ខេត្តកំពង់ឆ្នាំង ៖ លោក ហ៊ុល វាសនា អធិការនគរបាលស្រុកកំពង់ត្រឡាច បានរងការចោទប្រកាន់ពីយុវនារីជាសិស្សថា្នក់ទី១២ មានអាយុ១៩ឆ្នាំម្នាក់ថា បានបញ្ឆោតនាងឱ្យចូលបន្ទប់ស្នាក់នៅជាប់កន្លែងធ្វើការរបស់លោកក្នុងអធិការដ្ឋាននគរបាលស្រុកកំពង់ត្រឡាច រួចយកកាំភ្លើងខ្លីភ្ជង់ក្បាល និងចាប់នាងរំលោភរហូតបានសម្រេចកាលពីថ្ងៃទី១១ ខែកក្កដា ឆ្នាំ២០១៥ ។ ប៉ុន្តែរឿងរ៉ាវដែលមិនគួរកើតមាននេះបានភ្ញាក់ផ្អើលនៅរសៀលថ្ងៃទី២០ ខែកក្កដា ឆ្នាំ២០១៥ ខណៈដែលយុវនារីរងគ្រោះ និងក្រុមគ្រួសារបានមកដាក់ពាក្យប្តឹងនៅស្នងការដ្ឋាននគរបាលខេត្ត, នៅមន្ទីរកិច្ចនារីខេត្ត និងអង្គការសិទ្ឋិមនុស្សនានាក្នុងខេត្ត ។ បើទោះបីបែបនេះក្តីលោកអធិការរូបនោះនិយាយថា ពួកយើងបានស្រឡាញ់គ្នានោះទេ ។
លោក ប្រាក់ វុឌ្ឍី ស្នងការនគរបាលខេត្តបានប្រាប់តាមទូរស័ព្ទថា លោកពិតជាបានទទួលពាក្យបណ្តឹងនារីរងគ្រោះពិតមែន ដោយចោទលោក ហ៊ុល វាសនា អធិការនគរបាលស្រុកកំពង់ត្រឡាចថា បានចាប់នាងរំលោភកាលពីថ្ងៃទី១១ ខែកក្កដា ប៉ុន្តែនាងបានមកដាក់ពាក្យប្តឹងនៅថ្ងៃទី២០ ខែកក្កដា ដូច្នេះវាជារឿងចូលដល់ស៊ើបអង្កេត ។
ក្នុងពាក្យបណ្តឹងនារីរងគ្រោះវ័យ១៩ឆ្នាំ ដែលកំពុងសិក្សាថ្នាក់ទី១២ ក្នុងវិទ្យាល័យមួយក្នុងស្រុកកំពង់ត្រឡាច បានរៀបរាប់ថា នាងបានស្គាល់លោក ហ៊ុល វាសនា អធិការនគរបាលស្រុកកំពង់ត្រឡាចតាមរយៈការលេងហ្វេសប៊ុក ។ ក្នុងថ្ងៃទិវាដង្ហែក្បួនប្រឆាំងជម្ងឺអេដស៍នៅថ្ងៃទី២៦ ខែមិថុនា ឆ្នាំ២០១៥ ដោយសុំរាប់អានគ្នាជាពូនិងក្មួយ ក្រោយមកគាត់បានសុំម្តាយខ្ញុំធ្វើជាម្តាយធម៌ ។ ចាប់ពីពេលនោះមក គ្រួសារខ្ញុំបានរាប់អានគ្នាជាមួយគាត់ជាធម្មតា ប៉ុន្តែក្រោយៗមកទៀតគាត់បានក្បត់ និងការរាប់អាន ដោយបានចាប់ខ្ញុំរំលោភចំនួន៣លើក តែ២លើកមុនមិនបានសម្រច គឺថ្ងៃទៅ៣០ ខែមិថុនា និងថ្ងៃទី៥ កក្កដា ។ លុះដល់ថ្ងៃទី១១ ខែកក្កដា គាត់បានហៅឱ្យខ្ញុំទៅយកម៉ូតូជិៈ មុនដំបូងខ្ញុំប្រកែក តែដោយសារខ្ញុំទាល់ ព្រោះចាំបាច់ត្រូវទៅមើលយាយឈឺ ក៏បង្ខំចិត្តជិៈម៉ូតូឌុបទៅយកម៉ូតូពីគាត់ជិៈ តែពេលទៅដល់គាត់បានប្រើខ្ញុំឱ្យទៅយកទូរស័ព្ទនៅក្រោមកន្ទេលដេកក្នុងបន្ទប់របស់គាត់ ពេលខ្ញុំកំពុងរកទូរស័ព្ទ ស្រាប់តែគាត់មកចាប់ខ្ញុំឱបពីក្រោយ ហើយខ្ទប់មាត់ខ្ញុំលើកដាក់លើគ្រែ ដើម្បីរំលោភ ពេលខ្ញុំរើបម្រះគាត់បានយកកាំភ្លើងខ្លីភ្ជង់គម្រាម ទះកំភ្លៀង និងមួលភ្លៅ ព្រមទាំងចាប់រំលោភរហូតបានសម្រេចតែម្តង ។
