នៅចាំកំពូលអ្នកកីឡាកាស Rey Mysterio ទេ? មិត្តសម្លាញ់ Eddie Guerrero ស្លាប់ជាង ១៣ឆ្នាំហើយ មិនហ៊ានទៅអើតផ្នូរ ទើបតែដាច់ចិត្តទៅពេលនេះ.....

អាមេរិក៖ កាលពីពេលថ្មីៗនេះ កំពូលអ្នកកីឡាកាស Rey Mysterio ឬហៅ 619 បានទៅលេងផ្នូរមិត្តសម្លាញ់ Eddie Guerrero កំពុងតែទទួលបានការចាប់អារម្មណ៍ជាខ្លាំង ពីសំណាក់អ្នកប្រើប្រាស់បណ្តាញសង្គម Instagram ។

លោក Rey Mysterio និងលោក Eddie Guerrero ត្រូវបានគេដឹងថា ពួកលោកគឺជាមិត្តសម្លាញ់ស្លាប់រស់នឹងគ្នា ពោលគឺពួកលោកពិតជាមានមនោសញ្ចេតនាស្អិតរមួតនឹងគ្នាខ្លាំងបំផុត។

ប៉ុន្តែជារឿងគួរឱ្យសោកស្តាយ កាលពីឆ្នាំ២០០៥ កន្លងទៅនេះ កំពូលអ្នកកីឡាកាសជើងចាស់លោក Eddie Guerrero បានស្លាប់បាត់ទៅ ធ្វើឱ្យលោក Rey Mysterio ឈឺចិត្តជាខ្លាំង។ ពោលគឺ លោកមិនហ៊ានទៅសែនផ្នូរមិត្តសំណព្វរបស់លោកនោះទេ។ នេះក៏ព្រោះតែលោក ហាក់ទទួលយកពុំបាននូវអ្វីដែលបានកើតឡើងចំពោះមិត្តសម្លាញ់បែបនេះ និងចង់រក្សាភាពស្ងប់ស្ងាត់ម្នាក់ឯង។

អស់រយៈពេលជាង ១៣ឆ្នាំ មកនេះ កំពូលអ្នកកីឡាកាស 619 រូបនេះ នៅតែមិនមានភាពក្លាហាន ហ៊ានប្រឈមមុខ ទៅសែនផ្នូរលោក Eddie ។ ប៉ុន្តែយ៉ាងណាមិញ ទើបតែកាលពីថ្ងៃច័ន្ទកន្លងទៅនេះ ទើបលោកមានភាពក្លាហាន ហ៊ានទៅសែនផ្នូរសម្លាញ់ Eddie ដែលថ្នូរនោះគឺនៅក្នុងទីក្រុង Scottsdale រដ្ឋ Arizona សហរដ្ឋអាមេរិក។ 

ក្រោយមក លោកបានបង្ហោះរូបលោកចូលក្នុងបណ្តាញសង្គម Instagram និងបានរៀបរាប់រឿងនេះប្រាប់មហាជនទាំងអស់ ធ្វើឱ្យមហាជនជាច្រើនស្រក់ទឹកភ្នែក និងបានចូលរួមរំលែកទុក្ខលោក Eddie ផងដែរ។

យ៉ាងណាមិញ មានមនុស្សម្នាជាច្រើនកុះករ ជាពិសេសអ្នកគាំទ្រវិស័យកីឡាកាស នៅតែចងចាំលោក Eddie Guerrero និងលោក Rey Mysterio នៅក្នុងក្រអៅបេះដូងរបស់ពួកគេជានិច្ច៕ 

• រូបភាព