ខេត្តសៀមរាប ៖ លោក ជូ លឹម ហ៊ាង ចៅក្រមស៊ើបសួរនៃសាលាដំបូងខេត្តសៀមរាប បានសម្រេចឃុំខ្លួន ឃាតកដៃឆៅ២នាក់ ជាជនជាតិជប៉ុន តាមបទបញ្ជារបស់តុលាការនៅម៉ោង៤ និង៣០នាទីល្ងាច ថ្ងៃទី១៩ ខែមីនា ២០១៩នេះ នៅពន្ធនាគារខេត្តសៀមរាប ត្រូវបានដាក់ឱ្យស្ថិតនៅក្រោមការពិនិត្យ ពីបទឃាតកម្មគិតទុកជាមុន ដែលប្រព្រឹត្តិនៅក្នុងភូមិសាស្ត្រ ភូមិពួកថ្មី ឃុំពួក ស្រុកពួក ខេត្តសៀមរាប កាលពីថ្ងៃទី១៧ ខែមីនា ឆ្នាំ២០១៩ បទល្មើសដែលមានចែងឱ្យផ្តន្ទាទោស តាមបញ្ញតិ្តមាត្រា២០០ នៃក្រមព្រហ្មទណ្ឌ បង្គាប់ឱ្យលោកប្រធានមន្ទីរឃុំឃាំង ឃុំខ្លួន ជនសង្ស័យទាំង២នាក់ ដែលមានឈ្មោះ ដូចខាងក្រោម៖
១/ឈ្មោះ ISHIDA REIMON ភេទប្រុស អាយុ២៤ឆ្នាំ ,ទី០២ឈ្មោះ NAKA RYUJI ភេទប្រុស អាយុ២៤ឆ្នាំ បានចូលមកប្រទេសកម្ពុជា តាមច្រកអន្តរជាតិ ប៉ោយប៉ែត នៅវេលាម៉ោងប្រហែល១២ថ្ងៃត្រង់ ខែឆ្នាំដដែល ពួកគេបានជិះតាក់ស៊ីទៅខេត្តសៀមរាប ពួកគេបានសម្រាកនៅសណ្ឋាគារមួយកន្លែងក្នុងក្រុងសៀមរាប មិនចាំឈ្មោះ។ លុះព្រឹកឡើងថ្ងៃទី១៧ ខែមីនា ឆ្នាំ២០១៩ វេលាម៉ោង១២ថ្ងៃត្រង់ ពួកគេបានរកតាក់ស៊ីជិះទៅស្វាយស៊ីសុផុន ខេត្តបន្ទាយមានជ័យ ក្នុងគោលបំណងរកឡានតាក់ស៊ីថ្មី ដើម្បីប្លន់យកទៅប្រើប្រាស់។
ពេលទៅដល់ ស្វាយស៊ីសុផុន ពួកគេបានរកតាក់ស៊ីថ្មីបាន ដែលជារថយន្តជនរងគ្រោះ ម៉ាកហាយឡែនឌ័រ ពណ៌ស្ករ ស្លាកលេខ ២AB-៥២១៨ ដោយពួកគេប្រាប់ជនរងគ្រោះថា ចង់ទៅសៀមរាប ហើយត្រូវគ្នាក្នុងតម្លៃ៣០ដុល្លារ។
ពួកគេក៏ឡើងតាក់ស៊ីដោយជិះតែ០៣នាក់គត់ (តៃកុងតាក់ស៊ី និងពួកគេ០២នាក់) ជនសង្ស័យទាំង២ជិះនៅកៅអីខាងក្រោយតៃកុង ពេលជិះដល់ចំណុចកើតហេតុ ពួកគេបានប្រាប់តាក់ស៊ីឱ្យឈប់ ហើយឈ្មោះ ISHIDA REIMON បានបើកទ្វារតាក់ស៊ីចុះ ដើម្បីមើលផ្លូវ ដោយទុកឱ្យបក្ខពួកខ្លួនធ្វើសកម្មភាពប្លន់សម្លាប់យករថយន្ត។
បានប្រហែល២នាទី រូបគេក៏បើកទ្វារតាក់ស៊ី ឃើញបក្ខពួកខ្លួនកំពុងយកកាំបិតអារក ជាច្រើនកាំបិត ទៅលើជនរងគ្រោះ ដោយជនរងគ្រោះកំពុងរើបម្រាស់ ភ្លាមនោះជនរងគ្រោះក៏ធ្លាក់ចេញពីលើ រថយន្តដោយខ្លួនឯង រួចរូបគេបានឡើងរថយន្ត បើកចេញពីកន្លែងកើតហេតុ បានប្រហែល៣០ម៉ែត្រ រថយន្តក៏ជ្រុលទៅ បុកឡានផ្សេងទៀត រួចពួកគេក៏បើកទ្វារចុះរត់ តែត្រូវសមត្ថកិច្ចចាប់ឃាត់បានតែម្តង។ វត្ថុតាង ដែលដកហូតបានពីជនសង្ស័យមាន កាំបិតប្រវែង១៩សង់ទីម៉ែត្រ១ដើម និងដំបងរលាស់១ដើម ពួកគេយកតាមខ្លួនមកពីប្រទេសជប៉ុន។
ចំណែកជនរងគ្រោះឈ្មោះ ហ៊ឹម ចាន់ ភេទប្រុស អាយុ៤០ឆ្នាំ មុខរបររត់តាក់ស៊ី រស់នៅភូមិបឹងដូនប៉ា សង្កាត់ស្លក្រាម ក្រុងខេត្តសៀមរាប ត្រូវបានសមត្ថកិច្ច បានធ្វើការប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណីរួចរាល់អស់ហើយ។
គួរបញ្ជាក់ថា ករណីឃាតកម្មគិតទុកជាមុននោះបានកើតឡើងនៅវេលាម៉ោង៥ល្ងាច ថ្ងៃទី១៧ ខែមីនា ឆ្នាំ២០១៩ ស្ថិតនៅចំណុចលើកំណាត់ផ្លូវជាតិលេខ៦ ត្រង់ចំណុចជញ្ជីញថ្លឹងរថយន្តពួក ក្នុងទឹកដីភូមិពួកថ្មី ឃុំពួក ស្រុកពួក ខេត្តសៀមរាប ទៅលើជនរងគ្រោះឈ្មោះ ហ៊ឹម ចាន់ ភេទប្រុស អាយុ៤០ឆ្នាំ មុខរបរ រត់តាក់ស៊ី រស់នៅភូមិបឹងដូនប៉ា សង្កាត់ស្លក្រាម ក្រុង/ខេត្តសៀមរាប៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]