ក្រោយពីនោះមកខ្ញុំទ្រាំនឹងការឈឺចាប់មិនបាន ក៏សម្រេចយករឿងនេះប្រាប់ម្តាយខ្ញុំ ទើបសម្រេចដាក់ពាក្យប្តឹងតែម្តង ។
លោក ហ៊ុល វាសនា អធិការនគរបាលស្រុកកំពង់ត្រឡាចវិញបានធ្វើការបដិសេធន៍ថា រូបគាត់មិនបានយកកាំភ្លើងភ្ជង់ វាយដំ បង្ខំនាងចាប់រំលោភនោះទេ តាមពិតរវាងនាងនិងខ្ញុំ គឺជាមនុស្សស្រឡាញ់គ្នានោះទេ ។ ពួកយើងបានស្រឡាញ់គ្នាជាងមួយខែមកហើយ ដោយបានដេកនៅជាមួយគ្នានៅផ្ទះសំណាក់ចំនួន៣ដង នៅផ្សារឧដ្តុង្គ ។
លោកបានបញ្ជាក់ថា នៅថ្ងៃទី១១ ខែកក្កដា ឆ្នាំ២០១៥ បើសិនជាមានការវាយដំ បង្ខំ និងប្រើកាំភ្លើងមែននោះ មិនមែននៅថ្ងៃទី១២ ជាថ្ងៃបន្ទាប់នារីនោះព្រមឱ្យខ្ញុំជូនទៅខួបកំណើតបងប្អូននៅភ្នំពេញនោះទេ និងថ្ងៃបន្ទាប់ៗមកទៀតរហូតដល់ថ្ងៃទី១៨ ខែកក្កដា ពួកយើងបានជួបជជែកគ្នាជាធម្មតានៅកន្លែងធ្វើការរបស់ខ្ញុំនោះឡើយ នេះជារឿងមនុស្សស្រឡាញ់គ្នា ។
ដោយឡែកនៅរសៀលថ្ងៃទី២១ ខែកក្កដា ឆ្នាំ២០១៥ លោក ក្រូច ឈឺន ស្នងការរងនគរបាលខេត្តបានដឹកនាំមន្ត្រីនគរបាលក្រុមបច្ចេកទេសព្រហ្មទណ្ឌខេត្តចុះមកពិនិត្យកន្លែងកើតហេតុ ដែលជាបន្ទប់ស្នាក់នៅរបស់លោក ហ៊ុល វាសនា អធិការនគរបាលស្រុកកំពង់ត្រឡាច ដោយមានការចូលរួមចង្អុលបង្ហាញពីនារីរងគ្រោះ និងមានការចូលរួមពីក្រុមគ្រួសារផង ។
លោក ក្រូច ឈឺន ស្នងការរងនគរបាលខេត្ត ក្នុងពេលពិនិត្យកន្លែងកើតហេតុ បាននិយាយឱ្យក្រុមអ្នកកាសែតដឹងថា ករណីនេះគឺជាបទល្មើសស្ថិតក្នុងការស៊ើបអង្កេតស្រាវជ្រាវ ព្រោះមិនមែនជាបទល្មើសជាក់ស្តែងឡើយ ។
ទោះជាយ៉ាងណាក៏ដោយចុះ លោក ហ៊ុល វាសនា អធិការនគរបាលស្រុកកំពង់ត្រឡាច ដែលមានប្រពន្ឋកូនទៅហើយ ត្រូវបានលោកស្នងការហៅទៅធ្វើរបាយការណ៍បំភ្លឺនៅស្នងការដ្ឋានមួយយប់ ប៉ុន្តែមកដល់ពេលនេះមិនទាន់ឃើញមានទទួលទោសអ្វីនៅឡើយទេ ក្រោមហេតុផលស្ថិតក្នុងការស៊ើបង្កេត ៕
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]