ខេត្តបាត់ដំបង ៖ សេចក្តីរាយការណ៍បឋមឱ្យដឹងថា យ៉ាងហោចណាស់ មនុស្ស៧នាក់បានស្លាប់ និងរងរបួសធ្ងន់-ស្រាល២៩នាក់ ក្នុងហេតុការណ៍គ្រោះថ្នាក់ចរាចរណ៍មួយដ៏គួរឱ្យរន្ធត់ រវាងរថយន្តក្រុងរបស់ក្រុមហ៊ុន (ជី អេស) បុកជាមួយរថយន្តប្រភេទយីឌុបធុនធំ កាលពីវេលាម៉ោង០៣ និង៣០នាទីរសៀលថ្ងៃទី២៣ មេសា ២០១៦ នេះ ស្ថិតតាមបណ្តោយផ្លូវជាតិលេខ៥ ត្រង់ចំណុចភូមិព្រៃដំរី ឃុំព្រៃតូច ស្រុកមោងប្ញស្សី ខេត្តបាត់ដំបង ។
ប្រភពឱ្យដឹងថា ជំហានដំបូងគេមិនទាន់ ស្គាល់អត្តសញ្ញាណ ជនរងគ្រោះ ដែលស្លាប់ និងរងរបួសនោះទេ ខណៈត្រូវគេបញ្ជូន ទៅសង្គ្រោះភ្លាមៗ គ្រាន់តែដឹងថា ភាគច្រើនគឺជាអ្នកជិះក្នុងរថយន្តក្រុង ។ រថយន្តក្រុងខាងលើ ពាក់ស្លាកលេខភ្នំពេញ ៣D-3906 ធ្វើដំណើរពីភ្នំពេញ ទៅខេត្តបាត់ដំបង ។ លុះមកដល់ចំណុចកើតហេតុ ស្រាប់តែបុកជាមួយរថយន្តយីឌុបខាងលើនោះ ក្នុងទិសដៅបញ្ច្រាសគ្នា ។
បច្ចុប្បន្ន សមត្ថកិច្ចកំពុងចុះអន្តរាគមន៍ និងរកសាកសពជនរងគ្រោះចេញពីរថយន្តដែលកៀបសង្កត់នោះ ។
ផ្តល់សិទ្ធិដោយ៖ កោះសន្តិភាព
កំណត់ហេតុខ្មែរឡូត៖
គួររំលឹកឡើងវិញផងដែរថា មនុស្សម្នាក់ស្លាប់ភ្លាមៗ និង២៧នាក់ទៀតរងរបួសធ្ងន់-ស្រាល ក្នុងហេតុការណ៍គ្រោះថ្នាក់ចរាចរណ៍មួយកើតឡើង កាលពីវេលាម៉ោង០៤ និង២០នាទីរសៀលថ្ងៃទី០៨ មេសា ២០១៦ ស្ថិតលើកំណាត់ផ្លូវជាតិលេខ៦ ខាងលិចស្ពានតាប៉ុនចម្ងាយប្រមាណ២០ម៉ែត្រ ត្រង់ផ្លូវបំបែក ក្នុងភូមិតាប៉ុន ឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យ ។
ប្រភពឱ្យដឹងថា រថយន្តម៉ាកសាំយ៉ុង១គ្រឿង ពណ៌.ស ពាក់ស្លាកលេខភ្នំពេញ2V-7361 ផ្ទុកមនុស្សមកពីថៃចំនួន២៨នាក់ ដែលអ្នកបើកបរឈ្មោះបឿន បួន ភេទប្រុស អាយុ៣៨ឆ្នាំ មានលំនៅភូមិត្រពាំងទឹម ឃុំ/ស្រុកកញ្ជ្រៀច ខេត្តព្រៃវែង បានធ្វើដំណើរក្នុងទិសដៅពីលិចទៅកើត ។ លុះមកដល់ចំណុចផ្លូវបំបែកខាងលិចស្ពានតាប៉ុន ជិតព្រំប្រទល់ស្រុកក្រឡាញ់ ខេត្តសៀមរាប បានបុកជាមួយរថយន្តច្នៃដឹកឥដ្ឋ ដែលបើកបរដោយឈ្មោះកែវ វ៉ិត ភេទប្រុស អាយុ២៥ឆ្នាំ មានទីលំនៅភូមិធ្លាក់យល់ ឃុំតាចេស ស្រុកកំពង់ត្រឡាច ខេត្តកំពង់ឆ្នាំង ។ ក្រោយកើតហេតុ ជនរងគ្រោះរងរបួសធ្ងន់-ស្រាលនោះ ត្រូវយកទៅព្យាបាលនៅមន្ទីរពេទ្យបង្អែក ស្រុកព្រះនេត្រព្រះ និងស្រុកក្រឡាញ់ផងដែរ។
ប្រភពដដែលបញ្ជាក់ថា ករណីគ្រោះថ្នាក់ចរាចរណ៍នេះ គឺបណ្តាលមកពីរថយន្តសាំយ៉ុង ផ្ទុកមនុស្សលើសចំណុះ បើកក្នុងល្បឿនលឿន ដល់ចំណុចកើតហេតុជាចំណុចផ្លូវកោង ស្របពេលនោះ មានភ្លៀងធ្លាក់នោះមិនបន្ថយល្បឿន ទើបជ្រុលចង្កូតទៅបុករថយន្តច្នៃដឹកឥដ្ឋតែម្តង ។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
