ឈាមត្រីឆ្លាម អាចជួយទប់ស្កាត់ រោគមហារីកសុដន់

សម្រាប់សារធាតុដែលបង្កើតនៅក្នុងឈាម ដើម្បីធ្វើការទប់ទល់នឹងមេរោគផ្សេងៗ នៅក្នុងរាងកាយបាននោះ ត្រូវបានគេរកឃើញនៅក្នុង ឈាមត្រីឆ្លាម ដែលនេះក៏អាចជាវិធីសាស្ដ្រថ្មី សម្រាប់ការជួយ អ្នកដែលមានរោគមហារីកសុដន់បានដូចគ្នា។

តាមអ្នកសិក្សាស្រាវជ្រាវ បានឲ្យដឹងថា ប្រូតេអ៊ីន អាចជួយការពាររោគមហារីក ដោយបញ្ឈប់រោគមហារីកនេះ មិនឲ្យរីកលូតលាស់ និងចែកចាយនៅក្នុងសារពាង្គកាយមនុស្សបាន។ ដោយកាលពីពេលថ្មីៗនេះ ក្រុមអ្នកសិក្សាស្រាវជ្រាវនៅក្នុង មហាវិទ្យាល័យ Aberdeen នៃប្រទេសអង់គ្លេស បានទទួលកញ្ចប់ទឹកប្រាក់ ចំនួន ៣២០,០០០ ដុល្លារអាមេរិក សម្រាប់ការសិក្សាស្រាវជ្រាវ ទៅលើសារធាតុដែលបង្កើតនៅក្នុងឈាម ដើម្បីធ្វើការទប់ទល់នឹងមេរោគផ្សេងៗ នៅក្នុងរាងកាយនោះ ដែលគេហៅថា IgNAR ។ យោងទៅតាម លោកបណ្ឌិត Helen Dooley ជាអ្នកមកពី មហាវិទ្យាល័យនេះផ្នែកសិក្សាវិទ្យាសាស្ដ្រ ជីវៈវិទ្យាបានឲ្យដឹងថា នេះគឺជាជំហានដំបូង ដែលបានរកឃើញពី អត្ថប្រយោជន៍នៃឈាមត្រីឆ្លាម សម្រាប់ការសិក្សាស្រាវជ្រាវដ៏វែងអន្លាយ ដែលប្រសិនជាការសិក្សានេះ បានជោគជ័យនោះ ពួកគេនឹង ផលិតថ្នាំសម្រាប់ព្យាបាល និងដើម្បីទប់ទល់ជំងឺមហារីក។

ចំពោះរោគមហារីកសុដន់ កំពុងតែក្លាយជាបញ្ហាដ៏សំខាន់ នៅក្នុងប្រទេសអង់គ្លេស ដែលនៅក្នុងនោះ មនុស្ស ៧៥នាក់ក្នុងចំនោម ១០០នាក់ អាចជៀសផុតពីសេចក្ដីស្លាប់បាន និង អាចបន្ដជីវិតរស់នៅយ៉ាងហោចណាស់ ១០ឆ្នាំទៅមុខទៀត៕


ខ្មែរឡូត