ខេត្តកំពត ៖ បុរសម្នាក់បានប្រើអំពើហិង្សាលើប្រពន្ឋដោយសារពេលស្រវឹងស្រាមកដល់ផ្ទះមិនឃើញប្រពន្ឋ ហើយពេលឃើញប្រពន្ឋមកដល់ផ្ទះក៏បានឈ្លោះប្រកែកគ្នា រួចវាយប្រពន្ឋឲ្យរងរបួស ក្រោយមកប្រពន្ឋបានរត់គេចចេញពីបុរសជាប្តីដោយខ្លាចប្តីវាយទៀត ស្រាប់តែបុរសជាប្តីបានយកដែកកេះទៅដុតផ្ទះចោលតែម្តង ។
ហេតុការណ៍នេះកើតឡើងកាលពីវេលម៉ោង៩ និង៣០នាទីព្រឹក ថ្ងៃទី២០ ខែមេសា ឆ្នាំ២០១៦ ស្ថិតនៅភូមិនរាយណ៍ ឃុំនរាយណ៍ ស្រុកឈូក ខេត្តកំពត ។
ស្ត្រីរងគ្រោះជាប្រពន្ធឈ្មោះ ជួន ចន្នី អាយុ២៨ឆ្នាំ បានប្រាប់សមត្ថកិច្ចថា នៅវេលាម៉ោងប្រហែល៩ និង៣០នាទីព្រឹក ថ្ងៃទី២០មេសា ប្តីរបស់នាងឈ្មោះ អេង សុដា អាយុ២៨ឆ្នាំ បានស្រវឹងស្រានៅក្រៅផ្ទះ រួចមកដល់ផ្ទះវិញបានរករឿងវាយតប់នាងខ្ញុំត្រូវកណ្តាលខ្នងមួយដៃបណ្តាលឲ្យរងរបួស ពេលនោះដោយខ្លាចប្តីវាយបន្តជ្រុលដៃរហូតដល់ស្លាប់ ក៏រត់គេចចេញពីប្តី ។
នៅពេលឃើញខ្លួនរត់គេចចេញ ប្តីរបស់នាងក៏បានយកដៃកកេះទៅដុតផ្ទះខ្លួនឯងដែលមានទំហំបណ្តោយ៥ម៉ែត្រទទឹង៤ម៉ែត្រធ្វើអំពីឈើប្រក់ស័ង្កសី ជញ្ជាំងស័ង្កសី បណ្តាលឲ្យឆេះអស់មួយចំហៀង ដោយសារបងប្អូនអ្នកស្រុកជួយពន្លត់ទាន់ ។
ក្រោយពីសមត្ថកិច្ចនគរបាលស្រុកឈូកទទួលពាក្យបណ្តឹងពីស្ត្រីរងគ្រោះជាប្រពន្ឋ លោកឧត្តមសេនីយត្រី ម៉ៅ ចន្ទ័មធុរិទ្ឋ ស្នងការនគរបាលខេត្ត បានបញ្ជាឲ្យនាំខ្លួនជនសង្ស័យឡើងមកកាន់ស្នងការខេត្តដើម្បីធ្វើការសាកសួរ ។
ក្រោយពីសមត្ថកិច្ចនគរបាលការិយាលយ័ព្រហ្មទណ្ឌកម្រិតស្រាលស្នងការខេត្តធ្វើការសាកសួរ ជនសង្ស័យឈ្មោះ អេង សុដា បានសារភាពប្រាប់សមត្ថកិច្ចថា ខ្លួនពិតជាស្រវឹងស្រា ហើយបានប្រើអំពើហិង្សាវាយតប់ទៅលើប្រពន្ឋរបស់ខ្លួន ព្រមទាំងដុតផ្ទះខ្លួនឯងពិតប្រាកដមែន (១លីត្រផឹកតែម្នាក់ឯង) ។
ក្រោយពីស្តាប់សម្តីសារភាពរបស់ប្តីនៅចំពោះមុខសមត្ថកិច្ចរួចហើយ ស្ត្រីជាប្រពន្ធក៏មានចិត្តអាណិតអាសូរប្តីវិញ ដោយសំណូមពរឲ្យសមត្ថកិច្ចកុំដាក់ទោសប្តីរបស់ខ្លួន គ្រាន់តែធ្វើការអប់រំ និងធ្វើកិច្ចសន្យាបញ្ឈប់ការប្រើអំពើហិង្សាតទៅទៀតបានហើយ ។
ប្រភព៖ កោះសន្តិភាព
កំណត់ហេតុខ្មែរឡូត
យ៉ាងណាមិញ ករណីវាយប្រពន្ធ ស្រដៀងគ្នានេះ ធ្លាប់បានកើតឡើង ជាច្រើនលើក ច្រើនសារមកហើយ ដូចជាបុរសម្នាក់ ដោយសារតែខឹង សុំលុយទិញស្រាផឹក បន្តមិនបាន បានដុតបំផ្លាញទ្រព្យសម្បត្តិក្នុងផ្ទះ និងឈានទៅ ប្រើអំពើហឹង្សា លើប្រពន្ធ បណ្តាលឲ្យរងរបួស ទើបទ្រាំលែងបាន ប្តឹងនគរបាលឲ្យចាប់ខ្លួន បុរសជាប្តី កសាងសំណុំរឿង បញ្ជូនទៅតុលាការ ចាត់ការទៅតាមនិតិវិធី។
