អឺរ៉ុប៖ ការប្រកួតជុំទីបីវគ្គចែកពូល ពានរង្វាន់ UEFA Champions League រដូវកាល ២០១៩-២០២០ កាលពីយប់មិញមានការស៊ុតបញ្ចូលទីគ្នាច្រើនគ្រាប់មែនទែន។

ក្លិបអ្នកមាននៅបារាំង PSG បានយកឈ្នះម្ចាស់ផ្ទះ Club Brugge ក្នុងលទ្ធផល ០ទល់នឹង៥ ដោយខ្សែប្រយុទ្ធវ័យក្មេង Kylian Mbappe ធ្វើបាន Hat-Trick ខណៈ ២គ្រាប់ទៀតរកបានដោយកីឡាករ Mauro Icardi។ ចំណែកឯមួយគូទៀតក្នុងពូល A ជាមួយគ្នាដែរគឺ Galatasaray បានប្រកួតចាញ់ក្រុមភ្ញៀវ Real Madrid ក្នុងលទ្ធផល ០ទល់នឹង១។

ងាកមកមើលពូល B ឯណេះវិញក៏ស៊ុតគ្នាមិនចាញ់ពូល A ប៉ុន្មានដែរពោលគឺ Spurs បានយកឈ្នះ FC Crvena Zvezda ក្នុងលទ្ធផល ៥ទល់នឹង០ ខណៈមួយគូទៀត Bayern Munich ឈ្នះប្រផិតប្រផើយមកលើម្ចាស់ផ្ទះ Olympiacos ២ទល់នឹង៣។

៥គ្រាប់របស់ Spurs រកបានដោយ Harry Kane និង Heung-Min Son ក្នុងម្នាក់ ២គ្រាប់ រីឯមួយគ្រាប់ទៀតរកបានដោយកីឡាករលេខ១១ Erik Lamela។

មិនខុសពី២ពូលខាងលើ កាលពីយប់មិញក្នុងពូល C មានការស៊ុតគ្នាដល់ទៅ១០គ្រាប់ ក្នុងនោះមេឃខៀវ Manchester City បានលត់ក្លិបមកពីអ៊ីតាលី Atalanta ៥ទល់នឹង១ ស្របពេលដែល Shakhtar Donetsk ស្មើគ្នា ២ទល់នឹង២ ជាមួយ Dinamo Zagreb។

គ្រាប់ទាំង ៥របស់កូនក្រុមលោក Pep ធ្វើឡើងបន្ទាប់ពី Atalanta ជាអ្នកបើកការនាំមុខមុនដោយបាល់ពិន័យ ១១ម៉ែត្រនៅនាទី២៨ ដោយកីឡាករ Ruslan Malinovsky។ យ៉ាងណា Man City បានវាយបកយកឈ្នះវិញតាមរយៈការធ្វើ Hat-Trick របស់ Sterling បូកនឹងការស៊ុត ២គ្រាប់របស់ Ageuro។

គួរឲ្យដឹងដែរថា បីប្រកួតកន្លងមកនេះ PSG, Man City និង Spurs មិនទាន់ស្គាល់ពាក្យថាចាញ់ឬស្មើគ្នានោះទេ ដោយ ៣ប្រកួតឈ្នះទាំង៣ និងកំពុងឈរនៅចំណាត់ថ្នាក់លេខ១តាមពូលរៀងៗខ្លួន៕

សូមទស្សនាវីដេអូ Highlight នៅខាងក្រោម៖

Club Brugge 0-5 PSG
Spurs 5-0 FC Crvena Zvezda
Man City 5-1 Atalanta

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 085836679 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 085836679 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក កីទ្បា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]