ខេត្តកំពត ៖ អ្នកចម្ការម្នាក់ បានប្រទះឃើញសពបុរសមិនស្គាល់អត្តសញ្ញាណ ដែលចង.កនឹងខ្សែអំបោះសីមាភ្ជាប់នឹងដើមឈើមួយដើមទំហំប៉ុនភ្លៅ ស្លាប់នៅក្នុងព្រៃជើងភ្នំ ខាងក្រោមវត្តគិរីឱសថទឹកជប់ ផ្នែកខាងលើរបងសួនសត្វចម្ងាយ៣០ម៉ែត្រ នៅវេលាម៉ោង៩និង៣០នាទីព្រឹកថ្ងៃទី២៨ មីនា នៅភូមិស្នំប្រាំពីរ ឃុំម៉ាក់ប្រាង្គ ស្រុកទឹកឈូ ។ ទោះបីជាបែបណាក្រោយប៉ុន្មានម៉ោងបន្ទាប់ពីប្រទះឃើញសពចង.ក គួរឱ្យសង្ស័យនេះ ក៏មានព័ត៌មានឱ្យដឹងថា យុវជនដែលស្លាប់នេះមានបញ្ហាស្នេហាត្រីកោណបន្ទាប់ពីខ្លួនក្លាយជាគូដណ្តឹងនឹងនារីម្នាក់ ហើយត្រៀមចូលរោងការនៅខែឧសភាខាងមុខ ។ ទោះបីបែបណាមិនទាន់មានពន្លឺច្បាស់ការណ៍បញ្ជាក់ពីការស្លាប់នេះទាក់ទិននឹងរឿងស្នេហាត្រីកោណ ឬយ៉ាងណានៅឡើយទេ ។ យោងតាមសាក្សីបានឱ្យដឹងថា នៅវេលាព្រឹកពួកគាត់ជាអ្នកធ្វើចម្ការនៅក្បែរនោះ មានគ្នាពីរនាក់កំពុងតែដើរពិនិត្យទុយោទឹកដែលតភ្ជាប់ពីភ្នំគិរីទឹកជប់មកចម្ការដំណាំរបស់ពួកគាត់នោះ ។ ពេលមកដល់ផ្លូវដែលមានទុយោទឹកឆ្លងកាត់នោះ ក៏ធុំក្លិនស្អុយ ទើបនាំគ្នាដើររកមើល ស្រាប់តែប្រទះឃើញសពចង.ក និងបានរាយការណ៍ដល់ប៉ូលិសប៉ុស្តិ៍ និងលោកអធិការរងស្រុកទឹកឈូ ហើយក៏មានការចុះទៅដល់កន្លែងកើតហេតុ។ ដោយមានការសង្ស័យ សមត្ថកិច្ចមូលដ្ឋានក៏បានរាយការណ៍ និងសុំមន្ត្រីការិយាល័យបច្ចេកទេសដើម្បីមកពិនិត្យ និងធ្វើកោសល្យវិច័យចំពោះសពដែលប្រទះឃើញ ។ សពពាក់អាវឆ្នូតដៃវែង ពណ៌ផ្កាឈូក ស្លៀកខោជើងវែងក្រណាត់មុ៉ងតេហ្គុយ ពណ៌ស្លែ ស្បែកជើងបាតាមានឆ្នូតស៤ ដៃស្តាំពាក់អំបោះសីមាពណ៌ក្រហម ។ តាមការធ្វើកោសល្យវិច័យសពបាក់ក្រោមក្តោងច្រមុះ និងរបេះធ្មេញជ្រុះអស់ ខាងលើនិងខាងក្រោម ព្រមទាំងពាក់ម៉ាស់ពណ៌ខៀវ។ តាមការសន្និដ្ឋានរបស់សមត្ថកិច្ចជំនាញថាសពអាចស្លាប់ដោយអំពើឃាតកម្ម។ ក្រោយពីសមត្ថកិច្ចធ្វើកោសល្យវិច័យរួចក៏បានប្រគល់ឱ្យនគរបាលរក្សាទុកមួយអន្លើសិនរង់ចាំក្រែងមានសាច់ញាតិតាមរក។ លុះមកដល់វេលាម៉ោង១២និង៣០នាទីថ្ងៃត្រង់ក្នុងថ្ងៃដដែល ក៏មានប្រជាពលរដ្ឋដែលបាត់សមាជិកគ្រួសារម្នាក់តាំងពីថ្ងៃទី១៥ មីនា បាននាំគ្នាមកមើលនិងអះអាងថា ពិតជាកូនរបស់ខ្លួនមែន ។ តាមការអះអាងឱ្យដឹងថា សពនេះឈ្មោះ វិន សុខដារ៉ា ភេទប្រុស អាយុ២៥ឆ្នាំ មានស្រុកកំណើតនៅភូមិតាអេង សង្កាត់កំពង់កណ្តាល ក្រុងកំពត បច្ចុប្បន្នស្នាក់នៅសង្កាត់ទួលស្វាយព្រៃទី២ ខណ្ឌចំការមន រាជធានីភ្នំពេញ បានចេញបាត់ពីផ្ទះនៅថ្ងៃទី១៥ មីនា ដោយសារតែមានវិបត្តិមុនថ្ងៃរៀបការ និងមិនដឹងថា គេចេញពីផ្ទះនោះទៅទីណាខ្លះនោះទេ សូម្បីតែទូរស័ព្ទមកប្រាប់ក្រុមគ្រួសារក៏បាត់ដំណឹងសូន្យឈឹង។ សាច់ញាតិរៀបរាប់ថា យុវជននេះទើបនឹងភ្ជាប់ពាក្យហើយជាមួយគូដណ្តឹងនៅភូមិក្រាំង សង្កាត់ក្រាំងអំពិល ក្រុងកំពត ។ ប្រភពពីក្រុមគ្រួសារបន្តទៀតថា យុវជនរូបនេះ នឹងត្រូវរៀបអាពាហ៍ពិពាហ៍នៅខែឧសភា ខាងមុខ។ ប្រភពបន្តទៀតថា ជុំវិញការស្លាប់របស់យុវជនរូបនេះ អាចមានបញ្ហាពាក់ព័ន្ធនឹងរឿងផ្ទាល់ខ្លួនដែលក្រុមគ្រួសារសពបានដឹងរួចហើយ និងបានរាយការណ៍ឱ្យសមត្ថកិច្ចបានដឹងរួចហើយដែរ ពីស្នេហាត្រីកោណក្រោយពេលភ្ជាប់ពាក្យ។ តែករណីនេះក្រុមគ្រួសារសពមិនបំភ្លឺឱ្យដឹងលម្អិតទេ តែបានផ្តល់ព័ត៌មានទុកឱ្យសមត្ថកិច្ចជំនាញ សម្រាប់ស្រាវជ្រាវរកឃាតករ៕
Bopha
ផ្តល់សិទ្ធដោយ កោះសន្តិភាព
សូមប្រិយមិត្តជួយចុច Add a comment ដើម្បីផ្តល់ជាមតិ និងជួយ Share នៅលើ Facebook របស់អ្នក។
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]