ខេត្តស្ទឹងត្រែង ៖ តាមសេចក្តីរាយការណ៍ព័ត៌មានបឋមបានឱ្យដឹងថា ប្រជាពលរដ្ឋបានប្រទះឃើញសពបុរសម្នាក់មានចងភ្ជាប់ជាមួយដុំថ្មបានអណ្តែតក្នុងទន្លេសេកុង បង្កឱ្យមានការភ្ញាក់ផ្អើលកាលពីវេលាម៉ោង ៦នឹង២៤នាទីព្រឹកថ្ងៃទី៤ កុម្ភៈ ២០១៩ នៅចំណុចខាងមុខសាលាឆទាន (ត្រើយម្ខាង) ស្ថិតក្នុងភូមិបានបុង ឃុំភ្លុក ស្រុកសេសាន។
សពជនរងគ្រោះមិនស្គាល់អត្តសញ្ញាណ ភេទប្រុស មានអាយុប្រហែលជាង២០ទៅ៣០ឆ្នាំ មានកម្ពស់១,៦៥ម៉ែត្រ ។
តាមប្រភពព័ត៌មានពីប្រជាពលរដ្ឋម្នាក់ឈ្មោះសាំ សឿន ភេទប្រុស រស់នៅភូមិភ្លុក បានឱ្យដឹងថា មុនពេលកើតហេតុ គាត់បានទៅដាក់មងក្នុងដងទន្លេក៏ប្រទះឃើញសពបុរសម្នាក់មានសភាពហើមអណ្ដែតក្នុងទន្លេសេកុងមកទើនៅចំណុចខាងមុខសាលាឆទាន(ត្រើយម្ខាង) ហើយសពជនរងគ្រោះនោះមានចងភ្ជាប់ជាមួយដុំថ្មថែមទៀត ។ បន្ទាប់ពីហេតុការណ៍ដូច្នេះ គាត់ក៏បានរាយការណ៍ទៅសមត្ថកិច្ចដើម្បីឱ្យចុះមកពិនិត្យ ។
បន្ទាប់ពីទទួលបានសេចក្តីរាយកាណ៍ភ្លាម កម្លាំងជំនាញសហការជាមួយអធិការនគរបាលស្រុកសេសានបានចុះទៅដល់កន្លែងកើតហេតុដើម្បីពិនិត្យសព រកឃើញថា ពិតជាមានជាប់ពាក់ព័ន្ធនឹងករណីឃាតកម្មប្រាកដមែន ព្រោះសពជនរងគ្រោះត្រូវគេវាយពីក្រោយបណ្តាលឱ្យបាក់ក ហើយត្រូវគេយកចងខ្សែពី.កមកដើមដៃស្តាំ រួចព័ទ្ធមកចងគល់ភ្លៅជាមួយដុំថ្មចំនួន៤ដុំដែលមានទម្ងន់ប្រហែល៣០គីឡូក្រាម រីឯខ្សែចងដុំថ្មមាន៤ប្រភេទផ្សេងគ្នា)។
បន្ទាប់ពីពិនិត្យរួច សមត្ថកិច្ចបានជូនដំណឹងទៅលោកព្រះរាជអាជ្ញាអមសាលាដំបូងខេត្តជ្រាបជារបាយការណ៍តាមនីតិវិធី ហើយលោកព្រះរាជអាជ្ញាបានអនុញ្ញាតឱ្យមេភូមិ-មេឃុំបញ្ចុះសពជនរងគ្រោះនៅទល់មុខភូមិបានបុង ត្រង់ចំណុចមាត់អូរស៊ីម៉ងឃុន ដើម្បីរង់ចាំស្រាវជ្រាវរកក្រុមគ្រួសារសាច់ញាតិមកទទួលយកទៅធ្វើបុណ្យតាមប្រពៃណី។
ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]