បុរសពិការភ្នែកម្នាក់ បានទទួលជោគជ័យក្នុងការប្រកួតរត់ម៉ារ៉ាតុង ដោយសារសត្វឆ្កែរបស់គាត់ជាអ្នកនាំផ្លូវ

អាមេរិក៖ លោក Thomas Panek មានអាយុ៤៨ឆ្នាំ ជាជនពិការភ្នែកម្នាក់ តែថ្មីៗនេះ គាត់បានទទួលជោគជ័យក្នុងកម្មវិធីប្រកួតរត់ម៉ារ៉ាតុងមួយនៅក្នុងទីក្រុងញ៉ូវយ៉ក ដោយសារតែមានសត្វឆ្កែចិញ្ចឹម៣ក្បាលរបស់គាត់ដែលជាអ្នកនាំផ្លូវ។ នេះបើយោងតាមសារព័ត៌មានបរទេស Dailymail ចេញផ្សាយក្នុងថ្ងៃទី ១៨ ខែ មីនា ឆ្នាំ ២០១៩។

ឆ្កែចិញ្ចឹមរបស់លោក Thomas ទាំង៣ក្បាលនោះមានឈ្មោះថា Waffles, Westley និង Gus ហើយពួកវាក៏ត្រូវបានអង្គការសប្បុរសធម៌មួយដែលមានឈ្មោះថា Guiding Eyes For Blind បង្ហាត់បង្រៀនពីវិធីក្នុងការនាំផ្លូវអ្នកពិការភ្នែកផងដែរ។

គួរបញ្ជាក់ថា លោក Thomas គឺជាជនពិការភ្នែកដំបូងបង្អស់ ដែលបានបញ្ចប់ការរត់ប្រណាំងប្រភេទម៉ារ៉ាតុង ដោយមិនបានប្រើកម្លាំងឫជំនួយពីមនុស្សដទៃ តែបែរជាពឹងផ្អែកលើសត្វឆ្កែជាអ្នកនាំផ្លូវទៅវិញ។

ក្នុងថ្ងៃរត់ប្រណាំងនោះ លោក Thomas បានបញ្ចប់ការរត់ប្រណាំងចម្ងាយ ២១,០៨ គីឡូម៉ែត្រ ក្រោម ថេរវេលា ២ម៉ោងកន្លះ។ ក្នុងថ្ងៃជាមួយគ្នានោះ សត្វឆ្កែនីមួយៗអាចរត់បានក្នុងល្បឿនចន្លោះពី ៤,៨៣ ទៅ ៨,០៥ គីឡូម៉ែត្រ។

គួររម្លឹកថា លោក Thomas ងងឹតភ្នែកតាំងពីអាយុ២០ឆ្នាំ។ តែអ្វីដែលគួរឲ្យចាប់អារម្មណ៍នោះគឺ កន្លងមកលោក Thomas ធ្លាប់បានចូលរួមនិងបញ្ចប់ការរត់ប្រណាំងផ្សេងៗបានចំនួន ២០លើករួចដែរហើយ ដោយមានជំនួយពីការជ្រោមជ្រែងរបស់មនុស្សដទៃក្នុងអំឡុងពេលរត់។

យោងតាមប្រសាសន៍របស់លោក Thomas ផ្ទាល់បានឲ្យដឹងថា “ខ្ញុំមានអារម្មណ៍ថា ភ័យខ្លាចក្នុងការរត់ណាស់ នៅពេលដែលខ្ញុំបាត់បង់ចក្ខុវិស័យនេះ”។ 
គួរបញ្ជាក់ថា ការប្រកួតរត់ម៉ារ៉ាតុងនេះត្រូវបានគេប្រារព្ធឡើងនៅលើដងផ្លូវ Patrick’s Day ដែលមានមនុស្សជិត២ម៉ឺននាក់បានមកចុះឈ្មោះចូលរួម ដោយពួកគេតម្រូវឲ្យរត់ឆ្លងកាត់អគារ Time Square ដែលមានទីតាំងក្នុងទីក្រុងញ៉ូវយ៉ក៕