ខេត្តព្រះសីហនុ ៖ នៅទីកម្សាន្តតំបន់មាត់សមុទ្រក្នុងក្រុងព្រះសីហនុ កាលពីវេលាម៉ោងប្រមាណ ជាង៣ទៀបភ្លឺឈានចូលថ្ងៃទី១៥ មីនា មានករណីចោរឆក់កាបូប (លួចមានស្ថានទម្ងន់ទោស) បង្កដោយជនជាតិចិនដូចគ្នា២នាក់ នៅចំណុចភូមិ២ សង្កាត់លេខ៤ ក្រុង.ខេត្តព្រះសីហនុ។ ជនសង្ស័យបានធ្វើសកម្មភាពឆក់យកកាបូបពីដៃជនរងគ្រោះ ជាជនជាតិចិន ភេទស្រី ខណៈពេលជនរងគ្រោះកំពុងចុះពីលើរថយន្តដើរចូលផ្ទះ។
បន្ទាប់ពីឆក់យកកាបូបបានហើយ ជនសង្ស័យម្នាក់បានរត់ទៅជិះម៉ូតូ ម៉ាកអ៊ែរប្លែក១គ្រឿង ពណ៌ខ្មៅលាយប្រផេះ គ្មានស្លាកលេខ ដែលបក្ខពួកម្នាក់ទៀតបញ្ឆេះនៅចាំក្បែរនោះ រួចបើកជិះគេចខ្លួនបាត់ស្រមោល។
តែទោះជាយ៉ាងណាក្តី ព័ត៌មានស្តីពីអំពើឆក់នោះ ត្រូវបានកម្លាំងជំនាញផែននគរបាលព្រហ្មទណ្ឌទទួលបានភ្លាម ក្រោមបទបញ្ជា ពីស្នងការនគរបាលខេត្ត កម្លាំងសហការមាននគរបាលក្រុង និងប៉ុស្តិ៍នគរបាលរដ្ឋបាលសង្កាត់លេខ៤ បានចុះធ្វើការស្រាវជ្រាវជាបន្ទាន់ និងយ៉ាងយកចិត្តទុកដាក់បំផុត លុះវេលាព្រឹកថ្ងៃដដែលទើបឈានដល់ ការឃាត់ខ្លួនជនសង្ស័យម្នាក់ រីឯម្នាក់ទៀតកំពុងគេចខ្លួន។
ជនសង្ស័យដែលឃាត់ខ្លួននោះឈ្មោះ MA QING LAI ភេទប្រុស អាយុ៤៦ឆ្នាំ ជនជាតិចិន មុខរបរ មិនពិតប្រាកដ ស្នាក់នៅអូរត្រេះ២ ភូមិ៦ សង្កាត់៤ ក្រុង.ខេត្តព្រះសីហនុ។ និងម្នាក់គេចខ្លួនឈ្មោះ A BIAO ភេទប្រុស ជនជាតិចិន មុខរបរមិនពិតប្រាកដដូចគ្នា។ ចំណែកជនរងគ្រោះមានឈ្មោះ WU ZHONGBING ភេទស្រី អាយុ៣០ឆ្នាំ ជនជាតិចិន មុខរបរ បុគ្គលិកសណ្ឋាគារព្រីន មានទីលំនៅភូមិ២ សង្កាត់៤ ក្រុង.ខេត្តព្រះសីហនុ។ វត្ថុតាងចាប់យកបានរួមមាន ៖ កាបូបដៃ០១ ពណ៌ខ្មៅ,វិទ្យុទាក់ទង០១គ្រឿង,សៀវភៅសរសេរ ០២ក្បាល,លុយ១,៨៧៥ដុល្លារអាមេរិក។
ទូរស័ព្ទដៃ០១គ្រឿង ម៉ាក VIVO ពណ៌ខ្មៅ,ទល់រវីសធំៗចំនួន០៤,ញញួរ ០១,ស្កុត ០១ដុំ,ម៉ាស់ ០១ដុំ,ម៉ូតូ ០១គ្រឿង ម៉ាកអ៊ែរប្លែក ពណ៌ខ្មៅ-ប្រផេះ គ្មានស្លាកលេខ ជាមធ្យោបាយជិះធ្វើសកម្មភាព។ ករណីខាងលើនេះសមតត្ថកិច្ចនគរបាលព្រហ្មទណ្ឌកម្រិតស្រាល បាន និងកំពុងកសាងសំណុំរឿង បញ្ជូនទៅសាលាដំបូងខេត្តតាមនីតិវិធី៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]