រាជធានីភ្នំពេញ ៖ បន្ទាប់ពីក្រុមកីឡាបាល់ទាត់ដែលបានបញ្ជូនឱ្យទៅចូលរួមប្រកួតកីឡាស៊ីហ្គេមនៅប្រទេសហ្វ៊ីលីពីន កាលពីថ្ងៃទី២៣ ខែវិច្ឆិកា ហើយទទួលបានលទ្ធស្មើ១-១ ជាមួយក្រុមម្ចាស់ផ្ទះនោះ កាលពីយប់ថ្ងៃទី២៦ ខែវិច្ឆិកា ប្រតិភូកីឡាចំនួន៣ក្រុមផ្សេងទៀតត្រូវបានបញ្ជូនឱ្យទៅចូលរួមក្នុងព្រឹត្តិកាណ៍កីឡាអាស៊ានមួយនេះរួមមាន កីឡាទូកក្ដោង កីឡាបាល់ទះលើឆ្នេរខ្សាច់ និងកីឡាកាយសម្ព័ន្ធ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សប្រតិភូនេះ ដឹកនាំដោយលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជានិងជានាយកបេសកកម្មប្រតិភូកីឡាស៊ីហ្គេមនៅហ្វ៊ីលីពីន ។
លោក វ៉ាត់ ចំរើន បានប្រាប់ឱ្យដឹងនៅមុនពេលចេញដំណើរនៅឯព្រលានយន្តហោះអន្តរជាតិភ្នំពេញថា នៅថ្ងៃទី២៨ ខែវិច្ឆិកា មានប្រតិភូកីឡាចំនួន៩ប្រភេទទៀតចេញដំណើរទៅតាមក្រោយជាបន្តបន្ទាប់ រហូតដល់ថ្ងៃទី៣០ ខែវិច្ឆិកា និងថ្ងៃទី១ ខែធ្នូ ទើបចប់ រួមជាមួយផ្នែករដ្ឋបាលនិងបច្ចេកទេស ព្រមទាំងគ្រូបង្វឹកផងដែរ ។
លោកបន្តទៀតថា ក្នុងចំណោម៣១ប្រភេទ កីឡាដែលត្រូវបានបញ្ជូនឱ្យទៅចូលរួមប្រកួតកីឡាស៊ីហ្គេមលើកទី៣០ ឆ្នាំ២០១៩ នៅប្រទេសហ្វ៊ីលីពីន មានប្រភេទកីឡាមួយចំនួនដែលយើងសង្ឃឹមថានឹងទទួលបានមេដាយមានដូចជា កីឡាល្បុក្កតោដែលកំពុងស្ថិតនៅទីនោះស្រាប់ កីឡាប្រដាល់គុនខ្មែរ កីឡាប៉េតង់ កីឡាជិតជីស៊ូ កីឡាសូហ្វតឺន្នីស កីឡាវាយកូនបាល់ និងកីឡាការ៉ាតេ ។ ប៉ុន្តែចំពោះការរកបានមេដាយប៉ុន្មានគ្រឿងនោះ លោកមិនហ៊ានអះអាងទុកមុនឡើយ គឺត្រូវរង់ចាំមើលលទ្ធផលជាក់ស្ដែង ។
លោក វ៉ាត់ ចំរើន បានសង្កត់ធ្ងន់ថា មេដាយដែលយើងចង់បានគឺមេដាយមាស ហើយគោលបំណងសំខាន់បំផុតនោះគឺធ្វើយ៉ាងណារកឱ្យបានច្រើនជាងការប្រកួតកីឡាស៊ីហ្គេមលើកទី២៩នៅទីក្រុងគូឡាឡាំពួរ ប្រទេសម៉ាឡេស៊ី កាលពីឆ្នាំ២០១៧ ៕
ប្រភព៖ កោះសន្តិភាព
Bong I.T