រាជធានីភ្នំពេញ ៖ ស្ត្រីម្នាក់បានបី និងដឹកដៃកូនប្រុសស្រីរបស់នាងចំនួន៣នាក់ ធ្វើដំណើរទៅកាន់សាលាសង្កាត់ ចោមចៅ៣ ដើម្បីសុំពឹងពាក់សុំឲ្យអាជ្ញាធរសង្កាត់ជួយស្វែងរកប្ដីរបស់នាងផង។ ដោយនៅក្នុងពេលនោះនាងបាន រៀបរាប់ថា ប្ដីរបស់នាងចិត្តដាច់ខ្លាំងណាស់ បានពង្រត់ស្រីថ្មីទៅបាត់គ្មានអាល័យដល់រូបនាង និងកូនទាំង៣នាក់ សូម្បីតែបន្តិចឡើយ។
ស្ត្រីរូបនោះបាននាំកូនទៅកាន់សាលាសង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ កាលពីវេលាល្ងាចថ្ងៃទី២២ ខែមករា ឆ្នាំ២០១៩។
ដោយខណៈនោះហើយនាងទទួលបានការ យកចិត្តទុកដាក់ជួយជួយផ្ដល់ថវិកាមួយចំនួនពីសំណាក់លោក វ៉ា សាវឿន ដែលជាចៅសង្កាត់ និងលោក អ៊ឹម វណ្ណា ចៅសង្កាត់រងចោមចៅ៣ រួមជាមួយលោកនាយរងនគរបាលប៉ុស្តិ៍ចោមចៅ៣ ដើម្បីដោះស្រាយជីវភាព មួយគ្រាផងដែរ។
នាងបាននិយាយថា នាងមានឈ្មោះ ញ៉ែត ម៉ី អាយុ២៤ឆ្នាំ មានកូន៣នាក់ ប្រុស២នាក់ និងស្រីម្នាក់ មានស្រុកកំណើតភូមិ តំណាក់ត្រយឹង ឃុំខ្ជាយខាងត្បូង ស្រុកដងទង់ ខេត្តកំពត។ សព្វថ្ងៃស្នាក់នៅ ផ្ទះជួលក្នុងភូមិជម្ពូវ័ន សង្កាត់ ចោមចៅ៣ ខណ្ឌពោធិសែនជ័យ។ ចំណែកប្តីរបស់នាងដែលពង្រត់ស្រីទៅបាត់នោះ ឈ្មោះ ប៊ុន ង៉ែត អាយុ២៤ឆ្នាំ មុខរបរកម្មករសំណង់។
ស្ត្រីរូបនេះបានបន្តឲ្យដឹងទៀតថា នាង និងប្ដីបានរៀបការ ជាមួយគ្នាពេញច្បាប់ កាលពីអំឡុងឆ្នាំ២០១២ ដោយមានទទួលស្គាល់ដឹងឮ ពីមេបាចាស់ទុំ និងញាតិសន្ដាន ទាំងសងខាង។ ក្រោយមកបង្កើតបានកូនប្រុសស្រីចំនួន៣នាក់ ហើយកូនពៅទើបកើតបានអាយុ៨ខែប៉ុណ្ណោះ។ ដោយសារតែបញ្ហាជីវភាពទីទ័លក្រទើបនាង និងប្ដីមិនអាចទ្រាំរស់នៅឯស្រុកកំណើតបានទេក៏បានសម្រេចចិត្ត នាំគ្នាចាកចេញមកស្នាក់នៅរាជធានីភ្នំពេញ។ ដែលនាងគ្មានមុខរបរអ្វីឡើយព្រោះកូនៗនៅតូចទើបនៅមើលតែកូន នៅផ្ទះជួល ចំណែកប្ដីបានចាប់យកមុខរបរជាកម្មករសំណង់។
នាងបានបន្តទៀតថា នាងមិនបានដឹងថាលោកប្ដី ផិតក្បត់ទៅមានស្រីលួចលាក់តាំងពីពេលណានោះឡើយ ស្រាប់តែនៅថ្ងៃទី១៨ ខែមករា ឆ្នាំ២០១៩ លោកប្តីបានពង្រត់ស្រីថ្មីទៅបាត់ចោលរូបនាង និងកូនប្រុសស្រីគ្មានអាល័យសូម្បីបន្តិចឡើយ។ នាង និងកូនបានពឹងផ្អែកលើប្ដីទាំងស្រុងដើម្បីរកស៊ីចិញ្ចឹម ប៉ុន្តែនៅពេលដែលប្ដីធ្វើបែបនេះដាក់រូបនាងបានធ្វើឲ្យនាង ជួបការលំបាកវេទនាយ៉ាងខ្លាំងរកទីបំផុតគ្មាន។
មិនតែប៉ុណ្ណោះនាងបាននាំកូនទាំង៣នាក់តាមស្វែងរកប្ដីគ្រប់ ទីកន្លែងប៉ុន្តែពុំបានឃើញឡើយ ទើបនៅទីបំផុតនាងសម្រេចចិត្តធ្វើដំណើរទៅកាន់សាលាសង្កាត់ចោមចៅ៣ ដើម្បីសុំឲ្យអាជ្ញាធរជួយស្វែងរកប្ដីនាងផង៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]