ខេត្តកំពង់ឆ្នាំង ៖ មុខសញ្ញាចាប់ក្មេងបង្ខាំងទុកជំរិតទារប្រាក់ពីអាណាព្យាបាល ត្រូវនគរបាលក្រុងកំពង់ឆ្នាំង សហការជាមួយនគរបាលរាជធានីភ្នំពេញចាប់ខ្លួនបាន កាលពីយប់ថ្ងៃទី១៩ ខែមករា ឆ្នាំ២០១៩ នៅផ្ទះសំណាក់«តារាវង្ស»ក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង ។ ជនសង្ស័យត្រូវនគរបាលក្រុងកំពង់ឆ្នាំង ប្រគល់ឲ្យនគរបាលរាជធានីភ្នំពេញនៅព្រឹកថ្ងៃទី២០ ខែមករា ដើម្បីចាត់ការតាមនីតិវិធី ។
មន្ត្រីនគរបាលឱ្យដឹងថា ជនសង្ស័យឈ្មោះស្រេង បុរី អាយុ២៤ឆ្នាំ មានស្រុកកំណើតនៅភូមិកូនក្អែក១ ឃុំរបោះមង្គល ស្រុកមោងឫស្សី ខេត្តបាត់ដំបង តែរស់នៅមិនពិតប្រាកដ ។ ក្រោយពេលទទួលបានដំណឹងពីករណីចាប់ក្មេងបង្ខាំងទុក ដើម្បីជម្រិតទារប្រាក់រួចមក សមត្ថកិច្ចក៏តាមស្រាវជ្រាវ ខណៈជនសង្ស័យចល័តខ្លួនទៅច្រើនកន្លែង ។ ចុងក្រោយនគរបាលក៏សហការគ្នាតាមរក និងចាប់ខ្លួនបាន ខណៈគេកំពុងស្នាក់នៅផ្ទះសំណាក់មួយក្នុងភូមិស្រែព្រីង សង្កាត់កំពង់ឆ្នាំង ។
នគរបាលខណ្ឌឫស្សីកែវឱ្យដឹងថា ស្រេង បុរី នេះ គឺជាអ្នកទោសដែលរត់ចេញពីពន្ធនាគារ ហើយបានលួងលោមក្មេងជាសិស្សសាលា យកទៅបង្ខាំងទុកក្នុងផ្ទះសំណាក់ជំរិតទារប្រាក់ចំនួន២ពាន់ដុល្លារកាលពី២ខែមុន ។ គេបានរត់គេចខ្លួនពីពន្ធនាគារព្រៃ.ស នៅអំឡុងឆ្នាំ២០១៧ ពីបទវាយប្លន់ ។ ចំណែកដើមបណ្តឹងឈ្មោះឱក សុភី ភេទស្រី អាយុ៥០ឆ្នាំ ជាអ្នកលក់ដូរ រស់នៅផ្ទះលេខ១៧M ផ្លូវលំក្រុម១៤ សង្កាត់ចោមចៅ ខណ្ឌពោធិ៍សែនជ័យ ជាម្តាយក្មេងប្រុសរងគ្រោះឈ្មោះឈុន សុវណ្ណារ័ត្ន អាយុ១៣ឆ្នាំ ជាសិស្សថ្នាក់ទី៨នៃវិទ្យាល័យឫស្សីកែវ ។
នគរបាលខណ្ឌឫស្សីកែវឱ្យដឹងថា កាលពីវេលាម៉ោងប្រមាណ១១ព្រឹក ថ្ងៃទី២០វិច្ឆិកា ឆ្នាំ២០១៨ នៅចំណតរថយន្តក្រុង មុខមជ្ឈមណ្ឌលម៉ូឌែន៥តាមផ្លូវជាតិលេខ៥ក្នុងភូមិសាមគ្គី សង្កាត់ឫស្សីកែវ សិស្សរងគ្រោះបានឈប់ចាំជិះរថយន្តទៅផ្ទះ ។ ស្របពេលនោះស្រាប់តែគេត្រូវស្រេង បុរី លួងលោមនាំទៅទទួលទានអាហារ ហើយក៏យកទៅបង្ខាំងទុកនៅផ្ទះសំណាក់មួយម្តុំគល់ស្ពានព្រែកព្នៅ ។
នគរបាលឲ្យដឹងទៀតថា នៅវេលាម៉ោង១២ និង៤៧នាទីថ្ងៃត្រង់ ថ្ងៃដដែល ស្រេង បុរី បានប្រើលេខទូរស័ព្ទ ០៩៦ ៨៧២ ៨២៥៥ ខលទៅម្តាយក្មេងរងគ្រោះជំរិតទារប្រាក់ចំនួន២ពាន់ដុល្លារ បើចង់បានកូនត្រឡប់ទៅវិញ ។ ក្រុមគ្រួសារបានតថ្លៃនៅសល់តែ៥០០ដុល្លារ និងបានវេរប្រាក់ឲ្យតាមវីងនៅវេលាម៉ោងប្រមាណ៦ព្រឹកថ្ងៃទី២១ វិច្ឆិកា ។ បន្ទាប់ពីបានប្រាក់ហើយ គេនៅតែពុំទាន់ដោះលែងក្មេងប្រុសរងគ្រោះទេ ។ មួយសន្ទុះក្រោយស្រេង បុរី បានទូរស័ព្ទទារប្រាក់ចំនួន២០០ដុល្លារបន្ថែមទៀត តែម្តាយក្មេងរងគ្រោះអត់មាន ក៏សុំឱ្យត្រឹម៥០ដុល្លារ ។ ក្រោយមកប្រមាណកន្លះម៉ោងទើបគេដោះលែងក្មេងរងគ្រោះឲ្យទៅផ្ទះវិញ ។
ប្រភពព័ត៌មានថា អ្នកស្រីឱក សុភី បានដាក់ពាក្យបណ្តឹង ហើយនគរបាលខណ្ឌឫស្សីកែវ បានស្រាវជ្រាវ សុំបើកការស៊ើបអង្កេតបឋមចុះថ្ងៃទី៥ ខែធ្នូ ឆ្នាំ២០១៨ដោយលោកកែវ សុធា ព្រះរាជអាជ្ញាអមសាលាដំបូងរាជធានីភ្នំពេញឈានទៅសហការឃាត់ខ្លួនជនសង្ស័យបាននៅផ្ទះសំណាក់ក្នុងក្រុងកំពង់ឆ្នាំង បន្ទាប់ពីគេគេចទៅសម្ងំលាក់ខ្លួនអស់ប្រមាណ២ខែ ៕
ប្រភព៖ កោះសន្តិភាព
បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected]
(3) LINE, VIBER: 098282890 (4)
តាមរយៈទំព័រហ្វេសប៊ុកខ្មែរឡូត https://www.facebook.com/khmerload
ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]