ក្លិបនៅអារ៉ាប់មួយហ៊ានឲ្យប្រាក់ខែ តារាឆ្នើម R.Madrid រូបនេះមួយពាន់លាន ឲ្យតែព្រមទៅលេង

កីឡា៖ យោងតាមការចុះផ្សាយរបស់អ្នកកាសែត Fabrizio Romano បានបញ្ជាក់ឲ្យដឹងថា ក្លិបនៅអារ៉ាប់ប៊ីសាអូឌីតមួយ សន្យាថានឹងផ្ដល់ប្រាក់ឈ្នួលចំនួន ១ពាន់លានអឺរ៉ូ(ស្មើនឹងប្រមាណ ១,១៦១ ពាន់លានដុល្លារ)ជូនដល់ខ្សែប្រយុទ្ធ Vinicius Jr. ឲ្យតែកីឡាកររូបនេះព្រមផ្លាស់ទៅ។

ថ្មីៗនេះ Romano បាននិយាយដែរថា អនាគត Vinicius ជាមួយនឹង Real Madrid ហាក់ស្រពេចស្រពិល ដោយការចរចាបន្តកុងត្រាមិនទាន់មានការព្រមព្រៀងអ្វីនោះឡើយ និងមើលទៅអាចត្រូវពិភាក្សាគ្នាយូរទៀត ខណៈដែលកុងត្រាចាស់របស់កីឡាករសញ្ជាតិប្រេស៊ីលរូបនេះ នឹងអស់សុពុលភាពជាមួយ Real Madrid ត្រឹម ឆ្នាំ២០២៧។

យ៉ាងណាមិញ ក៏មានពាក្យចចាមអារ៉ាមជាហូរហែថា Vinicius Jr. អាចនឹងចាកចេញពី Real Madrid ដូច្នេះហើយទើបក្លិបនៅអារ៉ាប់មួយគ្រោងនឹងផ្ដល់ទឹកប្រាក់មហាសាលទាក់ទាញកីឡាកររូបនេះចំនួន៥ឆ្នាំ ប៉ុន្តែគេពុំទាន់ដឹងថា Vinicius Jr. ឆ្លើយតបទៅយ៉ាងណានោះឡើយ។ Romano ក៏មិនបានបង្ហើបដែរថា ក្លិបនោះគឺក្លិបមួយណាដែរ៕