អាណិតណាស់! កូនដំរីមួយក្បាល បានធ្លាក់ចូលអណ្តូងយ៉ាងជ្រៅ ទាល់តែប្រើអាត្រាក់ទ័រកាយបំបែកមាត់អណ្តូង (មានវីដេអូ)

ស្រីលង្កា៖  យោងតាមខ្សែវីដេអូរបស់សារព័ត៌មាន Daily Mail Australia ចេញផ្សាយ ថ្ងៃទី២២ ខែមករា ឆ្នាំ២០១៩ បានឲ្យឃើញពីទិដ្ឋភាពដ៏អាណោចអាធ័មរបស់កូនដំរីមួយក្បាល ដែលបានធ្លាក់ចូលក្នុងអណ្តូងទឹកយ៉ាងជ្រៅ ខំស្រវ៉ារកផ្លូវចេញ អត់អាហារស៊ី វិសនឹងក្ស័យជីវិត។ តាមប្រភពព័ត៌មានដដែលបានបញ្ជាក់ថា ហេតុការណ៍ខាងលើនេះកើតឡើងក្នុងភូមិ Welikanda ដែលមានទីតាំងក្នុងប្រទេសស្រីលង្កា។ 

សំណាងហើយ ឥឡូវនេះវាត្រូវបានអ្នកភូមិក្នុងតំបន់យកអាត្រាក់ទ័រ ទៅកាយបំបែកមាត់អណ្តូង ដើម្បីធ្វើការសង្រ្គោះជីវិតសត្វដំរី។ ដំបូងឡើយពួកគេភ្ញាក់ផ្អើលខ្លាំងណាស់ពេលឃើញទិដ្ឋភាពបែបនេះ។

ពេលនោះពួកគេពិតជាមិនអាចគិតឃើញពីវិធីដែលអាចយកកូនដំរីខាងលើចេញពីអណ្តូងនោះបានទេ ព្រោះដោយសារមាឌនិងទម្ងន់របស់វា។ គួរបញ្ជាក់ថា អណ្តូងទឹកដែលវាបានធ្លាក់ចូលនេះមានជម្រៅ ៧,៥២ម៉ែត្រ។ 

វាបានរងគ្រោះបន្តិចបន្តួចដែរដោយសារដុំថ្មនិងគ្រួសធំៗដែលប្រះចេញពីអណ្តូង ក្នុងអំឡុងពេលកាយដីបំបែក។ ទោះបីជាយ៉ាងណាក៏ដោយ ពួកគេនៅតែបន្តការកាយនេះ ព្រោះវាជាវិធីសាស្ត្រដ៏ល្អបំផុតមួយក្នុងការជួយសង្រ្គោះជីវិតកូនដំរី។

បន្ទាប់ពីចំណាយពេល ១ម៉ោងកន្លះ ក្នុងការកាយដីបំបែកមាត់អណ្តូងហើយ គេឃើញកូនដំរីដែលបានជាប់ក្នុងអណ្តូង បានរួចរស់ជីវិតចេញមកវិញដោយសុវត្ថិភាព៕

មានវីដេអូនៅខាងក្រោម​៖

• វីដេអូ