រាជធានីភ្នំពេញ ៖ រហូតមកដល់ពេលនេះ ផលិតកម្មថោន ប្រកាន់ជំហរថា ធ្វើទៅតាមការចង់បានរបស់តារាចម្រៀង សុគន្ធ នីសា ក្នុងការដើរចេញពីផលិតកម្ម បើទោះជាមុននេះ ផលិតកម្មបានពិភាក្សាគ្នាយ៉ាងល្អិតល្អន់ជាមួយ តារាចម្រៀងរូបនេះក៏ដោយ ។
ជ្រកក្រោមផលិតកម្មថោន ប្រមាណជាង៣ឆ្នាំ សុគន្ធ នីសា នៅតែរក្សាបាននូវ កេរ្តិ៍ឈ្មោះរបស់ខ្លួនសម្រាប់អ្នកគាំទ្រដដែល បើទោះបីជានាងសម្រេច ដើរចេញពីផលិតហង្សមាស ដែលជាផលិតកម្មធំ និងល្បីល្បាញជាងគេនៅក្នុងប្រទេសក៏ដោយ ។ ទោះជាបានរសាត់ដល់ ផលិតថោនក៏ដោយ តែសុគន្ធ នីសា នៅតែមិនអាចរក្សាខ្លួនក្នុងជម្រកមួយនេះដដែល ដោយពេលនេះនាងបានសម្រេចដើរចេញពីផលិតថោន ជាថ្មីទៀត ដែលការចាកចេញនេះ ត្រូវប្រភពក្រៅផ្លូវ ការអះអាងថា នាងទំនងជាមានទំនាស់ ណាមួយជាមួយផលិតកម្មថោន ។ ទន្ទឹមនេះអតីតសង្សារចាស់របស់នាង លោក សុខ ជំនោរ ធ្លាប់បង្ហើបថា សុគន្ធ នីសា ចាកចេញពីផលិតកម្មថោនចូលរួមជាមួយផលិតកម្មហង្សមាស ដែលជាផលិតកម្ម ចាស់វិញ ។
ពាក់ព័ន្ធរឿងនេះ អ្នកចាត់ការទូទៅរបស់ផលិតកម្មថោន លោកមាស សុខរតនៈ អះអាងប្រាប់កោះសន្តិភាពតាមទូរស័ព្ទ កាលពីពេលថ្មីៗនេះថា សុគន្ធ នីសា ចាកចេញពីផលិតថោនពិតមែន ហើយការចេញពីផលិតកម្មថោនទៅផលិតកម្មណាមួយទៀតរបស់នាង រូបលោកផ្ទាល់ក៏មិនបានដឹងឡើយ ។
លោកមាស សុខរតនៈ បញ្ជាក់ថាសុគន្ធ នីសា បានសុំឈប់ពីផលិតកម្មថោន កាលពីពេលថ្មីៗកន្លងមក ។ ការចាកចេញពីផលិតកម្មថោន របស់តារាចម្រៀងជួរមុខរូបនេះ មិនស្ថិតនៅ ក្រោមហេតុផលមានជម្លោះជាមួយភាគីណាមួយ ក្នុងផលិតកម្មថោនឡើយ ពោលគឺផលិតកម្ម បានសម្រេចទៅតាមចិត្តរបស់នាង ទាំងស្រុងដោយសារតែ តារាចម្រៀងរូបនេះ មិនបានចុះកិច្ចសន្យាមួយ ផលិតកម្មថោនឡើយ ។
ទោះជាយ៉ាងណាក្តីលោកមាស សុខរតនៈ ជឿថា ការសម្រេចចិត្តចេញ ពីផលិតកម្មថោនរបស់ សុគន្ធ នីសា ទំនងជានាង អាចមានគោលដៅល្អណាមួយ សម្រាប់រូបនាងហើយ ព្រោះមុនពេលចាកចេញ របស់នាងផលិតកម្ម បានពិភាក្សាជាមួយ តារាចម្រៀងរូប នេះយ៉ាងល្អិតល្អន់ ។
ពាក់ព័ន្ធរឿងនេះកោះសន្តិភាព មិនអាចស្វែងរកការបកស្រាយណាមួយពី តារាចម្រៀងសុគន្ធ នីសា បានឡើយ ប៉ុន្តែកន្លងមក តារាចម្រៀងសំនៀងស្រទន់រូបនេះ ធ្លាប់ទទួលស្គាល់ពី ព័ត៌មាននៃការចាកចេញពីផលិតកម្មថោន ប៉ុន្តែចំពោះរឿងដែល នាងអាចនឹងចូល ផលិតហង្សមាស ឬផលិតណាផ្សេងនោះ សុគន្ធ នីសា មិនបានអធិប្បាយឡើយ ដោយនាងនិយាយដោយខ្លីថា នាងចង់ដកឃ្លា ដើម្បីសម្រាកមួយរយៈ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក តារា & កម្សាន្ដ និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
