ញាក់សាច់! មនុស្សជាង ១៤០នាក់ត្រូវបានចាប់ខ្លួន ក្នុងការប៉ះទង្គិចគ្នាមុនការប្រកួតរវាង Ajax និង Juventus

ហូឡង់៖ មានករណីគួរឱ្យភ្ញាក់ផ្អើលមួយកើតឡើង បន្ទាប់ពីសមត្ថកិច្ចក្រុងអាំស្ទែរដាំ របស់ហូឡង់បានធ្វើការបង្ក្រាប និងឃាត់ខ្លួនមនុស្សជាង ១៤០នាក់ រវាងអ្នកគាំទ្ររបស់ Ajax និងអ្នកគាំទ្ររបស់ Juventus មុនការប្រកួតចាប់ផ្តើមនៅកីឡដ្ឋាន Johan Cryuff Arena។ ឈុតឆាកនៃការប៉ះគ្នាយ៉ាងកក្រើករវាងអ្នកគាំទ្រក្រុមទាំង២ ក៏ត្រូវបានគេចែកចាយពាសពេញបណ្តាញសង្គមផងដែរ។

ដោយឡែក សមត្ថកិច្ចក្រុងអាំស្ទែរដាំ ក៏បានចែករំលែកពីរូបភាពនៃការប៉ះទង្គិចគ្នារវាងអ្នកគាំទ្រទាំងនោះ ដែលអ្នកខ្លះមានកាន់កាំបិត និងកាំជ្រួចផ្សែងនៅក្នុងដៃទៀតផង។ ប៉ុន្តែក្រោយមក ប៉ូលិសបានចេញសេចក្តីថ្លែងការណ៍មួយឱ្យដឹងថា ភាគច្រើននៃជនដែលពាក់ព័ន្ធនិងករណីប៉ះទង្គិចគ្នានេះ ជាក្រុមអ្នកគាំទ្ររបស់ក្លិប Juventus។ ជាក់ស្តែង បើតាមការឱ្យដឹងពីលោក Matteo Salvini ដែលជាឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃរបស់អ៊ីតាលីបានអះអាងថា ក្នុងចំណោមជនដែលត្រូវឃាត់ខ្លួនជាង ១៤០នាក់នោះ មាន ១២០នាក់ជាអ្នកគាំទ្ររបស់ក្លិប Juventus។ យ៉ាងណាមិញ សមត្ថកិច្ចកំពុងតែដុតដៃដុតជើង ស្រាវជ្រាវទៅលើករណីនេះផងដែរ ពាក់ព័ន្ធការរំខានដោយសារការដុតកាំជ្រួច និងករណីអំពើហិង្សា និងរាប់បញ្ចូលទាំងការធ្វើឱ្យប៉ះពាល់ដល់កីឡដ្ឋានផងដែរ៕