីភ្នំពេញ ទៅខេត្តបាត់ដំបង ។ លុះមកដល់ចំណុចកើតហេតុ ស្រាប់តែបុកជាមួយរថយន្តយីឌុបខាងលើនោះ ក្នុងទិសដៅបញ្ច្រាសគ្នា ។
បច្ចុប្បន្ន សមត្ថកិច្ចកំពុងចុះអន្តរាគមន៍ និងរកសាកសពជនរងគ្រោះចេញពីរថយន្តដែលកៀបសង្កត់នោះ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]