រាជធានីភ្នំពេញ ៖ គ្រោះថ្នាក់ចរាចរណ៍រវាងរថយន្តក្រុងមួយគ្រឿងបុកជាមួយរថយន្តមួយគ្រឿងទៀតប្រភេទមួយបាំងកន្លះ បណ្តាលឱ្យមនុស្សប្រុសស្រីចំនួន៣នាក់រងរបួសធ្ងន់និងស្រាល ចំណែកឯរថយន្តទាំង២គ្រឿងរងការខូចខាតយ៉ាងធ្ងន់ធ្ងរដូចគ្នា។
ករណីគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១០និង៣០នាទីព្រឹកថ្ងៃទី១៧ ខែកុម្ភៈ ឆ្នាំ២០១៩ នៅត្រង់ចំណុចផ្លូវបំបែកជា៤ ផ្លូវ R8 (តំបន់បឹងកក់) ក្នុងសង្កាត់ស្រះចក ខណ្ឌដូនពេញ។
ភាគីខាងរថយន្តមួយគ្រឿងមួយបាំងកន្លះជិះគ្នា៣នាក់ ពណ៌ខៀវ ពាក់ស្លាកលេខ គ ៦១៦០ ភព បើកបរដោយឈ្មោះ អាន វីរៈ ភេទប្រុស អាយុ២៦ឆ្នាំ ត្រូវជាប្តី បានរងរបួសបែកមុខបែកមាត់ហូរឈាម រីឯអ្នករួមដំណើរចំនួន២នាក់ ក្នុងនោះម្នាក់ឈ្មោះ កាកា ភេទស្រី អាយុ១៨ឆ្នាំ ត្រូវជាប្រពន្ធ បានរងរបួសត្រង់ត្រគាក និងជើងយ៉ាងធ្ងន់ធ្ងរ និងអ្នករួមដំណើរម្នាក់ទៀតត្រូវជាម្តាយក្មេក ។ ជនរងគ្រោះទាំង៣នាក់មានទីលំនៅក្នុងភូមិរកាទ្វារ ឃុំ ព្រែកពោធិ ស្រុកស្រីសន្ធ ខេត្តកំពង់ចាម ។
ចំណែកភាគីខាងរថយន្តក្រុងមួយគ្រឿងជារបស់ក្រុមហ៊ុន បូពា អាស៊ី ពាក់ស្លាកលេខ ស្វាយរៀង ៣A-១៥៥៣ បើកបរដោយបុរសម្នាក់មិនស្គាល់អត្តសញ្ញាណ និងបុរសជាព្រូរថយន្តម្នាក់ទៀតមិនស្គាល់អត្តសញ្ញាណ បាននាំគ្នារត់គេចខ្លួនបាត់ ។
តាមប្រភពពីបុរសជាអ្នកបើកបររថយន្តប្រភេទមួយបាំងកន្លះបានប្រាប់ឱ្យដឹងថា មុនពេលកើតហេតុ គាត់ និងប្រពន្ធ រួមទាំងម្តាយក្មេកបាននាំគ្នាក្រោកតាំងពីយប់ចេញពីផ្ទះទៅផ្សារនាគមាស ដើម្បីរកទិញផ្លែឈើយកទៅធ្វើពិធីភ្ជាប់ពាក្យបងថ្លៃស្រីរបស់គាត់ ។
ពេលទិញបានរួចរាល់ហើយ ក៏នាំគ្នាត្រឡប់ទៅផ្ទះវិញ ដោយបើកបររថយន្តមួយគ្រឿងប្រភេទមួយបាំងកន្លះធ្វើដំណើរក្នុងទិសដៅពីលិចទៅកើត លុះមកដល់ចំណុចកើតហេតុ ស្រាប់តែមានរថយន្តក្រុងមួយគ្រឿងបើកបរក្នុងល្បឿនយ៉ាងលឿន ក្នុងទិសដៅពីជើងទៅត្បូង មកបុករថយន្តរបស់គាត់ចំកាប៊ីនផ្នែកខាងឆ្វេង ជាកន្លែងដែលប្រពន្ធរបស់គាត់អង្គុយ បណ្តាលអោយរងរបួសត្រង់ត្រគាក និងជើងយ៉ាងធ្ងន់ធ្ងរ រីឯគាត់បានរងរបួសបែកមុខបែកមាត់ហូរឈាម ។ បន្ទាប់ពីកើតហេតុ អ្នកបើកបររថយន្តក្រុង និងព្រូរថយន្តម្នាក់ទៀតបានរត់គេចខ្លួនបាត់ស្រមោល ។
តាមប្រភពព័ត៌មានពីនគរបាលបានប្រាប់ឱ្យដឹងថា ពាក់ពន្ធ័ទៅនឹងករណីគ្រោះថ្នាក់ចរាចរណ៍ខាងលើ គឺបង្កឡើងដោយអ្នកបើកបររថយន្តក្រុងរបស់ក្រុមហ៊ុន បូពា អាស៊ី បើកបរក្នុងល្បឿនលឿន និងខ្វះការប្រុងប្រយ័ត្ន ទើបទៅបុករថយន្តមួយគ្រឿងប្រភេទមួយបាំងកន្លះជិះគ្នា៣នាក់ខាងលើពេញទំហឹង បណ្តាលអោយស្ត្រីជាប្រពន្ធរងរបួសធ្ងន់ និងអ្នកបើករបររថយន្តជាប្តីរងរបួសបែកមុខបែកមាត់បែបនេះ។
ប្រភពដដែលបន្តថា ក្នុងហេតុការណ៍ខាងលើ បណ្តាលឱ្យរថយន្តមួយគ្រឿងប្រភេទមួយបាំងកន្លះបានក្រពឹតការប៊ីនខាងមុខរងការខូចខាតយ៉ាងដំណំ ចំណែកឯរថយន្តក្រុងរបស់ក្រុមហ៊ុន បូពា អាស៊ី ក៏រងការខូចខាតផ្នែកខាងមុខយ៉ាងធ្ងន់ធ្ងរផងដែរ រីឯអ្នកបើកបររថយន្តក្រុង និងព្រូរថយន្តក្រុង បាននាំគ្នារត់គេចខ្លួនបាត់ស្រមោលអស់ ដោយមិនមានអ្នកណាម្នាក់នៅធ្វើការដោះស្រាយឡើយ។
ក្រោយពេលកើតហេតុ ស្ត្រីរងគ្រោះជាប្រពន្ធអ្នកបើកបររថយន្តប្រភេទមួយបាំងកន្លះត្រូវបានរថយន្តសាមុយមន្ទីរពេទ្យកាល់ម៉ែត្រមកដឹកយកទៅធ្វើការសង្គ្រោះ ចំណែករថយន្តក្រុង និងរថយន្តប្រភេទមួយបាំងកន្លះ ត្រូវបានកម្លាំងមានសមត្ថកិច្ចធ្វើការវាសវែង និងយកទៅរក្សាទុកនៅការិយាល័យនគរបាលចរាចរណ៍ផ្លូវគោករាជធានីភ្នំពេញ ដើម្បីរង់ចាំធ្វើការដោះស្រាយគ្នាជាបន្តទៅទៀត ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]
