រាជធានីភ្នំពេញ ៖ យោងតាមសេចក្តីប្រកាសព័ត៌មានរួមរវាងក្រសួងសុខាភិបាល និងអង្គការសុខភាពពិភពលោក កាលពីថ្ងៃទី២៧ កក្កដា បានឱ្យដឹងថា ក្រសួងសុខាភិបាលនឹងចាប់ផ្តើមយុទ្ធនាការអប់រំសុខភាព និងបង្កើនការតាមដានលើជំងឺពងបែកដៃជើង និងក្នុងមាត់កុមារ ដោយតម្រូវឱ្យមន្ទីរពេទ្យនានារាយការណ៍ពីករណីជំងឺនេះ ទាំងស្រាល និងធ្ងន់ក្នុងចំណោមកុមារ ពិសេសទម្រង់ធ្ងន់ធ្ងរនៃជំងឺពងបែកដៃជើង និងក្នុងមាត់ ដែលបង្កដោយមេរោគ Enterovirus 71 (EV-71) ។
តាមសេចក្តីប្រកាសព័ត៌មានរវាងក្រសួងសុខាភិបាល និងអង្គការសុខភាពពិភពលោក បានឱ្យដឹងថា មានការរកឃើញករណីសរុបចំនួន៧៨ករណី ដែលក្នុងនោះ៦២ករណី បានរាយការណ៍ពីមន្ទីរពេទ្យគន្ធបុប្ផា និងករណីមួយចំនួនរាយការណ៍ពីមន្ទីរពេទ្យដទៃទៀត ។ ក្នុងចំណោមករណីទាំងអស់នេះ ការអង្កេតស្រាវជ្រាវសង្កត់ធ្ងន់តែលើ៦១ករណី ដែលមានរោគសញ្ញា EV-71 ។ ការតាមដានចុងក្រោយទៅលើករណីទាំង៦១ បានបង្ហាញថា ៥៦ករណីបានស្លាប់ និង៣ករណីជាសះស្បើយ ។ សេចក្តីប្រកាសព័ត៌មានបានឱ្យដឹងទៀតថា ក្នុងរយៈពេលមួយសប្តាហ៍ចុងក្រោយនេះ មាន៥៣៣ករណីនៃជំងឺពងបែកដៃជើង និងក្នុងមាត់ស្រាលត្រូវបានរាយការណ៍មកក្រសួងសុខាភិបាលពី ១៧ខេត្ត ក្នុងចំណោម ២៤ រាជធានី-ខេត្ត និងមាន៩ករណីស្លាប់ ១ករណីជាសះស្បើយ និង៥ករណីកំពុងសម្រាកព្យាបាល ។
សេចក្តីប្រកាសព័ត៌មាននេះបានឱ្យដឹងទៀតថា ជំងឺពងបែកដៃជើង និងក្នុងមាត់ស្រាល មានរោគសញ្ញាគ្រុនក្តៅ ។ ករណីទាំងនេះអាចព្យាបាលនៅផ្ទះ ឬនៅមណ្ឌលសុខភាព ។ ភាគច្រើននៃករណីស្រាលទាំងនេះ ជាសះស្បើយក្នុងរយៈពេលពី៧ទៅ១០ថ្ងៃ ប៉ុន្តែមានកុមារមួយចំនួនអាចវិវត្តទៅជាធ្ងន់ធ្ងរ ដោយមានរោគសញ្ញាគ្រុនក្តៅ និងសញ្ញាប្រព័ន្ធប្រសាទ ដូចជា ក្អួត ប្រកាច់ ឬរឹងដៃរឹងជើង ឬមានសញ្ញាផ្លូវដង្ហើមដូចជា ដង្ហើមញាប់ ឬពិបាកដកដង្ហើម ។ កុមារទាំងនេះ ត្រូវបញ្ជូនទៅព្យាបាលនៅមន្ទីរពេទ្យជាបន្ទាន់ ។
លោកម៉ម ប៊ុនហេង រដ្ឋមន្ត្រីក្រសួងសុខាភិបាល មានប្រសាសន៍ថា «ឪពុកម្តាយទាំងឡាយដែលមានរោគសញ្ញា គ្រុនក្តៅខ្លាំង ក្អួត រឹងដៃជើង ឬពិបាកដកដង្ហើម ត្រូវនាំយកទៅមន្ទីរពេទ្យឱ្យបានឆាប់ ដើម្បីធ្វើរោគវិនិច្ឆ័យ និងទទួលការព្យាបាល»។ ចូរលាងដៃឱ្យបានញឹកញាប់ជាមួយសាប៊ូ និងទឹក ជាពិសេសបន្ទាប់ពីប៉ះពងបែក ឬដំបៅ មុនរៀបចំអាហារនិងបរិភោគ មុនបញ្ចុកអាហារដល់កុមារ បន្ទាប់ពីបន្ទោបង់រួច និងបន្ទាប់ពីលាងសម្អាត ឬងូតទឹកឱ្យកុមារដែលមានជំងឺ ។
ក្រសួងសុខាភិបាល សហការជាមួយអង្គការយូនីសេហ្វ និងអង្គការសុខភាពពិភពលោក បាននិងកំពុងបង្កើតសម្ភារអប់រំ និងផ្តល់ព័ត៌មានដល់សាធារណជនអំពីជំងឺនេះ ។ ព័ត៌មានផ្សេងៗស្តីពីជំងឺពងបែកដៃជើង និងក្នុងមាត់ អាចមើលនៅគេហទំព័ររបស់នាយកដ្ឋានប្រយុទ្ធនឹងជំងឺឆ្លងរបស់ក្រសួងសុខាភិបាល www.cdcmoh.gov .kh ឬទាក់ទងទូរស័ព្ទទាន់ហេតុការណ៍១១៥(ឥតគិតថ្លៃ) ឬ ០១២ ៤៨៨ ៩៨១ ឬ ០៨៩ ៦៦៩ ៥៦៧ ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]