រាជធានីភ្នំពេញ ៖ ជនសង្ស័យ២នាក់បានធ្វេីសកម្មភាពឆក់ទូរស័ព្ទពីស្ត្រី២នាក់បានសម្រេច ពេលស្ត្រីរងគ្រោះកំពុងជិះម៉ូតូ បណ្ដាលឲ្យដួលម៉ូតូធ្វើឱ្យស្ត្រីទាំង២នាក់រងរបួស បន្ទាប់មកក្រុមជនសង្ស័យបាននាំគ្នាព្យាយាមជិះម៉ូតូគេចខ្លួន ប៉ុន្តែគេចមិនរួចឡើយ ដោយសារតែអ្នកដំណើរតាមផ្លូវប្រទះឃើញ និងនាំគ្នាជិះម៉ូតូដេញតាមចាប់បាន រួចវាយទាត់ធាក់ម្នាក់១ដៃម្នាក់១ជើង ទើបប្រគល់ជូននគរបាលដើម្បីសាកសួរ និងកសាងសំណុំរឿងចាត់ការតាមច្បាប់។
ហេតុការណ៍ខាងលើនេះបង្កឱ្យមានការភ្ញាក់ផ្អើលកើតឡើងកាលពីវេលាម៉ោង១និង៣០នាទីរសៀលថ្ងៃទី១៣ ខែមិនា ឆ្នាំ២០១៩ នៅតាមមហាវិថីសហព័ន្ធរុស្សុី នៅត្រង់ចំណុចស្តុបកែងផ្លូវចូលផ្សារព្រៃទា ស្ថិតនៅក្នុងភូមិព្រៃទា សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។ ក្រោយពេលធ្វើសកម្មភាពឆក់បានសម្រេច ជនសង្ស័យទាំង២នាក់ខាងលើជិះម៉ូតូគេចខ្លួនដល់ត្រង់ចំណុចច្រកចូលផ្សារតាំងកសាង ភូមិចំការឪឡឹក សង្កាត់កាកាបទី២ ខណ្ឌពោធិ៍សែនជ័យ ទើបប្រជាពលរដ្ឋដេញចាប់បាន និងប្រគល់ជូននគរបាល។
ជនសង្ស័យទាំង២នាក់ខាងលើនោះរួមមានម្នាក់ឈ្មោះឌិន សំអូន ហៅវី អាយុ១៨ ឆ្នាំ មុនរបរមិនពិតប្រាកដ ស្នាក់នៅក្នុងភូមិក្រាំងពង្រ ឃុំវល្លិ៍ស ស្រុកសំរោងទង ខេត្តកំពង់ស្ពឺ និងម្នាក់ទៀតឈ្មោះខុន សៀងហួត អាយុ១៨ ឆ្នាំ មុខរបរជាងចាក់សាក់ ស្នាក់នៅក្នុងភូមិឃុំជាមួយគ្នា។
តាមប្រភពពីអ្នកឃើញហេតុការណ៍បានឲ្យដឹងថា នៅមុនពេលកេីតហេតុ គេបានឃេីញកស្ត្រីរងគ្រោះមិនស្គាល់អត្តសញ្ញាណចំនួន២នាក់បានជិះម៉ូតូ១គ្រឿងម៉ាកស៊ុយហ្សុ៊យគីនិច ពណ៌ស ពាក់ស្លាកលេខ ភ្នំពេញ១FN-៤៤២៥ ធ្វេីដំណេីរតាមបណ្តោយផ្លូវមហាវិថីសហព័ន្ធរុស្ស៊ី ក្នុងទិសដៅពីលិចទៅកេីត ពេលនោះស្ត្រីរងគ្រោះបានដាក់ទូរស័ព្ទនៅក្នុងឃ្លុបម៉ូតូខាងមុខ លុះពេលទៅដល់ត្រង់ចំណុចកេីតហេតុខាងលើ ស្រាប់តែជនសង្ស័យទាំង២នាក់ជិះម៉ូតូមួយគ្រឿងម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខកណ្តាល ១G-៨១២៥ ជិះតាមពីក្រោយក៏ធ្វេីសកម្មភាពឆក់ទូរស័ព្ទ បណ្ដាលឲ្យដួលម៉ូតូធ្វើឱ្យស្ត្រីរងគ្រោះរងរបួស ។
ប្រភពដដែលបានបន្តថា ក្រោយពេលឆក់បានសម្រេចហើយ ក្រុមជនសង្ស័យបានជិះម៉ូតូគេចខ្លួនយ៉ាងលឿន ចំណែកអ្នកដំណើរតាមផ្លូវបន្ទាប់ពីឃើញហេតុការណ៍បែបនេះក៏បាននាំគ្នាជិះម៉ូតូដេញតាម រហូតដល់ត្រង់ចំណុចច្រកចូលផ្សារតាំងកសាង ភូមិចំការឪឡឹក សង្កាត់កាកាបទី២ ខណ្ឌពោធិ៍សែនជ័យ ទើបប្រជាពលរដ្ឋដេញចាប់បានទាំង២នាក់រួចហើយមានប្រជាពលរដ្ឋជាច្រើននាក់បាននាំគ្នាចោមរោមវាយទាត់ធាក់ម្នាក់១ដៃម្នាក់១ជើងរហូតទ្រមខ្លួន ទើបប្រជាពលរដ្ឋនាំជនសង្ស័យទាំង២នាក់ទៅប្រគល់ជូននគរបាលប៉ុស្តិ៍កាកាប២ ដើម្បីសួរនាំ និងចាត់ការតាមច្បាប់តែម្ដង៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
