ស៊ុតដាច់ចង្កេះអ្នកចាំទីល្អណាស់! Ronaldo ស៊ុតចុងម៉ោងនាទី៩០+១ ជួយ Juventus វាយបកតាមស្មើ AC Milan (មានវីដេអូ)

អ៊ីតាលី៖ ក្នុងការប្រកួតពានរង្វាន់ Coppa Italia វគ្គពាក់កណ្ដាលផ្ដាច់ព្រ័ត្រជើងទី១ កាលពីរាត្រីថ្ងៃព្រហស្បតិ៍ម្សិលមិញ ក្រុមម្ចាស់ផ្ទះ AC Milan បានប្រកួតស្នើគ្នា ១ទល់នឹង១ ជាមួយនឹងក្រុមភ្ញៀវ Juventus នៅកីឡដ្ឋាន San Siro ។

ក្នុងការប្រកួតដ៏ជក់ចិត្តនេះ ក្រុមម្ចាស់ផ្ទះជាអ្នកស៊ុតបើកឆាកនាំមុខនៅនាទីទី៦១ រកបានដោយខ្សែបម្រើ Ante Rebic ។ លុះជិតបញ្ចប់ការប្រកួត នៅនាទីទី៩០+១ ទើបក្រុមភ្ញៀវមានឱកាសវាយកបកតាមស្មើវិញ ដែលជាការស៊ុតបាល់ពិន័យ១១មែត្រ របស់ម្ចាស់អាវលេខ៧ កីឡាករ Cristiano Ronaldo។

ក្រោយបញ្ចប់៩០នាទី ឃើញថាក្រុមទាំងពីរមានការប៉ះទង្គិចគ្នាច្រើនគួរសម ដោយអាជ្ញាកណ្ដាលចាយកាតអស់រហូតដល់ទៅ៦សន្លឹក ក្នុងនោះមានកាតលឿង៥និងក្រហម១។ ខណៈកីឡាករដែលរងពិន័យត្រូវបណ្ដេញចេញពីទីលាននោះគឺខ្សែបម្រើ Theo Hernandez របស់ក្រុម ​AC Milan ។

ក្រឡេកទៅមើលស្ថិតិនៃការប្រកួតវិញឃើញថា ក្រុមម្ចាស់ផ្ទះ បង្កើតឱកាសបានច្រើន ដោយស៊ុតសំដៅទីក្រុមភ្ញៀវបានរហូតដល់ទៅ២១ជើង​ ចំគោលដៅ១១ដង ចំណែកឯក្រុម Juventus ស៊ុតបាន១៤ជើង ចំគោលដៅ៤ដង។

គួរឲ្យដឹងដែរថា សម្រាប់ការប្រកួតជើងទី២ រវាងក្រុមទាំងពីរ នឹងត្រូវធ្វើឡើងនៅថ្ងៃទី៥ ខែមីនា ឆ្នាំ២០២០ខាងមុខ នៅកីឡដ្ឋាន  Allianz Stadium ដែលជាទឹកដីរបស់ក្រុមសេះបង្កង់ Juventus៕

បើចង់ឃើញការស៊ុតបញ្ចូលទីគ្នាជក់ចិត្តយ៉ាងណានោះ សូមទស្សនាវីដេអូខាងក្រោម៖