មន្ត្រីនគរបាលស្រុកត្បូងឃ្មុំ បានឲ្យដឹងថា នៅថ្ងៃទី២៩ ខែមីនា ក្នុងភូមិវាលកណ្តៀង ឃុំជប់ ស្រុកត្បូងឃ្មុំ ជនល្មើសឈ្មោះ ទូច ធឿន ភេទប្រុស អាយុ៣៨ ឆ្នាំ បានផឹកស្រាស្រវឹងហើយធ្វើសកម្មភាព ដុតបំផ្លាញទ្រព្យសម្បត្តិ និង វាយតប់ទាត់ធាក់ ទៅលើស្ត្រីរងគ្រោះ ជាប្រពន្ធ ឈ្មោះ ស៊ឹម ស៊ីណា អាយុ៣៧ ឆ្នាំ ពីព្រោះតែខឹងនិង ប្រពន្ធមិនឲ្យលុយយក ទៅទិញស្រាផឹក បន្តទៀត។
មិនត្រឹមតែ វាយប្រពន្ធបណ្តាលឲ្យ រងរបួសគ្រាំគ្រា ឈឺចាប់ក្នុងខ្លួនប៉ុណ្ណោះទេ ថែមទាំង ដុតបំផ្លាញទ្រព្យសម្បត្តិ ឆេះខូចខាតម៉ូតូ ម៉ាកសេ១០០ កូរ៉េ ចំនួន១គ្រឿងទៀតផង។
មន្ត្រីនគរបាលឲ្យដឹងទៀតថា កន្លងមកជនល្មើសរូបនោះ បានធ្វើសកម្មភាព ប្រើអំពើហិង្សា និងបំផ្លិចបំផ្លាញទ្រព្យសម្បត្តិ ក្នុងគ្រួសារជាញឹកញាប់ ជាមួយគ្នានោះ សមត្ថកិច្ចប៉ុស្តិ៍ជប់ ក៍ធ្លាប់បានធ្វើកិច្ច សន្យាអប់រំ ច្រើនលើកមកហើយ តែជនល្មើសនេះ មិនព្រមកែប្រែ ទើបហេតុការណ៍លើកនេះ ធ្វើឲ្យស្ត្រីរងគ្រោះជាប្រពន្ធ សម្រេចចិត្តប្តឹង សមត្ថកិច្ចឲ្យ ឃាត់ខ្លួន បញ្ជូនទៅតុលាការ ផ្តន្ទាទោសតាមច្បាប់។
ជាងនេះទៅទៀត កាលពីវេលាម៉ោង១២ និង១៥នាទីរំលងអាធ្រាត្រ ឈានចូលថ្ងៃទី២៥ ខែវិច្ឆិកា ឆ្នាំ២០១៥នេះ ស្ថិតនៅត្រង់ចំណុចភូមិស្ទឹងស្លូត ឃុំអ្នកលឿង ស្រុកពាមរក៌ ខេត្តព្រៃវែង អំពើហិង្សាមួយបានកើតឡើង គួរឲ្យសង្វេគ និងតក់ស្លុត ក្រោយពេលបុរសជាប្តី បានយកពូថៅ វាយប្រពន្ធមួយពូថៅ បណ្តាលឲ្យរងរបួសយ៉ាងធ្ងន់ ធ្ងររួចហើយ យកសាំងចាក់ដុតមក លើខ្លួនឯងរហូតស្លាប់ យ៉ាងអណោចអធ័ម។
ស្នងការរងនគរបាលខេត្តព្រៃវែង ទទួលផែនព្រហ្មទណ្ឌ លោក សេង សុភក្រ្ត បានប្រាប់ឲ្យដឹងនៅព្រឹក ព្រលឹមថ្ងៃទី២៥ ខែវិច្ឆិកា ឆ្នាំ២០១៥ នេះថា បុរសជាប្តីមានឈ្មោះ ព្រំ ផ្លង់ អាយុ៦៦ឆ្នាំ មុខរបរលក់ដូរ មានទីលំនៅភូមិស្ទឹងស្លូត ឃុំអ្នកលឿង ដោយឡែកស្រ្តីជាប្រពន្ធមានឈ្មោះ ម៉ាង ងួន អាយុ៦៥ឆ្នាំ។
លោក សេង សុភក្រ្ត បានបញ្ជាក់ថា មុនពេលកើតហេតុបុរសជាប្តី មានអារម្មណ៏មិនល្អ ហើយកើតជម្លោះជាមួយប្រពន្ធ ស្រាប់តែពេលនោះបានយកពូថៅវាយ ទៅលើប្រពន្ធ មួយពូថៅចំក្បាលផ្នែកខាងឆ្វេងបណ្តាលឲ្យរងរបួសធ្ងន់ ក្រោយមកជនសង្ស័យបានយកសាំងចាក់ ពីលើខ្លួនហើយដុតខ្លួនឯង បណ្តាលឲ្យស្លាប់នៅក្នុងផ្ទះតែម្តង។
បច្ចុប្បន្នជនរងគ្រោះជាប្រពន្ធ ត្រូវបានបញ្ជូនទៅព្យាបាលនៅមន្ទីរពេទ្យនៅភ្នំពេញ ចំណែកសាកសពសមត្ថកិច្ច បានប្រគល់ជូនកូននិងចៅ ដើម្បីយកទៅធ្វើបុណ្យតាមប្រពៃណី៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]