អាសូរណាស់! ក្រុមអ្នកជំនាញបញ្ជាក់ច្បាស់ពីកន្លែងប៉ះទង្គិចដែលបណ្តាលឱ្យ Sala ស្លាប់ក្នុងហេតុការណ៍ធ្លាក់យន្តហោះ

បរទេស៖ បើយោងតាមសារព័ត៌មានធំៗ បានចុះផ្សាយថា សមត្ថកិច្ចបានបញ្ជាក់ឱ្យដឹងច្បាស់ ពីមូលហេតុដែលបណ្តាលឱ្យកីឡាករ Emiliano Sala ស្លាប់ក្នុងហេតុការណ៍ធ្លាក់យន្តហោះ កាលពីជាង ៣សប្តាហ៍មុន។ បន្ទាប់ពីមានការធ្វើកោសល្យវិច្ច័យយ៉ាងម៉ត់ចត់រួចមក លទ្ធផលបានបង្ហាញថាកីឡាករ Sala បានស្លាប់ ដោយសារការប៉ះទង្គិចធ្ងន់ធ្ងរត្រង់ក្បាល និងដងខ្លួនរបស់គាត់។

កីឡាករខ្សែប្រយុទ្ធសញ្ជាតិអាហ្សង់ទីនរូបនេះ បានបាត់ខ្លួនជាមួយយន្តហោះ Piper Malibu បន្ទាប់ពីត្រលប់ពីទីក្រុង Nantes មកកាន់ទីក្រុង Cardiff វិញ ក្រោយពេលចុះកិច្ចសន្យាផ្លូវការចូលរួមជាមួយក្លិបបាល់ទាត់ Cardiff City។

គួរបញ្ជាក់ថា កាលពីសប្តាហ៍មុនសាកសពមួយត្រូវបានគេរកឃើញពីក្នុងបំណែកនៃយន្ដហោះក្រោមបាតសមុទ្រ ក្រោយមកត្រូវបានគេកំណត់អត្តសញ្ញាណបានថាជាសាកសពរបស់កីឡាករ Sala។  លោក David Ibbotson ជាពីឡុតបើកយន្តហោះផ្ទាល់ នៅមិនទាន់មានតម្រុយសម្រាប់ការស្វែងរកឃើញនៅឡើយទេ។

ដោយឡែកក្រុមប៉ូលិសបានបើកការស៊ើបអង្កេតមួយអំពីករណីនេះ ដែលគេរំពឹងថានឹងបញ្ចប់នាអំឡុងរយៈពេល ៦ ទៅ ១២ខែខាងមុខ៕